Нийслэлийн авто замын сүлжээг өргөтгөн хөгжүүлэх зорилго бүхий “Гудамж” төслийн “Хотын төв” дэд төслийн хүрээнд 12 уулзварыг өргөтгөн шинэчилж, ашиглалтад оруулаад байгаа бол одоо дөрвөн уулзварын өргөтгөл шинэчлэлийн ажил үргэлжилж байгаа юм. Ашиглалтад орсон уулзварууд урьдынхаасаа хэрхэн өөрчлөгдсөн болон нийгэм-эдийн засгийн ямар ач холбогдолтой талаарх судалгааны зарим тоон үзүүлэлт гараад байна.

   Судалгааны дүнгээс харахад ашиглалтад орсон 12 уулзварын хэмжээнд тээврийн хэрэгслийн зорчих хэсгийн нийт 104 375 ам метр талбайд асфальт бетон хучилт хийжээ. Үүнээс 38 хувь буюу 40 679 ам метр нь шинээр нэмж өргөтгөсөн талбай юм. Энэ хэмжээг нэгж тээврийн хэрэгслийн эзлэх дундаж талбайд шилжүүлбэл 3 130 автомашинтай тэнцэж байна. Өөрөөр хэлбэл, тухайн замууд ийм тооны тээврийн хэрэгсэл нэмж нэвтрүүлэх чадвартай боллоо гэсэн үг. Мөн явган зорчигчийн зориулалтын зам 18 495 ам метрээр нэмэгдсэн байна.

   Энэ хугацаанд зам барилгын ажилд 1065 хүн 280 машин, тоног төхөөрөмж ашиглан оролцож, 200 112 хүн/цаг, 58 832 машин/цаг зарцуулжээ.

   Харин эхний ээлжинд Өргөө, Саппоро, Дарь-Эхийн уулзваруудад эдийн засгийн үр өгөөжийн судалгаа хийсэн бөгөөд энэ гурван уулзварыг өргөтгөн шинэчилснээр жолооч нар өдөрт дунджаар 866 цаг, жилд 3.9 тэрбум төгрөг хэмнэх боломжтой гэсэн урьдчилсан дүн гараад байна. Мөнгөн дүнг тээврийн хэрэгслийн ашиглалт болон шатах тослох материалын зардал, хэмнэж буй цагийг хөдөлмөрийн хөлсөнд шилжүүлэх гэх мэт судалгааны аргачлалаар гаргав. Үүнээс гадна хотын авто замын уулзваруудыг өргөтгөн шинэчилснээр агаарын бохирдол тодорхой хэмжээгээр буурах, иргэд зорчигчид бухамдах нь багасах гэх мэт байгаль орчин, нийгмийн олон талын ач холбогдолтой юм.