Замын цагдаагийн газар нь хошин урлагийн "Х ТҮЦ" продакшн, Майнд Вайд агентлагтай хамтран “Хайртай хүнийхээ төлөө хамгаалах бүсээ бүслэ" арга хэмжээг зохион байгуулан явуулах гэж байна. Энэхүү арга хэмжээг зохион явуулах болсон гол шалтгаан нь Монгол Улсын Замын хөдөлгөөний дүрмийн 2.1- д жолоочийн үүргийг дараах байдлаар тодорхойлжээ. “Хамгаалах бүсээр тоноглогдсон авто машин жолоодохдоо хамгаалах бүс хэрэглэх, хамгаалах бүс хэрэглээгүй зорчигч тээвэрлэхгүй байх” Мөн замын хөдөлгөөний дүрмийн 4.1-д зорчигчийн үүргийг зааж өгсөн байна. Зорчигч “Хамгаалах бүсээр тоноглогдсон авто машинаар зорчихдоо хамгаалах бүс хэрэглэх” гэж заасан байдаг. Гэтэл өнөөдөр Замын хөдөлгөөнд оролцож байгаа 100 жолоочийн 10 жолооч хамгаалах бүс зүүж хөдөлгөөнд оролцож байна. Гарч буй зам тээврийн осол хэрэгт өртөгсдийн 80 гаруй хувь нь хамгаалах бүс хэрэглээгүйгээс амь нас, эрүүл мэндээрээ хохирч байна. Замын хөдөлгөөнд оролцож байгаа иргэд заавал замын цагдаагийн алба хаагчаар шахуулж, шаардуулж, арга хэмжээ авагдаж байж хамгаалах бүсийг зүүж хэвших биш өөрсдийнхөө болон бусдын амь нас эрүүл мэндийг хамгаалах зорилгоор хамгаалах бүсийг хэрэглэж хэвших хэрэгтэй байна.

Хамгаалах бүсний ач холбогдол
-Герман, Франц, АНУ, Япон, ОХУ зэрэг улсуудад хийсэн судалгаанаас үзэхэд зам тээврийн ослын үед хамгаалах бүс хэрэглээгүй хүмүүсийн 86 хувь нь тархины доргилт авдаг бол хамгаалах бүс хэрэглэсэн үед дээрх тоо 21.6 хувь хүртэл буурдаг байна.

-Хамгаалах бүс хэрэглээгүй хүмүүсийн 32 хувь нь нуруу нугасны, 50-иас илүү хувь нь нүүрний болон толгойн гэмтэл, 53 хувийнх нь тархи доргихоос гадна хамрын болон эрүүний яс хугарч, дух нүүрний хэсэг зүсэгддэг болохыг мөн 90 км/цагийн хурдтай автомашин осолдоход хүн нас барах явдлыг 55-63 хувиар, толгой, цээжний гэмтлийг 60-85 хувиар, хавирганы хугаралыг 28 хувиар тус тус бууруулдаг болохыг тогтоосон байна.

Цөөн хүн амтай манай хот байтугай 10 гаруй сая хүн амтай хотын замын хөдөлгөөнд оролцогч жолооч , зорчигч нар нь хамгаалах бүсээ хэрэглэн замын хөдөлгөөндөө зөв соёлтой оролцоод болоод л байна. Хүн амын олноос болдог юм биш тухайн улсын иргэдийн соёл, хувь хүнээс ихээхэн хамаардаг төдийгүй хууль дүрмээ биелүүлж байгаа нь хамгийн чухал зүйл юм.