Монголын үйлдвэрчний эвлэлийн холбооноос цалин, тэтгэвэр, тэтгэмж нэмэгдүүлэх шаардлагыг Засгийн газар, УИХ-д хүргүүлж даруй хариу өгөхийг хүссэн. Мөн өчигдөр энэ асуудлаар УИХ дахь намын бүлгүүдэд санал хүргүүлсэн билээ.

Тэгвэл Засгийн газраас МҮЭХ-нд хариу ирүүлсэн байна. Харин хариу ирүүлэхдээ хэд хэдэн үндэслэлийг дурджээ. Тодруулбал цалинг нэмэхдээ индексжүүлнэ гэжээ. Үүнийг эсэргүүцсэн үйлдвэрчний эвлэлийнхэн өнөөдөр байр сууриа илэрхийллээ. Учир нь манай улсад цалин хөлсийг нэмэхдээ индексжүүлэх асуудал нь хуулиар зохицуулагдаагүй байдаг байна. Хууль эрх зүйн орчин нь бүрдээгүй учраас үүнийг дэмжихгүй гэдгээ тэд хэллээ. 

Хоёрдугаарт 2010, 2011 оны инфляцийн түвшинг харгалзаж үзэн цалинг нэмэхийг шаардсан ч ганцхан 2013 оны инфляцитай уялдуулан нэмж байна. Энэ мэт ярьсан тохирсноосоо өөр арга хэмжээг Засгийн газраас авах гэж байгаад үйлдвэрчний эвлэлийхэн эсэргүүцэж байгаа аж.

Энэ оны нэгдүгээр сарын 1-ны өдрөөс хойш өнөөдрийг хүртэл албан ёсоор цалин тэтгэвэр тэтгэмжийг нэг хувиар ч нэмэгдүүлээгүй. Тэгвэл энэ хугацаанд зарим бараа бүтээгдэхүүний 30-40 хувиар нэмэгдсэн байна. Тэгэхээр цалин хөлс, тэтгэвэр тэтгэмжийн нэмэгдлийн асуудал бараа бүтээгдэхүүн, ажил үйлчилгээний үнийн өсөлттэй холбоогүй байгааг харуулаад байгаа гэж МҮЭХ-ныхон хэлэв. Ер нь эдийн засгийн онолоор бодит худалдан авах чадвар нэмэгдвэл бараа бүтээгдэхүүний үнэ тариф эсрэгээрээ буурах ёстой. Гэтэл онолын эсрэг манай улсын эдийн засаг сүүлийн 20 гаруй жил зохицуулагдаж ирлээ. Энэ нөхцөл байдлыг бид зоригтойгоор халах ёстой. Цалин хөлс, тэтгэвэр тэтгэмжийг нэмэгдүүлбэл инфляцийн түвшин хөөрөгдөх нь гэсэн айдасаас болж бид ядуу амьдарч болохгүй гэдгийг ҮЭХ-ныхон сануулав.
 
Тодруулбал, Болвсрол, Эрүүл мэндийн салбарт ажиллаж байгаа ажилчид хоёр дахин илүү ачаалалтайгаар ажилладаг мөртлөө 300-600 мянган төгрөгийн цалин авдаг. Гадны оронд төрийн албан хаагчдын дундаж цалин 5000 доллар байна. Манайд 300 хүрэхгүй долларын цалин авдаг. Энэ мэт амьжиргаагаа ч хангаж чадахгүй байхад холбогдох байгууллагуудаас цалин нэмэхээс цааргалзаж байна. Засгийн газар бидний тавьсан шаардлагаас тэс өөр санал оруулж ирж цалинг нэмнэ гэж байгааг дэмжихгүй байна гэлээ.