Цагаан давааны хогийн цэгийн ойр орчмын айлуулын талаар бид өмнө сурвалжлага хүргэж байсан билээ. Тэгвэл энэ удаад ч мөн тус сэдвийг дахин хөндөж байна. Учир нь ойрын өдрүүдэд Цагаан давааны хогийн цэгийн утаа Алтан-Өлгийн айлуудыг сандаргаж эхэлсэн байна.

Улаанбаатар хотын хог хаягдлыг Улаанчулуут, Цагаан даваа гэх цөөхөн хэдэн хогийн цэгт хувааж хаядаг. Харин энд Цагаан давааны хогийн цэг Алтан-Өлгийн айлуудтай хаяа зэрэгцэн орших аж. Хогийн цэгийн урд, хойно, зүүн талд нь айлууд оршин суух бөгөөд шатаасан хогны утаа салхины урсгалаар туугдаж ирснээр эндхийн айлуудыг битүү утаанд бүрхүүлдэг байна. Утаанд хүмүүсийн хоолой хорсч, нүднээс нь нулимс гарч харшлын ханиад нь хөдөлж эхэлсэн аж. Сүүлийн өдрүүдэд амьсгалахад ч төвөгтэй байгаа тухай иргэд ярьж байна.  

    Хогийн цэгийн утаа, замын тоос шорооноос болж нялх хүүхдүүдийн хамар нь битүүрч шөнө ч унтаж чадахгүй байгаад ээжүүд сэтгэл их зовниж байгаа гэнэ.


Туяа: Алтан-Өлгийн айлууд жилийн дөрвөн улирал утаан дунд амьдарч байна

Тус 46-р гудамжинд оршин суугч Туяатай цөөн хором ярилцлаа.

-    Хогийн цэгийн утаа хэзээнээс ингэж идэвхжиж эхэлсэн бэ?

Энэ хавраас идэвхжиж эхэлсэн. Шатаасан хогний утаа аймар байна. Сүүлийн өдрүүдэд дүүрэн утаа өглөө, оройдоо гэрт орж ирдэг болсон. Салхигүй үед бол бүр их байдаг. Манайх энд суурьшаад 10 гаруй жил болж байна. Манайхыг буухаас өмнө энд хогийн цэг байгаагүй. Бууснаас хойш нилээн олон жилийн дараа Цагаан давааны хогийн цэг байгуулагдсан. Айлууд амьдарч байгааг нь мэдсээр байж энд хогийн цэг байгуулсанд гайхаж байна. Бид хогийн цэгний хажууд ирж буугаагүй. Харин хогийн цэгийг манай хаяанд байгуулчихлаа. Энэ бол иргэнээ боддоггүйн жишээ. Ядаж утаа саармагжуулах хэрэгсэл тавьмаар байгаа юм. Хогийг дахин ашиглах боловсруулах ажлыг хийж ядаж л ядуу хүмүүсийг ажилтай орлоготой болгомоор байгаа юм.

-    Энэ тухайгаа холбогдох хүмүүст хэлсэн үү?

-  Хэсгийн ахлагчаа ч танихгүй байна. Хэнд хэлэх ёстойгоо мэдэхгүй юм. Үүнийг бушуухан цэгцлэхгүй бол энэ хэвийн айлууд жилийн дөрвөн улирал утаан дунд амьдарч байна. 

Оршин суугч Т.Хулан: Захуудыг нүүлгэхийн оронд хогийн цэгээ цэгцлээсэй

-   Танай энэ хавь засмал замгүйгээс болж тоос шороо их босох юм. Бас Цагаан давааны хогийн цэгийн утаа айхтар харагдаж байна шүү?

-    Хэлээд юу гэх вэ?.  Цагаан давааны хогийг шатааснаас болж утаа нь энэ хавийн айлууд руу ирээд үнэхээр хэцүү байна. Эндээс их эвгүй үнэртэй утаа гардаг. Янз бүрийн хог шатаадаг болохоор хорт утаа л гардаг байх. Хүүхдээ ч салхилуулах боломжгүй байна. Засмал замгүйгээс болж шороо тоос бужигнасан их төвөгтэй амьдарч байхад энэ утаа бас аюулын харанга дэлдээд эхэллээ. Хогийн цэгийн утаа орой болохоор эндхийн айлуудыг нөмөрдөг. Захуудыг нүүлгэнэ гэж ярьж байгаа. Гэхдээ эхлээд хогийн цэгүүдийг цэгцлэх арга хэмжээг хотын удирдлагууд аваасай гэж хүсч байна.

42-р гудамжины оршиг суугч Д.Оюунгэрэл: Олигтой ч хувцас өмсөхийн арга алга

-    Цагаан давааны хогийн цэгийн утаа идэвхжих болсон гэж эндхийн иргэд ярьж байна. Та саналаа хэлнэ үү?

-    Цагаан давааны хогийн цэгийн утаа сүүлийн үед улам идэвхжих боллоо. Хотын хог их болж байгаагийн шинж байх. Алтан-Өлгий засмал замгүйгээс болж шороо их босдог. Дээрээс нь хогийн цэг рүү хог зөөх том машинуудын цуваа тасрахгүй. Тэгээд л энэ муу шороон зам чинь хүн явахын аргагүй болчихоод байна. Олигтой ч хувцас өмсөхийн арга алга. Хогийн цэгийн утаа бол үнэхээр хэцүү байна. Хогоо шатаангуут утаа нь айлууд руу ирдэг. Бид нар ганц зун утаагүй байя гэсэн ч байж болохгүй байна шүү дээ.