"Номтой нөхөрлөе" клубээс санаачилан зохион байгуулсан флашмоб, тайван жагсаал дөнгөж сая Чингисийн талбайд болж өнгөрлөө.

Тэд энэ жагсаалаараа архи согтууруулах ундаагаар үйлчилдэг баар цэнгээний газрууд олон байхад номын сангийн хүрэлцээ муу байгааг шүүмжилж байгаа юм.

Жагсаалд 200 гаруй залуус нэгдсэн бөгөөд өглөөний 10.00 цагт Нацагдоржийн нэрэмжит Нийслэлийн Төв номын Сангийн урд цугласан бөгөөд тэндээсээ Чингисийн /Сүхбаатарын/ талбайд ирж гучин минутын турш нэгэн зэрэг ном уншлаа.

"Номтой нөхөрлөе" клубын удирдах зөвлөлийн гишүүн н.Гэрэлчулуун “Улаанбаатар хотод байнгын үйл ажиллагаатай архи согтууруулах ундаагаар үйлчилдэг 10 мянга гаруй газар байдаг хэрнээ номын сан хоёр гуравхан байна. Гэтэл тэдгээр номын сангууд нь ч үйл ажиллагаагаа бүрэн гүйцэд явуулж чаддаггүй. Энэ бусармаг тогтолцоог халж өөрчлөхийг зорьж өнөөдөр үзэл бодлоо илэрхийлэн жагсаж байгаа юм. Бидний жагсаал юугаараа онцлог вэ гэхээр хүмүүс энд жагсаж байхдаа буун дуу гаргадаг, хараал хэлдэг, элдэв дохио зангаа "Салаавч" үзүүлдэг бол бид хамгийн оюунлаг энэрэнгүй, хүлцэнгүй, байдлаар жагсаж байгаа нь энэ. Бид төр засгийн удирдлагуудад хандаж бидэнд ном унших боломж олгож номын сан байгуулж өгөөч, баарны тоог бууруулж өгөөч гэж хүсч байна. Давхар миний зүгээс нэг зүйлийг залуустаа "Бааранд орохоо больё" уриалмаар байна. Бид бааранд орж архи дарс авч ууснаараа энэ буруу тогтолцоог өөхшүүлээд байна. Тийм учраас л баар рестораны тоо улам олон болоод байгаа юм. Өнөөдөр бааранд орохгүйгээр номын санд сууя. Бүр болдоггүй юм аа гэхэд ном аваад гэртээ уншья. Бааранд л орохоо больё. Тэгвэл ашиг орлоггүй болсон баарууд эхнээсээ хаагдаж эхэлнэ шүү дээ” гэв.