Өчигдөр НЗД-ын Зам тээвэр, дэд бүтэц хариуцсан орлогч Н.Гантөмөр тэргүүтэй нийслэлийн автозамын ачааллыг бууруулах ажлын хэсэг техникийн захуудыг нүүлгэх газар болон хотын баруун чиглэлийн зарим зам засварын ажилтай танилцлаа. Тэд энэ үеэр 22-ын товчооны 10.6 км замын ажлыг хоёр жил өнгөрөхөд одоог хүртэл дуусгаагүй “Бэрх зараа” компаний үйл ажиллагааг газар дээр нь очиж үзлээ.   Энэ компани тус замыг 2012 оны долдугаар сарын таванд ашиглалтад оруулахаар гэрээ байгуулж байжээ. Түүнээс хойш бүтэн жил өнгөрөхөд энэ замыг бүрэн дуусгаагүйгээр барахгүй  гэрэлтүүлэг, зүлэгжүүлэлт, явган хүний зам, хоёр үе асьпалтан хучилт хийлгүй орхисон байна.

Арга ядсан нийслэлийн удирдлагууд өнгөрсөн зуны наадмаар нийслэлээс төсөв гарган шороогоороо байсан замуудын суурь хучилтын ажлыг нэмж хийжээ. Саяхан энэ замыг дуусгахаар нийслэлийн төсвөөс хөрөнгө мөнгө гарган нийслэлийн үйлчилгээний “Улаанбаатар” компаниар хийлгүүлэх  шийдвэр гарахтай зэрэгцэн “Бэрх зараа” компани ажлаа дуусгах санал тавьсан байна. Тэд 15 хоногийн хугацаа өгөхийг хүссэн бөгөөд 10 дахь хоногтоо ирж ажлын явцтай танилцахад хэдэн нөхөөс л хийсэн байдалтай байгаа нь энэ юм. Хэрэв “Бэрх зараа” компани ажилаа бүрэн хийж дуусгахгүй бол тус компанийг шүүхэд өгөх тухай яригдаж байгаа аж.

Энэ замтай танилцах үеэр “Бэрх зараа” ХХК-ын захирал Ц.Бат-Эрдэнэ ирсэн бөгөөд маргаашнаас өнгө хучилтын ажилаа эхлэх гэж байгаа хугацаа өгөөч гэсэн юм.  Үүний хариуд Нийслэлийн Авто замын газрын дарга Д.Нанзаддорж “Одоо хугацаа маш богино байна. Аравдугаар сарын 15-н гэхэд асвальтаа тавьж дуусгана гэж сая Ц.Бат-Эрдэнэ захирал ярьлаа. Хотын орлогч даргын өгч байгаа үүргээр бол одоо энэ компанитай байгуулсан гэрээгээ цуцлаад, өөр компаниар замын ажлыг гүйцэтгүүл гэсэн тушаал өгч байна. Харин “Бэрх зараа” ХХК-ынхан маргаашнаас эхэлж тав хоногийн хугацаанд замын цоорхойг нөхөөд, ирэх сарын 15-ныг хүртэл аспальтаа тавина гэж амлаж байна. Тэгэхээр нэг сарын хугацаанд итгэл үзүүлээд дахиад харж үзье гэж бодож байна” гэлээ. Энэ асуудлаар бид “Бэрх зараа” ХХК-ийн захирал Ц.Бат-Эрдэнээс  дараах тодруулгыг авсан юм.

“Бэрх зараа” ХХК-ийн захирал Ц.Бат-Эрдэнэ:

-Өдийг хүртэл энэ ажил дуусаагүйн шалтгааныг тайлбарлаач?
-Үүнд  захиалагчдын тал, гүйцэтгэгчдийн тал аль аль нь буруутай. Өнөөдөр гүйцэтгэгч тал руу л бүх бурууг чихээд байгаа болохоос  үндсэндээ 2012 оны долдугаар сард бид замын ажлын зураг төслөө авч байгаа шүү дээ. Замын ажлын зургийн 40-өөд хувь нь өөрчлөгдсөн байгаа. Бас давагдашгүй хүчин зүйлүүд их гарсан. Нүүлгэн шилжүүлэлт, газар шилжүүлэлт гэх мэт асуудлаас болж хугацаа хоццорсон асуудал байгаа.
-Зураг төсөл яагаад өөрчлөгдсөн юм бэ?
-Зураг төслийг замын компаниудад бэлэн болгож өгөөд л бид шууд ажлаа эхлэх ёстой байдаг. Гэтэл захиалагч тал өнгөрсөн оны долоодугаар сард зураг төсөлд өөрчлөлт орлоо, тусгаарлах зурвас хийхээр боллоо гэх мэт асуудал тавьсан. Тэгэхээр бид 2012 оны долдугаар сард зураг төслөө хүлээж авсан гэсэн үг шүү дээ. Тэрнээс шууд 2011 онд гарч ирсэн зураг төсөл нь хэвээрээ байгаа юм биш.
-Танайх НЗДТГ-тай гэрээ байгуулж, бэлэн 6,7 тэрбум төгрөгийн санхүүжилт авсан гэж байна. Гэтэл ажил хийгдээгүй. Тэгвэл одоо энэ мөнгөн дүндээ таарсан зам засварын ажлыг бүгдийг хийж гүйцэтгэж, НЗДТГ-т хүлээлгэж өгнө биз дээ?
-Энэ нийт 10,6 км зам. Ямар ч байсан ирэх сарын 15-н гэхэд өнгөн асвальтаа тавиад бүх цагаан зураасуудаа хийгээд ажлаа дуусгана.  Маргаашнаас хучилтын ажлаа эхэлнэ. Энэ хавьд байсан 125 обьектийг Нийслэлийн газрын албатай ярьж байгаад нүүлгэн шилжүүлсэн. Уг нь газрын алба дангаараа газар чөлөөлөтийг гүйцэтгэх ёстой байдаг. Гэтэл манай энэ ажилд нь оролцсон.
-Санхүүжилтийн хувьд танай компани өөрсдөө мөнгө гаргана биз дээ. Нийслэлээс гэрээнд заасан мөнгөө танай компанид өгчихсөн юм байна шүү дээ?
-Бид нар өнгө, асьпалт хучилтаа хуччихаад НЗДТГ-т хандана. Энэ замын тендер шалгаруулалт 2006 онд болсон. Тэр үед нэг тонн асьпалт 128 мянган төгрөг байсан. Одоо 185 мянган төгрөг болчихсон. Бас түлш 1100 байсан бол 1700 гараад явчихсан. Энэ мэт зөрүүтэй асуудлаа хэлнэ гэж бодож байгаа.
-Ямар ч байсан ирэх сарын 15-нд энэ замыг ашиглалтад оруулж, хүлээлгэж өгнө гэж ойлгож болох нь ээ, амжих уу?
-Амжина аа.