Өчигдөр замын хөдөлгөөний удирдлагын төвөөс хийсэн мэдээлэл олон нийтийн анхаарлыг ихээхэн татлаа. Уг төвийн “баяртай” мэдээгээр бол яг нэг сарын хугацаанд нэгдүгээр эгнээнд тавьсан байсан 449 машиныг журамлаж 30 гаруй сая төгрөгийг төрийн санд төвлөрүүлжээ.

    Зарим эх сурвалжийн мэдээлж байгаагаар бол энэ жилийн улсын төсвийн тасралт бараг 10 хувьд хүрэхээр болсон. Тэгээд төсвийн цоорхойгоо нөхөхийн тулд Засгийн газар төрөл бүрийн арга зам хайж эхэлсэн. Ингэхийн тулд азын дугаарыг дуудлага худалдаанд оруулж, нийтийн зогсоолоос өндөр татвар авдаг болох тухай яригдаж эхэлсэн. Үүний нэг илрэл нь нэгдүгээр эгнээнд тавьсан машинуудыг ачиж төсөвт торгуулийг төвлөрүүлэх ажиллагаа бололтой. Хэдийгээр нэг талаасаа замын хөдөлгөөний бөглөрлийг бууруулах, аюулгүй байдлыг хангах, иргэдийн замын хөдөлгөөний ухамсар соёлыг дээшлүүлэх ач холбогдолтой гэж машин ачсан шалтгаанаа тайлбарлаж байгаа ч цаанаа төсөв бүрдүүлэхэд чиглэгдсэн болоод явчихав.

    Уг нь Улаанбаатарын замын түгжрэлийг багасгахын тулд Замын хөдөлгөөний удирдлагын төвөөс “Ачиж журамлах алба”-ыг 2013 оны 09 сарын 02-ноос эхлэн хэрэгжүүлж эхэлсэн. Энэ албыг ажиллуулахын тулд нилээд зардал чирэгдэл гаргасан. Юуны өмнө машин ачих зориулалттай хичнээн ширхэг машиныг ямар эх үүсвэрээр авсан бэ гэдэг ч тодорхойгүй байна. Гэхдээ байгуулагдаад ганцхан сар болохдоо 449 машин ачиж 30.034.700 төгрөгийг Төрийн санд төвлөрүүлж дөнгөжээ. Энэ “баатарлаг” үйл явдлаа Замын хөдөлгөөний удирдлагын төвийнхөн ихээхэн бахархан ярьж байна. Харин ард түмэн бухимдан хүлээж авав.

    Учир нь машин тавих дэд бүтэц, зогсоолын асуудлаа шийдвэрлэж чадаагүй байж албан байгууллагынхаа үүдэнд тавьсан машинуудыг хүчээр ачиж, мөнгө нэхэж түүгээрээ тасарсан төсөвөө нөхөх нь жирийн иргэдэд таалагдахгүй байна. Машинаа тавих гээд ч зогсоол олдохгүй байхад жирийн ард иргэдийн машиныг хүч түрэн хураах нь сайхан санаачилга биш л дээ. Эхлээд Улаанбаатартаа машины зогсоол хангалттай олныг байгуулчихаад дараа нь ийм арга хэмжээгээ хэрэгжүүлсэн бол хэн ч дургүйцэж бухимдахгүй. Харин ч машины эздийг буруушааж, төрийг зөвтгөхсөн.

    Үүний зэрэгцээ иргэд машин зөөдөг машины жолооч, ачигчдын харилцааны соёлыг гайхан шогширч байна. Дохио хангинуулан, цагаан хоолойгоор иргэдийг зам чөлөөлөхийг шаардаж давхина. Яг л цагдаа шиг. Цагдаа биш л баймаар санагдах юм гэсэн иргэдийн бухимдал өдөр бүрээр нэмэгдэж эхлэв.

    Энэ мэтээр замыг түгжирлийг хүчээр шийдвэрлэх гэвэл иргэдийн эсэргүүцэлтэй тулгарч мэдэхээр байна. Бас иргэдээс хурааж байгаа мөнгөөрөө төсвийн цоорхойг бүрдүүлнэ гэсэн мэдээлэл үнэн бол ихээхэн дуулиан дэгдээж мэднэ. Сар болгон 30 сая төгрөгийг төсөвт төвлөрүүлээд байвал жилд 360 гаруй буюу хоногт нэг сая төгрөгийг улсад хураах тооцоо гарч байна.