Монголын бүх телевизийн сувгаар нэг хэсэг “Гурвалсан үйлчилгээг сонгосон та дуртай нэвтрүүлэг, киногоо хүссэн цагтаа үзэж, зурагтнаасаа л дорно, өрнийн зурхайгаа харж, валютын ханш ч сонирхох боломжтой” хэмээн “хашгирч” хүмүүсийн тархийг угаасан. Үзэгчид ч энэ уран цэцэг үгэнд нь бөмбөгдүүлж, тархиа угаалгах шиг л болсон. Өөрөөр хэлбэл, тэр “Гурвалсан үйлчилгээ” гээч нь нэвтэрсний дариуд л 20 гаруй мянган өрх гэртээ суурилуулсан гэх юм билээ. Нуулгүй хэлэхэд миний бие ч гэсэн гэрийнхнийгээ ятгаж байгаад л тавиулсан. Эхний хэд хоног ч ёстой л нэг гурван үйлчилгээг зэрэг мэдэрсэн шүү. Харин хоёр, гурван сар хүрэлгүй л гайхамшигийг амласан нөгөө үйлчлүүлэгчийн маань гацалт эхэлсэн юм даа. Ингээд би жилийн насгүй “найз”-аасаа салж, өөрийг сонгохоос өөр аргагүй болов. Гэвч сониуч зандаа хөтлөгдөн “гурвалсан үйлчилгээ” гээчийн талаар багахан судаллаа.

Тэгсэн гайхамшигт үйлчилгээний маань хамгийн чухал нь IPTV юм билээ. Өөрөөр хэлбэл, энэ нь өргөн зурвасын интернэт ашиглан тоон телевизийг ердийн телевизор дээр хүлээн авч үзэх боломж олгосон технологи л доо. Түүнчлэн хэрэглэгчид нь IPTV-г хүлээн авч буй сүлжээгээрээ дамжуулан өндөр хурдны интернэт болон суурин утасны үйлчилгээг нэгэн зэрэг хүлээн авах учиртай юм. Энэ үйлчилгээг “Univision” компани 2011 онд нэвтрүүлж, нийслэлчүүдэд “Та телевизийн шууд эфирээр дамжиж буй нэвтрүүлгийг түр зогсоох, гараад өнгөрсөнийг нь нөхөж үзэх, хуулж авах, удирдлагын тусламжтайгаар хүссэн видеогоо гэрээсээ захиалан үзэж, телевизийг өөрийнхөөрөө удирдах боломжтой боллоо” хэмээн ёстой л нэг гайхамшиг гээчийг мэдрүүлэхээр өчсөн юмдаг. Үүнээс хойш өдгөө хоёр жилийг ардаа үджээ. Харин нөгөө гайхамшигт өчил нь гайхалтай гацалтаар л үргэлжилж байна. Завгүй нийслэлчүүдийг татсан IPTV-гийн давуу тал нь буцаан үзэх боломж юм. Одоо харин IPTV-г Монголд нэвтрүүлж чадсан гэж цээжээ дэлдэх “Univision” хэрэглэгчдийн гомдол, бухимдалд дарлуулж, үзэгчид буруу сонголт хийсэн дээ харамсаж явна.

Тус компанийн “Univision Mongolia” гэх фэйсбүүк хуудас хэрэглэгчдийн гомдолд дарагджээ. “Интернэт удаан байна, тасраад болдоггүй, манай суваг гарахгүй юм, ажилладаггүй ээ, буцаах үйлчилгээ нь зөвхөн цөөн тооны нэвтрүүлэгт тодорхой хугацаанд хамаатай болж, үзэх биш хүлээх боллоо” гэсэн уртаас урт гомдол үргэлжилсээр.  Харин тус компанийнхан гайхалтай ганц хариулттай. Магадгүй уншигч та “Гэрээний дугаараа үлдээнэ үү. Удахгүй очоод засаад өгнө” гэсэн үгийг сонсоод бүтэн өдөржин хүлээсэн ч байж мэднэ. Бүр таг алга болоод арга хэмжээ авахгүй болохоор нь ШӨХТГ-т хүртэл хандсан байх. Хэдэн сарын өмнө Бат-Өлзий гэдэг иргэн ШӨХТГ-ын 1284.mn сайтад “Юнивишн” компанийн нэвтрүүлсэн IPTV үйлчилгээний талаар дараах асуудлууд байгааг уламжилья. Үйлчилгээгээ сурталчилахдаа нэмэлт үйлчилгээ болох нэвтрүүлэг ухраах/зогсоох, нөхөж үзэх үйлчилгээг бүх сувагтаа байдаг мэтээр буруу ойлголт өгч байна. Мөн энэ үйлчилгээнүүдийг идэвхжүүлсний төлөө тус бүрт нь сард 1500 төгрөгийн төлбөр авдаг юм. Хамгийн гол асуудал нь энэ үйлчилгээ тус IPTV-гийн 10 гаруй сувагт л үйлчилдгийг хэнд ч хэзээ ч тайлбарлаж байгаагүй. Ийм зохистой байдлаар сурталчлахгүй бүх л сувагт үйлчилдэг мэтээр сурталчилдаг, борлуулдаг... Энэ талаар “Юнивишн”-ийн утсанд хэд хэдэн удаа санал гомдлоо илэрхийлж байсан ч ямар ч үр дүн байсангүй...” хэмээжээ. Саяхан л гэхэд тус компанийн фэйсбүүк хуудсанд Onon Bat “Манай “Motorolla”-гийн HD box-toi зурагт минут тутамд гацаж, дэлгэц нь харлаад удаж байна. Танай утас руу залгаад хэлэхээр байнга “Унтраагаад хэдэн минутын дараа асаа” гэнэ. Тэр нь 30 минут зүгээр асч байгаад буцаад л гацаад эхэлнэ. Инжерерүүд нь ирээд үзэхээрээ олигтой юм хэлэхгүй. HDMI утас хийчихээд яваад өгнө. Яавал зурагтаа тухтай үзэх вэ” хэмээсэн байна. Энэ мэт гомдолд “Univision” дарагдсан ч, одоог хүртэл гацалт нь хэвээрээ.

Тус компанийн IPTV яагаад хэрэглэгчдийн бухимдлыг бараад байгааг сонирхож үзлээ. Учир нь IPTV нь бодит хугацааны агшинд мэдээллийг дамжуулж байдаг учраас сүлжээний хоцрогдолгүй байх төдийгүй холбогдох хурдны зурвас өндөр байх шаардлагатай байдаг байна. Өөрөөр хэлбэл, интернэтийн өндөр хурд шаардагддаг учраас тухайн цэгт очиж байгаа хурд хангалтгүй байвал бүх хэрэглэгчийн зурагт гацдаг гэсэн үг. Түүнчлэн бүх үйлчилгээ нь интернэт дээр суурилсан учир интернэтийн урсгал тасарвал телевиз, суурин утас, интернэтийн үйлчилгээг ашиглах боломжгүй болдог. Энэ нь хэрэглэгчдийг хамгийн ихээр бухимдуулдаг алдаа. Өөр нэг нэг эрсдэл нь хэрэглэгч бүр оноосон ip-тай байдаг тул уг сүлжээгээр дамжуулан хакердуулж байгууллагын хувийн тайлан, санхүүгийн мэдээлэл алдагдах магадлал өндөр байдаг байна. Үүний зэрэгцээ IPTV үйлчилгээний хэрэгжилт орчин үеийн технологи шаарддаг ба холболт нь ядахдаа 5-6 mbps байх ёстой. Хэдий тийм боловч 8 mbps байхаар стандарчилсан байна. Учир нь хэрэглэгч телевиз үзэхийн хагжуур интернэт ашигладаг болохоор тэр. Харин “Univision”-ийн хувьд  интернэтийн хурдаа гурав дахин нэмэгдүүлсэн гэх ч, дээд хурд нь 3-6 mbps болгосон гэнэ. Энэ мэт эрсдэл өндөр учраас Монголд IPTV-г бүрэн нэвтрүүлж чадахгүй, “Univision” нийслэлчүүдийн зэвүү, дургүйг зэрэг хүргээд байгаа аж.

Дэлхийн олон оронд IPTV-ийг нэвтрүүлсэн ч үр дүнд хүрээгүй дампуурсан тохиолдол цөөнгүй гэсэн. Жишээлбэл, Малайзад хэд хэдэн компани IPTV-ийг UHF-р дамжуулах, STB-р хангахгүй компьютер ашиглан телевиз үзэх зэрэг сонголтыг хийснээсээ болж дампуурч байсан удаатай. Өөрөөр хэлбэл их санасан газар есөн шөнө хоосон гэхчээр монголын бүх өрхөд IPTV-г нэвтрүүлэх “Univision”-ийн мөрөөдөл талаар болж мэдэх нь. Учир нь тэд хэрэглэгч бол хаан гэдэг өнөөгийн нийгмийн зарчмыг мартаж, мөнгийг нь хурааж байвал боллоо гэдэг дүрмийг л баримталж иржээ. Харин сонголт хэрэглэгчийн гарт гэдгийг төдийлөн ухаарахгүй байгаа бололтой.