НЗД-ын Зам тээвэр, дэд бүтэц хариуцсан орлогч Н.Гантөмөр тэргүүтэй Автозамын ачааллыг бууруулах ажлын хэсэг өчигдөр СХД-ын 32 дугаар хорооны нутаг дэвсгэрт байрлах алсдаа техникийн томоохон худалдааны төв болох газартай танилцлаа. Мөн тэд энэ үеэр хотын баруун чиглэл нисэх, 22-ын товчооны зарим зам засварын ажилтай танилцсан юм.

Ажлын хэсгийн хамгийн эхэнд “Атар өргөө”-гийн уулзвараас Яармагийн гүүр хүртэл 2,1 км автозамын засварын ажил байлаа. Энэ замын шинэчлэл эхлээд 20 гаруй хонож байгаа бөгөөд 10 хоногийн дараа зорчих хэсгээ бүрэн нээхээр төлөвлөжээ. Тус зам нь чиглэл тус бүрдээ гурван эгнээтэй 2,5 м-ийн өргөнтэй зам болон шинэчлэгдэж байгаа юм. Засварын ажлыг “Мон рөүд”, “Наранбулаг-хан”, “Рок пэйнт” гэсэн гурван компани хэсэгчлэн гүйцэтгэж байлаа. Сүүлийн үед нийслэлд тавигдаж байгаа автозамууд богино хугацаанд тавигдаж байгаа ч арчлалт муу байгаа нь эвдрэл гэмтэл ихээхэн гарахад нөлөөлж байгаа юм. Тиймээс зам арчлалтын ажлыг сайн хийж гүйцэтгэх хэрэгтэйг албаныхан онцолж байлаа.

Туслан гүйцэтгэгч компаниудтай хамтар гэв

Ажлын хэсгийн дараагийн очсон газар бол яармагийн гүүрнээс нисэхийн товчоо хүртэл 13,6 километр зам засварын ажил юм. Энд хятадын хөрөнгө оруулалттай “HKB” ХХК гүйцэтгэгчээр ажиллаж байгаа бөгөөд тэд техникийн нөхцлөөс шалтгаалан энэ жилдээ ашиглалтанд оруулах боломжгүй гэж байлаа. Өнгөрсөн жилээс эхэлсэн энэ замын ажлын ашиглалтанд өгөх хугацаа ирэх 10 дугаар сарын 15-нд дуусах юм байна. Энэ замыг хугацаанд нь ашиглалтанд оруулахын тулд туслан гүйцэтгэгч компаниудаар хэсэгчлэн гүйцэтгүүлэх асуудлыг хэлэлцэн шийдвэрлэхийг Нийслэлийн Засаг даргын Зам тээвэр, дэд бүтэц хариуцсан орлогч Н.Гантөмөр ажлын хэсэгт үүрэг болгосон юм.

Эхний ээлжинд 5 га газарт авто зогсоол барина

Нийслэлийн авто замын ачааллыг бууруулах ажлын хэсэг техникийн захуудыг хотын төвөөс нүүлгэн томоохон худалдааны төв барьж байгуулахаар ажиллаж байгаа. Энэ ажлыг НЗД дэмжиж газар олгосон бөгөөд тус худалдааны төвийг 22-ын товчооноос хоёр километрийн зайд байгуулахаар төлөвлөжээ.  Ажлын хэсэг өчигдөр тус газартай танилцсан юм. Энд 60 гаруй га талбайд худалдаа үйлчилгээ болон офиссын барилга, авто экспо төв байгуулах юм.

Мөн тус төвд олон улсын чанартай үзэсгэлэн яармаг худалдаа зохион байгуулах боломжтой байхаас гадна авто машины худалдаа, түрээсийн болон нарнаас эрчим хүч хураагчтай саравч бүхий задгай зогсоол, худалдан авагч нарт зориулан туршилт хийх хатуу хучилттай авто зам зэргийг төлөвлөөд байгаа аж.

2016 онд бүрэн ашиглалтад орох “Авто худалдааны цогцолбор”-ыг байгуулахдаа 22-ын товчооноос худалдааны төв хүртэл зам тавьж эхний ээлжинд 5 га газарт 2500 автомашины зогсоол барих юм. Цаашид бүрэн ашиглалтанд орохдоо 10 мянган автомашин байрлуулах хүчин чадалтай байх гэнэ. Тус цогцолборын зураг төсөл дараа долоо хоногт дуусах бөгөөд дараа жилээс энэ ажил эрчимтэй хийгдэж эхэлнэ гэдгийг албаныхан хэлж байлаа. Ажлын хэсэг автохудалдаа болон сэлбэг хэрэгсэл худалдаалдаг хөрөнгө оруулагчидтай уулзсан бөгөөд энэхүү автомашины худалдааны төв байгуулах ажлыг санал нэгтэй дэмжижээ. Эхний ээлжинд автомашин дараагаар нь техникийн худалдаа сэлбэгийн худалдааны газруудыг хотоос шилжүүлэх төлөвлөгөөтэй байгаа юм. Энд шилжүүлсэн автомашин худалдаа эрхлэгчдийн өмнө байсан газрыг өмчлөгчид нь хэрхэн ашиглахаа шийдэх юм байна. Харин Да хүрээ захын хувьд хотын суурьшлын бүсд багтдаг бөгөөд үүнийг төлөвлөгөөнийх нь дагуу ашиглана.