Найман хувийн хүүтэй орон сууцны зээлийн эхний санхүүжилтэд зориулж Монголбанк 970 тэрбум төгрөг гаргасан. Тус хөтөлбөр хэрэгжсэн 50 хоногийн мэдээллээр нийт 976 тэрбум төгрөгийн зээл олгожээ. Монголбанк хоёр дахь санхүүжилтийн эх үүсвэр бэлэн болтол найман хувийн хүүтэй зээлийн санхүүжилтийг тасалдуулахгүй, шаардлагатай үед эх үүсвэрийг нэмэгдүүлэх боломжтой гэдгийг хэлсэн. Одоогоор 1.1 их наяд төгрөг болгон нэмэгдүүлжээ. Мөн найман хувийн хүүтэй зээлийн хоёр дахь шатны санхүүжилтийг босгох ажил эхэлсэн байна. Өөрөөр хэлбэл, Монголын ипотекийн корпорац /МИК/ арилжааны банкуудад байгаа 976 тэрбум төгрөгийн орон сууцны зээлийн багцыг худалдан авч олон улсын зах зээлдээр үнэт цаасжуулж хөрөнгө босгохоор болсон тухай мэдээллээ. Тус корпорац нь Малайзын “Am Investment” хөрөнгө оруулалтын томоохон банктай хамтран арилжааны банкуудын орон сууцны зээлийн багцыг худалдан авч олон улсын хөрөнгийн зэх зээл дээрх хөрөнгө оруулагчдад танилцуулж мөнгө босгох ажээ. “Am Investment” банк нь 2004 оноос хойш үл хөдлөх хөрөнгийг үнэт цаасжуулах чиглэлээр дагнан ажиллаж байгаа юм. Орон сууцны зээлийг багцаар МИК болон “Am Investment” банк энэ онд багтаан жилийн таван хувийн хүүтэй 200-250 тэрбум төгрөгийн анхны бондыг гаргахаар төлөвлөжээ.

Орон сууцны зээлийн багцын үнэт цаасыг хоёрдох зах зээл дээр гаргаснаар найман хувийн хүүтэй зээлийн санхүүжилтын тогтвортой байдлыг хангах бололцоотой гэж албаныхан үзсэн юм.

Бонд хөрөнгө оруулагчдад таван хувийн хүүтэй очих бөгөөд энэ маягаар найман хувийн хүүтэй зээлийн санхүүжилт босгох механизмыг бүрдүүлэхээр ажиллаж байгаа юм байна.