Улсын хэмжээнд үйл ажиллагаа явуулж буй эм, эмнэлгийн  хэрэгсэл, оношлуур, тоног төхөөрөмж, биологийн идэвхит бүтээгдэхүүн ханган нийлүүлэх 122 байгууллагын үйл ажиллагаанд хяналт, үнэлгээ хийв.

Уг хяналт үнэлгээг нийт 53 шалгуур үзүүлэлтээр  Эм хангамжийн байгууллагуудын нэгдсэн “Эм” холбоо, Иргэний хяналтын зөвлөл, Нийслэлийн хэрэглэгчдийн эрх ашгийг хамгаалах нийгэмлэгтэй хамтран хийжээ. Эм, эмнэлгийн хэрэгсэл ханган нийлүүлэх байгууллагуудын 77.6 хувь нь удирдлага зохион байгуулалт, чанарын хяналт, захиалга хүлээн авах, бэлтгэн нийлүүлэх үйл ажиллагаа, эм барааны хадгалалт, хамгаалалт, эм зүйн дэглэмийн мөрдөлтөөр  “Эм, эмнэлгийн хэрэгсэл ханган нийлүүлэх байгууллагад тавих нийтлэг шаардлага”-ыг хангажээ. Эмийг үйлдвэрлэгчийн заасан нөхцөл, сав баглаа боодолд хадгалаагүйгээс  хадгалалтын горим зөрчигдсөн, агуулахын багтаамж хүрэлцээгүйгээс эмийг стандартад заасан ангиллын дагуу төрөлжүүлэн хадгалаагүй, эмийн чанарын менежерийг орон тоогоор ажиллуулаагүй, эм зүйн дотоод хяналт хангалтгүй зэрэг  дутагдал  илэрсэн байна.
Монгол улсын стандартын шаардлагын 70-аас доош хувийг  хангаж байгаа буюу хангалтгүй үнэлгээ авсан 13 байгууллагын тусгай зөвшөөрлийг 3 сарын хугацаагаар түдгэлзүүлж,  тусгай зөвшөөрөлд заасан чиг үүргийн дагуу болон албан ёсны хаяг дээрээ үйл ажиллагаа явуулаагүй, тодорхой ажлын байргүй зэрэг зөрчилтэй 17 байгууллагын тусгай зөвшөөрлийг хүчингүй болгожээ.