"Гал үндэстэн" холбоо тэргүүтэй 11 ТББ-ынхан өнөөдөр өглөө  Төрийн ордны гадаа эсэргүүцлийн жагсаал хийж, урт нэртэй хуульд өөрчлөлт оруулахыг эсэргүүцсэн юм. Учир нь энэ долоо хоногийн УИХ-аар урт нэртэй хууль буюу  Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, олборлохийг хориглох тухай хуульд өөрчлөлт оруулах төслийг хэлэлцэнэ. Харин ТББ-ууд тус хуульд өөрчлөлт оруулахгүй хэмээн эсэргүүцэж жагссан юм.   Мөн жагсагчдын дундаас төрийн ордон дотор хийн буудлага хийсэн. Галт зэвсэг нээсний улмаас Төрийн ордоны гадна хөл хорио тогтоож, есөн хүнийг баривчилж Сүхбаатар дүүргийн цагдаагийн хэлтэст яг одоо байцааж байна.

Жагсагчдыг цуглаан хийхдээ холбогдох газраас нь зөвшөөрөл аваагүйд цагдаагийн байгууллагаас буруутгаж байгаа аж.

Ингээд Сүхбаатар дүүргийн цагдаагийн газарт байцаагдаж буй “Харуул Алтайн хишиг сан” ТББ-ын тэргүүн Н.Алтанцэцэгээс зарим зүйлийг тодрууллаа.

-    Цагдаагийнхан таниас юу асууж,  тодруулж байна вэ?

-    Тайлбар яриа авч байна. Ямар шалтгаанаар та нар Төрийн ордны гадаа цугласан юм. Хэн зохион байгуулж байна гэж асууж байна. Бид өөрсдийнхөө үзэл бодлоор тайлбараа хийж байна. Хэрэг болсон газар дээр Сүхбаатар дүүргийн цагдаагийн ажлын хэсэг дүн шинжилгээ хийж байгаа юм байна. Газар дээр нь ажиллаж дуусчихаад бид нартай уулзана гэж байна. “Та нар зөвшөөрөлгүйгээр цуглаан хийлээ” гэж хэлэн буруутгаж байна.

-    Байцааж дуусчихаад та хэдийг явуулна гэж байна уу?

-    Хэлж мэдэхгүй байна. Гарч болохгүй байна. Цагдаагийн дарга нар нь өөрсдөө бидэнтэй уулзаж, зохих хэмжээний хариуцлага оногдуулах гэж байна.

-    Та нар өчигдөр хуралдсан юм байна лээ. Тэгэхдээ буу ашиглана гэж хоорондоо ярилцсан юм уу?

-    Буу ашиглана гэж ярилцаагүй. Бид бол эх орныхоо бүрэн бүтэн байдал, тусгаар тогтнолын төлөө эв санаагаа нэгтгэнэ гэж ТББ-ууд нэгдсэн. Урт нэртэй хуульд өөрчлөлт оруулах асуудлыг бид эсэргүүцэж байгаа юм. Чуулган хуралдаж байгаа учраас энэ үеэр дуу хоолойгоо хүргэе гэж л бодоод байна.

 -Таны бодлоор буу ашигласан нь хэр зөв алхам бэ?

-Эх орныхоо төлөө тэмцэл хийж байгаа учраас би буу хэрэглэсэн нь зүйтэй гэж хэлэх байна. Гэхдээ бидэнд буу зэвсэг хэрэглэнэ гэсэн төлөвлөгөө байгаагүй. Хаанаас буу гарсныг огт мэдэхгүй.

-    Та хаанаас  хэн буудсаныг мэдэхгүй байгаа юм байна. Тийм үү?

-    Хаанаас буун дуу гарсныг мэдэхгүй. Бид буу ашиглана гэж огт ярилцаагүй. Буун дуу гарах үеэр Ц.Мөнхбаяр ордон дотор шаардлагаа хүргүүлэхээр орсон байсан.

-    Зөвшөөрөл авч болоогүй юм уу?

-    Бид ийм зүйл болно гэж бодоогүй. Жагсаал цуглаан ч хийгээгүй шүү дээ. 30 гаруй хүн цуглаад л шаардлагаа өгөх гэж байсан юм.

- Ц.Мөнхбаяр яг одоо хаана байгаа вэ?

- Мэдэхгүй бид холбоо тасраад удаж байна. Төрийн тусгай албаныхан аваад явсан.