Монголын алтны салбарт тулгамдаад байгаа нөхцөл байдлыг Монголын Алт Үйлдвэрлэгчдийн Холбооны гишүүн байгууллагуудын төлөөлөл дараах үндсэн саналуудаар томьёолон гаргалаа. Үүнд:

Ашигт малтмалын хуулинд чөдөр болж, алтны салбарыг хүнд байдалд оруулсан “Урт нэртэй хууль”-ийн дагаж мөрдөх журамд өөрчлөлт оруулж улмаар өмнө нь лицензтэй байсан газруудыг үргэлжлүүлэн олборлолт хийх нөхцөл боломжоор хангах шаардлагатай байна. Ингэснээр Нэгт. Байгаль орчныг нөхөн сэргээх тодорхой эзэнтэй болж бодитоор нөхөн сэргээгдэнэ. Хоёрт. Аж ахуйн нэгж компаниуд нөөцөө бүрэн авч улмаар хохирлоосоо гарна. Гуравт. Ингэснээр төр засгийн нуруун дээрээс “Нөхөн олговор”-ын дарамтыг авч хаях ач холбогдолтой юм.

  Бид тооны үзүүлэлтээр бусад улс оронтой харьцуулахад бага татварын хувь хэмжээтэй боловч бодит амьдрал дээр манай улсын цаг агаарын онцлог, хүн ам, зах зээлийн хэмжээ, уламжлалт амьдралын хэв маягийг нарийн тооцож үзвэл харин ч татварын өндөр хувь хэмжээтэй улс орон билээ.

  Төрөөс тавьсан алтны татварын хувь хэмжээг бууруулж өнөөгийн зах зээл дээр үүссэн алтны хууль бус худалдааг зогсоосноор алтны үйлдвэрлэлт, борлуулалтын ил тод байдлыг хангах нэн чухал шаардлагатай байгаа билээ. Энэ нь Нэгт. Хулгайгаар гадагшаа гарч байгаа алтыг бүгдийг нь Монгол улсад бүртгэж, ингэснээр татварын тэр багахан зөрүүнээс илүү Монгол улсын Эрдэнэсийн Сан арвижих ач холбогдолтой юм. Хоёрт. Алт олборлогч компаниудад үүсээд байгаа татварын дарамтыг авч хаяснаар тэдэнд санхүү, эдийн засаг талаасаа том дэмжлэг болно.

  УИХ-ын чуулганаар орж байгаа эдгээр хуулийн төслүүдийг Монголын Алт Үйлдвэрлэгчдийн Холбооноос дэмжиж байна. Та бүхэн саналыг судлан үзэж, нааштайгаар шийдвэрлэнэ гэдэгт итгэлтэй байна.

  Бид цаашидаа улам бүр Монгол улсын Эрдэнэсийн Санг арвижуулж, ажлын байр нэмэгдүүлж, хариуцлагатай уул уурхайг хөгжүүлж, байгаль орчинг бодитоор нөхөн сэргээж, Монгол улсын эдийн засгийн өсөлтөд илүү ихээр хувь нэмрээ оруулж ажиллахад бэлэн байна.