"Оюутолгой" компаниас хууль бусаар халагдсан гэж зарга үүсгэсэн С.Гантуяа хоёр ч шатны шүүхэд тус компанийг ялаад байгаа билээ. Анхан болон давж заалдах шатны шүүхээр "Оюутолгой" компанийг буруутайг нотлоод байгаа юм.  Харин "Оюутолгой" компанийн зүгээс С.Гантуягийн эсрэг дээд шатны шүүхэд давж заалдаад байгаа юм. Тус шүүх хурал энэ сарын 12-ны өдөр болох юм.

  С.Гантуяа “Оюутолгой” компани нь монгол ажилчдыг ялгаварлан гадуурхаж, гадаад ажилчдад илүү цалин өгдөг гэж мэдэгдснийхээ төлөө өнгөрсөн хавар ажлаасаа халагдсан  юм. Тэрээр энэ талаар ярихдаа "Монголын шүүх шударга байж энэхүү маргааныг хуулийн дагуу шийдэж байгаа. Ажилдаа буцаж орж Оюутолгойн удирдлагад үйлчилдэг Оюутолгойн Үйлдвэрчний эвлэлийг монгол ажилчдын төлөө ажиллуулдаг болгоно. Мөн өнөөдрийг хүртэл миний ажилгүй байсан хугацааны цалин бодогдож байгаа. Би түүнийг өөрийн төрсөн нутгийнхаа хүүхэд багачуудыг сурч хүмүүжихэд нь зориулж цэцэрлэгт 100 хувь хандивлана" гэж хэлж байгаа юм.

Удахгүй болох шүүх хурлын талаар С.Гантуяагаас тодрууллаа.

-    Оюутолгой компанийг өмгөөлж байгаа Уранцэцэг өмгөөлөгчийн ойрын хүн нь одоо болох шүүх хурлыг даргална гэсэн үү?

-    Тийм. Энэ удаагийн шүүх хурлаар бүх зүйл эцэслэгдэн шийдвэрлэгдэх юм. Ерөнхийдөө манай шүүх байгууллагууд бүгд хуулийн дагуу, шудрага шийдээд явж байгаа. Миний хөдөлмөрийн маргааныг улсын дээд шүүхийн Цолмон гэдэг шүүгчээр ахлуулсан баг бүрэлдэхүүн дээр хувиарласан байна. Тэгэхээр Цолмон гэдэг хүнийг хэн юм бэ гэдгийг тодруулж үзлээ. Тэгэхэд Цолмон гэдэг шүүгч нь Оюутолгой компанийг өмгөөлөөд байгаа Уранцэцэг өмгөөлөгчийн шавь нь байсан хүн юм байна. Мөн удирдлагын академийн хуулийн танхимд олон жил хамт ажиллаж байсан хүмүүс юм байна.

-    Тэгэхээр одоо яана гэсэн үг вэ? Үүнийг зохицуулах зохицуулалт манай хуулинд байдаг уу?

-  “Иргэний хэрэг шүүхэд хянан шийдвэрлэх” хууль гэж байдаг юм. Энэ хуульд зааснаар бол тус маргааныг шударгаар шийдвэрлэхэд эргэлзээ байгаа бол шүүгч өөрөө тус хэргээс татгалзах үүргэтэй. Энэ хуулийн 91.1.3-т зааснаар хэргийн оролцогчтой хувийн харилцаатай, түүнчлэн уг хэргийг шударгаар шийдвэрлэж чадах эсэх талаар үндэслэл бүхий эрзэлзээтэй байвал татгалзах үүргэтэй юм байна. Тэгэхээр хувийн харилцаанд ах дүү, хамаатан, садан, ажлын харилцааны бүх зүйл орж байгаа шүү дээ. Мөн "Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилсан сэргийлэх тухай хууль"-д зааснаар шүүгч нь янз бүрийн тогтоол шийдвэр гаргаж болохгүй гэж хориглосон байдаг. Мөн нэгдмэл ашиг сонирхолтой этгээдтэй хоёр жилийн дотор хуулийн харилцаанд орж болохгүй гэж заасан байгаа. Тэгэхээр энэ хуулийн дагуу бол Цолмон өмгөөлөгч маань өөрөө шүүх хуралдаанаас татгалзах ёстой харагдаад байгаа юм. Татгалзаад гарах байх гэдэгт итгэж байна. Шүүгч хүн хуулиа биелүүлэхгүй бол өөр хэн хуулиа биелүүлэх билээ.

-    Та эрхээ хамгаалуулахаар дахин ямар нэгэн байгууллагад хандсан уу?

-    Сая олон улсын үйлдвэрчний эвлэлийнхэн манай улсад ирээд явсан. Тэр үеэр нь би олон улсын үйлдвэрчний эвлэлийнхэнтэй уулзсан. ОУ-ын үйлдвэрчний эвлэл Рио Тинтогийн эсрэг бүх нийтээрээ эсэргүүцлийн арга хэмжээ зохион байгуулж байгаа юм байна лээ. Тэд намайг дэмжинэ гэсэн.