“Капитал” банкийг тойрсон элдэв маргаан хүрээгээ тэлсээр байна. Олон арван ажилчдаа хохироож байгаа “Капитал” банкны удирдлагуудын хүнд суртлыг мэдэх хүмүүс байгаа ч амаа жимийж, чихээ тагалж, нүдээ анисаар өдийг хүрсэн. Гэвч энэ байгууллагын зөрчлүүд нэг нэгээрээ илэрвэл тэдний булхайг нийтэд илчлэх хүмүүс ч гарч ирсээр байхыг үгүйсгэхгүй юм.

“Капитал” банкны удирдлагууд гэв гэнэт л ажилчдаа мэдэрч ойлгож чаддаг хүмүүс болж  нийгмийнх нь  асуудлыг шийдэх нэрийдлээр 80 гаруй хүнд хөнгөлөлттэй зээлээр орон сууц өгсөн гэдэг.  Гэвч  жилийн дараагаас ажилчдаараа дамжуулж бизнес хийхээр улайрч эхэлсэн байгаа юм.  Учир нь  ам.метрийг сая 350 мянган төгрөгөөр тооцож орон сууцны зээлд хамруулсан хэрнээ  жилийн дараа  ажилчдынхаа барилгын компанитай байгуулсан гэрээг дур мэдэн цуцалж, орон сууцаа ам.метрийг нь 1.8 сая төгрөгөөр бодож худалдаж ав гэж шаарджээ. Үүнийг сонссон ямар ч иргэн гомдол мэдүүлэх нь аргагүй шүү дээ. Гэтэл гомдол мэдүүлсэн хүмүүсийг эхнээс нь халж улмаар янз бүрээр дарамт шахалт өгсөн байгаа юм.  Хэдийгээр тухайн иргэн банкинд ажиллаж байгаад хөнгөлөлттэй нөхцлөөр зээл авсан ч гэсэн захиалгын гэрээг өөрийн нэр дээр хийсэн. Тиймээс ч байрны гэрчилгээ нь  иргэний нэр дээр гарах нь ойлгомжтой. Гэрээнийхээ дагуу ч ажилчид мөнгөө төлсөөр ирсэн. Гэвч банкны удирдлагууд ажилчдынхаа өмчид халдсан ийм увайгүй үйлдэл гаргаж болох уу?

"Ажилчныхаа цахилгааныг салгаж сар тоггүй байлгажээ" Банкны удирдлагууд янз бүрийн аргаар зээлдэгч иргэдийг дарамтанд оруулж эхэллээ. Тодруулбал,  “Капитал” банкинд ажиллаж байгаад 2013 оны хоёрдугаар сард ажлаасаа гарсан Т.Ганчимэг гэх бүсгүй ажлаасаа гарахдаа орон сууцны зээлээ харилцагчийн нөхцөл рүү шилжүүлье, зөрүү мөнгө авна гэж байсныг нь өгье гэж хэлсэн байгаа юм. Улмаар зээлийн гэрээнд тусгагдсанаар бол ам.метр тутам дээр 150 мянган төгрөг нэмэгдсэн байсныг нь ч өгье гэдгээ хэлж нийтдээ 10 орчим сая төгрөг бэлнээр өгөөд, ажлаас гарсан өдрөөсөө эхлээд харилцагчийн нөхцөл рүү шилжих хүсэлтээ удаа дараа гүйцэтгэх захирал А.Ариунболд, зээлийн газрын захирал С.Дэлгэрцэцэг, тусгай активын мэргэжилтэн н.Баяраа нарт бичгээр өгсөн байдаг. Гэвч тун удалгүй удирдлагууд нь "ажлын тав хоногт багтааж байрнаасаа гар, наад орон сууц чинь манай өмч, тиймээс чөлөөл" гэсэн утгатай албан бичиг ирүүлсэн гэж байгаа. Ингээд төд удалгүй байрыг хариуцаж буй компанитай үгсэн хуйвалдаж цахилгааныг нь тасалж сар гаруй тоггүй байлгасан байдаг.   Ингээд хохирогч эмэгтэй   барилгын компанид нь болон “Капитал” банкинд  яаралтай цахилгаан залгаж өгөхийг шаардсан ч огт авч хэлэлцээгүй аж.  Тэгэхээр нь  мэргэжлийн хяналтын бай­гуул­лагад мэдэгдэж шалгуулахад Улсын комисс хүлээж аваагүй, оршин суугчийн цахилгааныг дур мэдэн тасалсан гэж үзэж тухайн барилгын компанид тодорхой хэмжээний акт тавьж, яаралтай тогийг нь залгаж өгчээ.

"Хэсэг хүмүүс явуулж хаалгыг нь эвдүүлэв" Харин хэдхэн хоногийн өмнө тус банкны С989 дүгээр салбар хариуцсан захирлаар ажиллаж байсан Г.Ойдовын гэр рүү дайрч, гэрийнх нь хаалгыг эвдсэн. Ингэхдээ банкны удирдлагууд хамгаалалтын ажилчдынхаа хамтаар дайрч, ийн хүч хэрэглэсэн байгаа юм. Тусгай активын албаны мэргэжилтэн Баяраа, төв салбарын захирал Б.Мөнхзул нараар ахлуулсан 5-6 хүн ирж, бусдын өмчид халдаж хаалга цоожийг нь эвдэлсэн байгаа юм.
Харин тэд энэ үйлдлээ “Банкны удирдлагын зүгээс өгсөн үүрэг даалгавар. Цоожны чинь голыг солино. Одоо чи байраа суллаж өг. Наадах чинь банкны зүгээс ажилчиддаа өгсөн орон сууц. Чи ажлаас гарсан учраас одоо авна” хэмээн тайлбарласан байдаг.  Энэ үеэр хохирогч цагдаа дуудаж. Цагдаа нар ирээд Прокурорын зөвшөөрөлгүй бусдын өмчид хууль бусаар халдлаа хэмээн зарим шаардлагыг тавьжээ.

“Капитал” банкны зүгээс үнэхээр хууль бус үйлдэл хийгээгүй бол албан ёсоор мэдэгдэж, хуулийн хүрээнд шийдэх ёстой. Гэвч өөрсдөө ийн дураарай авирлаж байгаа нь цаанаа өөр санаа зорилготойг илтгэж байгаа юм.

Одоогоор эхнээсээ хэл амгүйхэн байраа өгчихсөн, эсвэл зөрүү мөнгийг нэмээд банкинд тушаачихсан хүмүүс ч байгаа аж. Тухайлбал, Цэвэлмаа гэх эмэгтэйг жирэмсэн боллоо гэж ажлаас нь халсан төдийгүй байрыг нь хурааж авсан гэдгийг эх сурвалжууд баталж байгаа.

Капитал банкны удирдлагууд “Банк их хэмжээний зээл олгосон байна. Их хэмжээний зээл олгохдоо компанийн тухай хуульд заасан ТУЗ-өөс зөвшөөрөл авах ёстой. Зөвшөөрөл аваагүй учраас гэрээг хүчингүй болгосон.  Тэгээд ч тэр үед ажилласан жил нь хүрээгүй хүмүүс олон байсан. Тийм учраас буцааж авч байгаа юм” гэсэн тайлбар хийсэн байдаг. Энэ одоо юу гэсэн үг вэ?. Банкны удирдлагууд өөрсдийн буруутай үйлдлээ засахын тулд ажилчдаа золиосолж байгаа хэрэг үү?

Харин халсан ажилчиддаа   орон сууцны үнэ өссөн,  их хэмжээний орон сууцны зээл олгосон нь Монголбанкны зохистой харьцаа алдагдсан гэж тайлбарласан байдаг.


Өнгөрсөн хоёр жилийн хугацаанд “Капитал” банк “Шинэ дэлхий, “Би Энд Си”, “Катринг” гэсэн гурван компанид барилгын санхүүжилтийн зээл олгосон байдаг аж.  Тухайн үед барилгын компаниуд нь зээлээ аваад, барилгаа бариад явж байсан ч санхүүжилт нь багассан байгаа юм.

Улмаар  зээлээ эргэж төлж чадахгүй, хугацаа хэтрээд, чанаргүй болоод ирж байхад нь  Монгол банкнаас “Капитал” банкинд шалгалт хийхээр болжээ. Тиймээс их хэмжээний зээл чанаргүйдээд ирэхээр банкны зохистой харилцаа алдагдана  гэдгийг тооцоолж асуудлыг аргалахын тулд ажилчдаараа бамбай хийжээ. Барилгын зээлээ орон сууцны зээл болгож хувиргах арга зохиосон нь энэ. Тиймдээ ч байрны зээл авах сонирхолтой бүх хүнийг хамруулж, тэр ч битгий хэл дөнгөж ажилд ороод 2-3 сар болсон хүнд хүртэл боломж олгосон нь ийм учиртай байсан аж. Энэ бүхэн зээл авсан ажилчдын бичиг баримтаа бүрдүүлсэн байдлаас тов тодорхой харагдана гэдгийг хохирчихоод байгаа хүмүүс хэлж байна.

Ийм их зөрчилдөөнтэй асуудлыг тээсэн "Капитал" банкны ажилчдаа хохироож байгаа эл үйлдлийг хуулийн байгууллагынхан анхааралдаа авч иргэдийн гомдлыг дагуу шалгах хэрэгтэй байна. Иргэдийг хохироож, өөрсдийн хүлсээ гүйцэлдүүлэх гэж байгаа эл үйлдлийг нь ч бид эцсээ хүртэл олон нийтэд мэдээлэх болно.

Үргэлжлэл бий.