Монгол Улсын Нийслэлийн агаарын бохирдлыг бууруулах тухай хуулийн дагуу агаарын чанарыг сайжруулах бүс дэх гэр хорооллын айл өрхүүдэд цахилгааны үнийн урамшуулал олгох ажил энэ сараас эхэллээ.

 Агаарын бохирдолтой тэмцэхээр төрөөс авч хэрэгжүүлж буй цахилгааны үнийн урамшуулал олгох ажил гурав дахь жилдээ үргэлжилж байгаа бөгөөд БОНХ-ийн сайд, Нийслэлийн Засаг Даргын хамтарсан тушаал, захирамжийн дагуу энэ онд нийслэлийн 7 дүүргийн 108 хорооны 58657 айл өрх урамшуулалд хамрагдана.

 Цахилгааны үнийн урамшуулалд хамрах айл өрх нь нийслэлийн агаарын чанарыг сайжруулах бүсэд хамрагдсан байхаас гадна Нийслэлийн агаарын бохирдлыг бууруулах тухай хуулийн 6 дугаар зүйлд заасан нөхцөл шалгуурыг хангасан байх шаардлага тавьж буй. Мөн Нийслэлийн мэргэжлийн хяналтын газраар урамшуулал олгох нөхцөл шаардлагыг биелүүлсэн талаар дүгнэлтээ гаргуулсан байх шаардлагатай аж.


Баянгол дүүрэг -  7, 9, 10, 11, 16, 20, 21, 22, 23 хороод
Чингэлтэй - 7, 8, 9, 10, 11, 12, 13, 14, 15, 16, 17, 18, 19 хороод
Сүхбаатар - 9, 11, 12, 13, 14, 15, 16, 17, 18, 19, 20 хороод
Сонгинохайрхан - 1, 2, 3, 4, 5, 6, 7, 8, 9, 10, 11, 20, 21, 22, 23, 24, 25, 26, 27, 28, 30, 31, 32 хороод
Баянзүрх - 2, 4, 5, 8, 9, 10, 11, 12, 13, 14, 16, 17, 19, 20, 21, 22, 23, 24, 25, 27, 28 хороод
Хан-Уул - 2, 3, 4, 5, 6, 7, 8, 9, 10, 11, 12, 13, 14, 15, 16 хороод
Налайх - 1, 2, 3, 4, 5, 6, 7 хороод


6.1.1    Стандартын шаардлага хангасан дулаалгатай гэр, амины орон сууцтай,
6.1.2    Цахилгаан дамжуулах, түгээх сүлжээнд холбогдож стандартын шаардлага хангасан  цахилгаан халаагуур хэрэглэж байгаа,
6.1.3    Бүх төрлийн хийн түлшээр ажилладаг халаалттай,
6.1.4    Газрын гүнийн дулаан, нар салхины болон бусад сэргээгдэх эрчим хүчийг ашиглаж байгаа,
6.1.5    Стандартын шаардлага хангасан шахмал болон коксон түлш, сайжруулсан зуух, яндангийн шүүлтүүр хэрэглэж байгаа,
6.1.6    Байгаль орчинд ээлтэй эрчим хүчний хэмнэлттэй байшин, амины орон сууцтай,
6.1.7    Түлш хэмнэх замаар хүлэмжийн хийн ялгарлыг багасгаж, энэ чиглэлийн дотоод, гадаадын зуух, тусламж, төсөл хөтөлбөрт хамрагдсан
6.1.8    Бусад.


    Цахилгаан халаагуурт хэрэглэсэн цахилгааны үнийн урамшуулал: Нийслэлийн агаарын бохирдлыг бууруулах тухай хуулийн 6.1.2-д заасан цахилгаан халаагуур бүхий айл өрхийн сард шөнийн цагаар хэрэглэсэн 3000 кВт.ц хүртэлх хэрэглээний цахилгааны төлбөрийн 50 хувийг хөнгөлнө. Шөнийн тарифын мөрдөх хугацаа оройн 18:00 цагаас өглөөний 9.00 цаг хүртэл үргэлжилнэ.

    Нийт хэрэглэсэн цахилгааны үнийн урамшуулал: Нийслэлийн агаарын бохирдлыг бууруулах тухай хуулийн 6.1.2-оос бусад нөхцөл шалгуурыг хэрэглэгчийн ахуйн хэрэгцээнд сард хэрэглэсэн 200 кВт.ц цахилгааны төлбөрийн 50 хувийг хөнгөлнө.

Цахилгааны үнийн урамшуулалд хамрагдах айл өрх нь цахилгаанаар халаалтаа шийдсэн, нөхцөл шалгуурыг хангасан бол харьяа дүүргийн хэрэглэгчдэд үйлчлэх төвд урамшуулалд хамрагдах хүсэлтээ гаргана. Хэрэглэгчдэд үйлчлэх төв нь хүсэлт гаргасан айл өрхийг зохих шалгуур үзүүлэлтийг хангасан эсэхийг газар дээр нь шалгаж үзээд цахилгааны үнийн урамшуулалд хамруулахаар тодорхойлолт гаргана. Тодорхойлолтыг үндэслэн Агаарын чанарын алба, Нийслэлийн мэргэжлийн хяналтын газар дүгнэлт гаргана. Дүгнэлт гарсны дараа тухайн хэрэглэгч Хэрэглэгчдэд үйлчлэх төвд иргэний үнэмлэх, цахилгаан эрчим хүчээр хангах шинэчилсэн гэрээний дэвтэртэйгээ ирж “Цахилгааны үнийн урамшуулал олгох гэрээ” байгуулан урамшуулалд хамрагдана. 2012-2013 оны хүйтний улирлуудад цахилгааны үнийн урамшуулалд хамрагдаж байсан дээрх хороодын хэрэглэгчид дахин гэрээ байгуулах шаардлагагүй юм. Харин БОНХ-ийн сайд, Нийслэлийн Засаг Даргын хамтарсан 2013 оны А-13/А-30 тоот тушаал, захирамжийн дагуу хязгаарлалтын бүсэд хамрагдаагүй хороодын хэрэглэгчид урамшуулалд хамрагдах боломжгүй юм.