Цагдаа болон дотоодын цэргийн байгууллагын тусгай албан тушаалд анх орох иргэдээс авах мэргэшлийн шалгалтын зар гарчээ. Ингээд энэ шалгалтын талаар ЦЕГ-ын Сургалт, сурталчилгааны хэлтсийн тасгийн дарга, цагдаагийн дэд хурандаа Т.Дамбийнямаас тодруулсан юм.
 
-Цагдаагийн байгууллагад орох хүсэлтэй иргэдээс мэргэшлийн шалгалт авна гэх мэдээлэл байна. Шалгалтыг хэзээ авах вэ. Ямар хүмүүс энэ шалгалтанд орж болох юм бэ?
-Цагдаагийн байгууллагын төрийн тусгай  албан тушаалын сул орон тоог тус албан тушаалд анх орох иргэдээс өрсөлдүүлэн шалгаруулж нөхөх мэргэшлийн шалгалтыг ирэх 10 дугаар сарын 15-21-ний өдрүүдэд авна. Уг шалгалтанд  зарлагдаж байгаа ажлын байр /албан тушаал/-д тавигдах боловсрол, мэргэжил, мэргэшил, туршлага, ур чадвар болон тусгай шаардлагыг хангаж байгаа, мөн хуульд заасан үндэслэлээр албанаас хүсэлтээрээ чөлөөлөгдсөн иргэд сул орон тоонд өрсөлдөхөөр бүртгүүлэх эрхтэй.

-Одоо цагдаагийн байгууллагад ямар ямар ажлын байранд иргэдээс шалгалт авах гэж байна вэ?
- Цагдаагийн Ерөнхий газрын Санхүү, ар талын газарт-Цагдаа, дотоодын цэргийн алба хаагчдын нөхөн сэргээх сувилал /Сүүж уул/-ын эмчилгээ эрхэлсэн орлогч, нөхөн сэргээх, физик эмчигээний эмч, гал зуухны дарга бөгөөд ахлах тогооч тус тус нэг хүн авна. Цагдаагийн Ерөнхий газрын Мэдээлэл, холбоо технологийн төвд-Хөдөлгөөнт холбооны техникч, суурь сүлжээний төлөвлөлт хариуцсан инженер, компьютерийн засварын инженер, ахлах программист тус  бүр нэг  нэг хүн авах юм. Мөн Мэдээлэл, шуурхай удирдлагын төвд-ахлах зохицуулагч /103/, Телефон холбооны ашиглалтын ахлах инженер, Цахилгаан тэжээл, агааржуулалт хариуцсан ахлах инженерийн орон тоонд хүмүүс шалгаруулж авна. Түүнчлэн төв, орон нутгийн цагдаагийн байгууллагад Холбооны инженер хоёр, эрүүлжүүлэх, баривчлах байрны их /бага/ эмч, их эмч ёс, цагдаа-жолооч 63, тээвэр үйлчилгээний жолооч-5, цагдаа-зохицуулагч-18, хэв журмын цагдаа-125, бичээч, бичиг хэргийн эрхлэгч-1, хүний нөөцийн хэрэг хөтлөгч-1, тооцооны нягтлан бодогч-1-ийг авахаар байна. Харин дотоодын цэргийн штабд харуулчин-39, хөгжимчин 1, автозасварчин 1 хүний орон тоо байгаа.

-Шалгалт өгөх иргэдэд ямар шаардлага, шалгуур тавьж байгаа вэ?
- Төрийн албаны зөвлөлийн 2010 оны 20 дугаар тогтоолоор батлагдсан “Цагдаа, дотоодын цэргийн байгууллагын тусгай албан тушаалд анх орох иргэнээс мэргэшлийн шалгалт авах журам” болон зарлагдаж байгаа ажлын байранд тавигдах шаардлага, шалгуур үзүүлэлтийг Цагдаагийн байгууллагын www.police.gov.mn гэсэн цахим хуудсанд байрлуулсан байгаа. Тиймээс сонирхсон иргэд дээрх цахим хаягаар орж, дэлгэрэнгүй мэдээлэл авч болох юм.

-Бүртгэлийн хоёр үе шаттай явуулна гэж сонссон юм байна?
-Тиймээ. Бүртгэл хоёр үе шаттайгаар явагдана. Нэгдүгээр үе шат нь бол цагдаагийн байгууллагын сул ажлын байранд өрсөлдөх иргэд оршин суугаа нутаг дэвсгэрийнхээ цагдаагийн байгууллагад ирэх 10 дугаар сарын 13-ны өдрийг хүртэл  бүртгүүлж, судалгаанд хамрагдана. Хоёрдугаар үе шатанд нь дээрх байдлаар судлагдсан иргэдээс батлагдсан хуваарийн дагуу шалгалт авна. Харин шалгалтын бүртгэл хугацааны талаар нэмэгдэл мэдээлэлийг тухайн үед нь өгөөд явна.

-Иргэд ямар бичиг баримт бүрдүүлж, бүтгэл судалгаанд хамрагдах ёстой юм бэ?

-Иргэд дараах бичиг баримтыг бүрдүүлж, бүртгэл, судалгаанд хамрагдана. Үүнд:

 Өргөдөл, биеийн байцаалт. Энэ нь болохоор төрийн албан хаагчийн биеийн байцаалтын маягт №1-ийн дагуу бүрэн бичсэн байх ёстой. Дээд боловсролын диплом. Иргэд дээд боловсролын дипломоо нотариатаар баталгаажуулсан хуулбарын хамт авч ирэх хэрэгтэй. Бүрэн дунд боловсролын гэрчилгээ, цагдаагийн мэргэжлийн сургалт төгссөн гэрчилгээ. Энэ мөн л нотариатаар баталгаажуулсан хуулбарын хамт байх ёстой. Эмчийн орон тоонд өрсөлдөх иргэдийн хувьд хүчин төгөлдөр эмчлэх эрхийн гэрчилгээг нотариатаар баталгаажуулсан хуулбарын хамт авч ирнэ. Тэгээд иргэний үнэмлэх нотариатаар баталгаажуулсан хуулбар хамт байна. Мөн 3 үеийн түүх, Сурагчийн хувийн хэрэг, Оршин суугаа нутаг дэвсгэрийн Засаг даргын тодорхойлолт, Ажилласан хугацаа болон ажил эрхлэлтийг гэрчлэх баримт буюу нийгмийн даатгалын дэвтэр, хөдөлмөрийн дэвтэрийн эх хувь,  албанаас чөлөөлөгдсөн бол тушаалын хувь, 4х6 хэмжээний 4% зураг гэх зүйлүүдийг бүрдүүлсэн байх шаардлагатай. Бичиг баримт дутуу бүрдүүлсэн иргэнийг бүртгэхгүй. Шаардлагатай гэж үзвэл иргэнээс нэмэлт материал гаргуулан авна. Шалгалтад орохоор бүртгүүлж байгаа иргэн өөрийнхөө тухай үнэн зөв мэдүүлэх үүрэгтэй.  

Эцэст нь нэмж хэлэхэд мэргэшлийн шалгалттай холбоотой ажлын байрны сул орон тооны мэдээлэл, бүрдүүлэх материал, бүртгүүлэх хугацаанаас бусад шаардлагатай асуудлаар Цагдаагийн байгууллагын www.police.gov.mn гэсэн цахим хуудсан дахь мэдээлэл, Цагдаагийн ерөнхий газрын Хүний нөөцийн хэлтэс 70114906 дугаарын утсаар холбогдож, лавлагаа, мэдээлэл авч болно.