Нийслэлийн иргэдийг аюулгүй, баталгаатай тээврийн хэрэгслээр хурдан хугацаанд зорчих, цаг заваа хэмнэх нөхцөл бололцоогоор хангах зорилгоор “Стандартын шаардлага хангасан такси”-г ирэх сарын 1-ээс эхлэн нэгдүгээр эгнээгээр зорчуулахаар боллоо.

  Замын Цагдаагийн газрын хяналтын камерт бүртгэгдсэн такси үйлчилгээ эрхэлдэг 15 компанийн 579 такси нэгдүгээр эгнээргээр зорчих эрхтэй бөгөөд таксины өнгө үзэмж, стандартын шаардлагад нийслэлийн Тээврийн газар хяналт тавин ажиллана. Такси нэгдүгээр эгнээгээр зорчихдоо зогсоолын бус газар зогсож зорчигч буулгаж, суулгахгүй ба зөвхөн зориулалтын зогсоолд зогсож үйлчлэх юм. Шаардлагатай үед нэгдүгээр эгнээнээс баруун гар тал руу эргэн тээврийн хэрэгслийг зогсохыг хориглоогүй туслах зам, хороолол дунд зорчигчоо буулгаж замын хөдөлгөөний аюулгүй байдлыг хангаж хөдөлгөөнд оролцох аж.

 Өнөөдрийн байдлаар доорх газруудад таксины зогсоол байна.

• Улаанбаатар хотод 16-р хорооллын автобусны зогсоолын ард
• Сансарын ШТС-ын автобусны зогсоолын ард
• Судалт төв
• Барилгачдын талбай
• Бөмбөгөр худалдааны төв
• 4-р хороолол “Дүүхээ” төв
• 10-р хороолол туслах зам
•  “Цахилгаан тээвэр” компаний эсрэг талд
•  Центрпойнт /Голомт төв/, ТБД андууд /Хаан банкны урд/
• Капитронбанк /103-ын уулзварын урд/
•  Төв номын сангийн өмнө
•  Улаанбаатар их дэлгүүрийн хойд талын гээд нийт 13 зогсоол бүрэн ашиглалтанд орсон бөгөөд Төмөр замын дээд сургууль болон Цэргийн эмнэлгийн урд талбайд хоёр зогсоол нэмж барьж байна. Ирэх онд нийт 27 таксины зогсоолтой болохоор төлөвлөөд байгаа аж.