Томоохон компаниуд хуулийн цоорхойг ашиглаж иргэдийг хохироож байгаа тохиолдол гарах болсон. Үүний тод жишээ бол “Мобиком” корпарици юм. “Мобиком” корпорацид сэтгэл дундуур явдаг, тэднийд ашиглуулсан ард иргэд цөөнгүй. Тиймээс энэ корпораци үргэлж ямарваа нэг хэл амыг дагуулж явдаг гэхэд хэлсдэхгүй.

Өөрөөр хэлбэл үүрэн операторууд дотроос хамгийн нэр хүнд муутай, хүнд сурталтай газраар энднийх нэрлэгдэх нь дамжиггүй. Ямартаа ч “Мобиком”-ийнхны хууль бус үйлдлийг эсэргүүцсэн хүмүүсийн тэргүүн эгнээнд явж буй урлагийнхан  улам хүрээгээ тэлэх хандлагатай. Учир нь “Мобиком” корпорацитай заргалдаад буй гавьяат жүжигчин С.Жавхлангийн араас урлагийнхан нэгдэж хөдлөхөөр зэхэж буйг дуулгах нь зүйтэй болов уу.

 “Мобиком” урлагийнханы уран бүтээлийг өөрсдөдөө ашигтайгаар ашиглаж нэлээдгүй сая төгрөгөөр яригдах мөнгийг хуримтлуулсан байдаг. Тэгэхээр өөрийн уран бүтээлээ ашиглуулсан маш олон уран бүтээлчид өдгөө дуу хоолойгоо нэгтгэж, гомдол мэдүүлгээ өгөхөөр зэхэж байгаа юм.

Одоогоор “Мобиком”-той заргалдаад буй хэдхэн дуучдын жишээг дурдахад, гавьяат жүжигчин С.Жавхлан, дуучин Ц.Амарбаяр нарыг нэрлэж болно.

С.Жавхлангийн хувьд “Мобиком”-ыг шүүхэд өгсөн. Учир нь “Мобиком” түүний уран бүтээлийг гурван жил дамнан ашиглаж  300 орчим сая төгрөгийн орлого олсон нь тогтоогдсон байдаг. Үүнээс цэвэр ашиг нь л гэхэд 84 сая төгрөг болсон гэсэн. Тэгэхээр хүний оюуны өмчийг ингэж хулгайлж байгаа нь яалтачгүй тухайн уран бүтээлчийн эрхийг зөрчиж байгаа хэрэг юм. Уг нь бол хуулиндаа 28 саяас дээш төгрөгийн асуудалд их хэмжээний оюуны өмчийн хулгай гээд эрүүгийн хэрэг үүсдэг. Гэвч тухайн хэрэг дээр шинжээчийн дүгнэлт гараад асуудал шийдэгдэж байтал “Монгол контент” гэх компани гарч ирсэн гэдэг. Тэд “Мобиком” корпораци С.Жавхлангийн дууг хулгайлаагүй, манай компани ашигласан гэж мэдэгдэх болсон байна. “Монгол контент” С.Жавхлангийн дууг гэрээ байгуулахгүйгээр авч ашигласан үйлдэлдээ хоёр жилийн өмнө Оюуны өмчийн газраас захиргааны арга хэмжээ авахуулсан байдаг аж.  Тэгвэл өдгөө үүгээрээ далайж “Мобиком”-ыг хэргээс мултлах санаатай яваад байгааг С.Жавхлангийн өмгөөлөгч Ц.Монгол хэлж байлаа.

Дашрамд хэлэхэд, “Монгол контент” компанийг “Мобиком”-ын өмгөөлөгч, хуульчид нь төлөөлж байдаг гэнэ. Энэ нь хоёр компани гэж харагдаж байгаа  ч хэрэг дээрээ ашиг сонирхол нэгтэйг илтгэх юм.

Харин Ноён бондгор нэрээрээ нэртэй Ц.Амарбаяр "Мобиком"-ыг эсэргүүцэж бүр суулт зарлаж байсан. Тэрбээр "Гадаадын компани Монголд орж ирээд 10 гаруй жил луйвраар монополдож бидний бүтээлийг зөвшөөрөлгүй ашиглаж байгааг эсэргүүцэж байна" хэмээн "Мобиком"-ын өмнө суулт зарлаж хийж билээ.

Тэгэхээр ганц уран бүтээлчээс л ийм хэмжээний ашиг олоод өөрт нь ямар ч хувь ноогдуулахгүй явж байна гэхээр арай л шударга бус байгаа юм.