Энэ жил агаарын бохирдлыг бууруулах чиглэлээр Нийслэлийн агаарын чанарын албанаас ямар ажлуудыг авч хэрэгжүүлэх гэж байгааг тус албаны дэд дарга Х.Галымбекаас тодрууллаа. -Энэ жил танай алба агаарын бохирдлыг бууруулах чиглэлээр ямар ажлуудыг зохион байгуулахаар төлөвлөж байна вэ?
-2011 оны 6 сараас хойш Улаанбаатар хотын 128 мянга гаруй зуух түгээгдээд байна. Энэ жил 45 мянган ширхэг эрчим хүчний хэмнэлттэй зуух нэмж түгээнэ. Энэ ажлыг эрчимжүүлэх үүднээс зуухыг яг эзэн нь авч байна уу, үгүй юу гэдэгт хяналт шалгалт хийх төлөвлөгөө гаргаад ажиллаж байна. Түүний дагуу нийслэлийн мэргэжлийн хяналт дүүргүүдийн байгаль орчны асуудал хариуцсан мэргэжилтнүүдтэй хамтраад шалгалт явуулна. Энэ шалгалтаар зуухыг авсан хүмүүс нь ашиглаж байна уу гэдгийг шалгаад зогсохгүй дамлан худалдаалсан айл өрхүүдэд торгууль ноогдуулах юм. Үүнээс гадна “Дулааны хэмнэлттэй эрүүл орчинд амьдаръя” аяныг зохион байгуулах гэж байна. Ер нь энэ жил хийх гол зүйл бол иргэдэд агаарын бохирдлыг бууруулах үүднээс тараагдаж буй бүтээгдэхүүнүүдийг яаж зөв ашиглах вэ? яаж ашиглавал хэмнэлттэй вэ? гэдэг талаас нь иргэд рүүгээ чиглэсэн арга хэмжээг авах юм.
-Шалгалт хэзээнээс эхлэх вэ?
-Зуухны түгээлт өчигдөр эхэлсэн. Шалгалт ч мөн тун удахгүй эхлэнэ. Удирдамж нь гарчихсан. Энэ шалгалт нь өвлийн туршид явагдана. Түүнээс гадна зам дагуу байрлаж буй үйлдвэр худалдааны төвүүдэд шалгалт хийнэ. Ингэхдээ агаар ихээр бохирдуулах халаалтын эх үүсвэрүүдийг хэрэглэж байна уу, үгүй юу гэдгийг шалгах юм. Мөн тэдэнд эрчим хүчний хэмнэлттэй өөр төрлийн бүтээгдэхүүн хэрэглэх тухайлбал хийн халаагуур, цахилгаан халаагуур ч зэрэг бүтээгдэхүүнүүдийг хэрэглэх талаар зөвлөгөө өгнө. Энэ бол аж ахуй нэгжүүдэд хийгдэх ажил байгаа.
-Эрчим хүчний хэмнэлттэй зуухаа ашиглаагүй дамлан худалдсан айлууд тухайн зуухны үнийг 100 хувь төлнө гэдэг үнэн үү?
-Тиймээ 100 хувь төлүүлнэ. Энэ зуухыг иргэд 90 хувийн хөнгөлттэй үнээр худалдаж авсан байгаа. Хэрэв авчихаад дамлан худалдаалсан бол тухайн зуухны үнийг зуун хувь төлөх торгууль ноогдуулна.
-Дулаалгын аяны хүрээнд ямар үйл ажиллагааг зохион байгуулахаар төлөвлөж байна вэ?
-Энэ аян ирэх бямба гарагаас эхлэн нийслэлийн Багануур дүүргээс авахуулаад өдөр болгон нэг дүүрэгт зохион байгуулагдана. Дулаалгын өдөрлөгт төслүүдээр тараагдсан бүтээгдэхүүнийг зөв ашиглах, гэрээ хэрхэн дулаалах, яаж бага нүүрс түлэх вэ гэх зэргийг иргэдэд зааж сургах юм. Ер нь эрчим хүчний хэмнэлттэй зуухыг лаборторийн түвшинд туршаад үзэхээр агаарын бохирдлыг 90 орчим хувь бууруулахаар байгаа. Гэтэл зөв хэрэглээгүйн улмаас тэр хэмжээний бууралт ажиглагдахгүй л байна.
