Манайхаас бусад аль ч орны нийслэлийн ерэн хувийг ногоон байгууламж эзэлдэг гэсэн судалгаа байдаг. Харин манай Улаанбаатар хотын ердөө тавхан хувийг ногоон байгууламж эзэлдэг аж. Хотын гудамжаар тарьсан хэдэн мод, замын дундуурх бут сөөг, зүлэг ороод л нөгөө таван хувь нь бүрддэг учраас монголчуудад ногоон бүс, стандартын дагуу мод тарьж, арчиж, ургуулах тухай мэдлэг дутуу дулимаг байдаг биз. Нөгөө талаар монголчууд саяханаас л мод тарьж, арчиж ургуулах талаар ерөнхий мэдэгдэхүүнтэй болж байгаа улс.  

Уг нь ногоон байгууламж нь хүчилтөрөгч ялгаруулж, нүүрсхүчлийн хийг өөртөө шингээж агаарын бохирдлыг бууруулахаас эхлээд маш их эерэг нөлөөтэй.

Хөрс, агаарын бохирдол нь гамшгийн хэмжээнд хүрсэн манайх шиг улсад бүр ч хэрэгтэй. Манайхан жил бүрийн хаварт ногоон байгууламжтай болохоор өч төчнөөн хөрөнгө мөнгө зарж, мод тарьдаг хэрнээ тэрийгээ арчилж, ургуулж чадахгүй явсаар үхүүлж, олон сая төгрөг салхинд хийсгэчихдэг талтай. Тийм учраас БОНХЯ-аас ногоон байгууламжийг нэмэгдүүлж, иргэдийг хариуцлагатай болгохын тулд хүмүүсийн тарьсан ой, ногоон байгууламжийг худалдаж авдаг шинэ харилцааг энэ жилээс нэвтрүүлж эхлээд байгаа билээ. “Сайшаалтай” гээд магтчих уг ажлыг эхлүүлээд удаагүй ч үр дүнгээ өгөөд эхэлсэн талаар албаныхан хэлж байгаа. Энэ ажлыг маш сайн бодлого, зохион байгуулалт байна хэмээн магтах хүмүүс ч олон байна. Манай улс гадны улсуудын жишгээр иргэдийнхээ тарьсан мод, ногоон байгууламжийг худалдаж авснаар хүмүүс мод тарих дуртай болж тэр хэрээр байгаль экологи цэвэршиж, бид ч эрүүл, тохитой орчинд амьдрах нөхцөл нь бүрдэх юм. Манай урд хөрш Хятад л гэхэд яг энэ жишгээр ногоон байгууламжаа бий болгодог байна. Хятадын аль нэг хот, мужийн  90 хувийг заавал ногоон байгууламж эзэлдэг. Хот доторх ой, бут сөөг, зүлгээ иргэд нь бүгд ээлжилж усалдаг. Нарлаж суугаа эмээ өвөө, салхилж яваа залуу хосуудын аль нь ч хамаагүй мод, ургамалаа усалдаг нь өөрийнхөө юманд сэтгэл тавьж, анхаарч байдагийн жишээ гэлтэй. 

Харин манайд арай оройтож эхэлсэн уг ажлыг БОНХЯ эхлүүлснээс хойш хэд хэдэн иргэний модыг худалдан авчээ. Тухайлбал өнгөрсөн дөрөвдүгээр сард Увс аймгийн иргэн Х.Тэсхүүгийн тарьсан дөрвөн га таримал ойг төрөөс 1.197.000 төгрөгөөр худалдан авчээ. Мөн У.Уламбаяр зэрэг 20 гаруй иргэн 39.5 га газарт тариалсан ойгоо улсад 12 сая төгрөгөөр зарсан байна. Дарханчууд ч таримал ойгоо төрд худалджээ. Энэ мэтээр иргэд хашаандаа, гудамжиндаа, дүүрэгтээ мод тариад түүнийгээ арчилж ургуулаад улсад худалдаж болох нь. Энэ боломж хүн бүрт нээлттэй. Мод тарьж эх дэлхийдээ буян үйлдэхийнхээ хажуугаар бусаддаа эрүүл аюулгүй орчинг бэлэглэж цаашлаад мөнгө болон санхүүгийн эх үүсвэрээ баталгаажуулах боломжтой болж байна гэсэн үг юм. Ингэснээр та гэртээ, дуртай зүйлээ хийгээд ч мөнгөтэй болох боломжтой. Тиймээс хүн бүр ногоон байгууламж бий болгож, мод, цэцэг тарьж эргэн тойрондоо эко орчныг бий болгоцгооё.