Улаанбаатар хотын замын түгжрэлийг шийдэхийн тулд захуудыг хотоос гаргана хэмээн мэдэгдээд байгаа. Энэ саналыг иргэд дэмжиж байгаа гэж нийслэлийн удирдлагууд мэдээлж байгаа ч захын наймаа эрхлэгчид болон захыг даган амьдарч байгаа олон мянган хүн эрх ашиг нь зөрчигдөж байна хэмээн үзэж байна. Захуудыг нүүлгэхдээ наймаачид болон эздийнх нь саналыг авахгүй, байр суурийг сонсоогүй аж. Энэ захууд тус бүр 500-5000 хүнийг ажлын байраар хангаж байгаа. Тиймээс энэ олон хүний хувь заяаг шийдэхэд нийслэлийн удирдлагууд хөнгөн хандаад байх шиг.
 
  Тухайлбал “Да хүрээ” захын 5000 ажилчны ихэнхи нь буюу 70 гаруй хувь нь энд худалдаа эрхлэхээр Баянзүрх дүүрэгт нүүн ирсэн байдаг аж. Энэ захаас хойш хөл хөдөлгөөнтэй газар гэвэл Шар хадны Сэтгэцийн эмнэлэг л байдаг. Тиймээс “Да хүрээ” захад ажилладаг 5000 хүн өглөө, оройд хотын замын хөдөлгөөнд оролцдоггүй байна. “Захуудыг хотын төвөөс гаргах нь зөв үү?” гэсэн санал асуулга хаа сайгүй явсан ч үүнд захын наймаачид тэр болгон саналаа өгч чаддаггүй. Тэдний ихэнхи нь интернет хэрэглэгчид биш байдаг. Харин эсрэгээрээ “захуудыг нүүлгэнэ гэснээс болоод хүмүүс тэртэй тэргүй явахын оронд татвар, патентаа төлөөд яах юм гэсэн байдлаар сөргөөр хандах болж зарим нь бүр хашааныхаа 0.7 га-гаа зах болгож ажлын байртайгаа эндээ үлдье гэсэн байдал гарч болзошгүй байна” гэж “Да хүрээ” захын захирал Ц.Алимаа ярилаа. Гэхдээ захын эзэд ингэж хотын зах руу нүүлгэхийг эрс эсэргүүцэхгүй байгаа ч бүгдийг нь биш шаардлагатай захуудыг л гаргах хэрэгтэй гэсэн байр суурьтай байгаа аж. “Барс” зах бол хотын ихэнхи жижиг дэлгүүрийг хүнсээр хангадаг. Хэрэв хотын зах руу гаргавал дэгүүрүүдийн өргөн хэрэглээний барааг татах зардал нэмэгдэнэ гэж үзэж байна. Энэ мэтээр нааш, цааш нь ялгах асуудал олон байгаа  бололтой. Хамгийн гол нь захуудыг ингэж хоморголон гаргах нь цаанаа хэн нэгний эрх ашигтай холбоотой гэх хардлага захын наймаа эрхлэгчдийн дунд байсаар байна. “Дүнжингарав”, 100 айл, “Хар хорин”, “Да Хүрээ”, “Барс”, Хангай”, “Марс”, “Баянзүрх” зэрэг захуудын хэдэн тэрбумаар үнэлэгдэх газар цаанаа аль хэдийн эзэнтэй болчихсон гэх явган яриа ч тасрахгүй байгаа юм. Ямартаа ч  захын удирдлагуудын байр суурийг хүргэе.

“Барс”-ын ерөнхий захирал Ч.Амарбаатар: Улаанбаатар хотын замын их түгжрэлийн эх үүсвэр нь зах, тэнд л наймаа шулаа яваад байна гэхээс биш зах, худалдааны төвүүд олон зуун хүнийг тэжээж байна гэж ер ойлгохгүй байна. Уг нь бол захуудыг зөвхөн хаах бус, зам, тээврийн ачаалал гэхээс гадна өөр шийдэх боломжууд олон байгаа. Гэтэл үүний оронд зөвшөөрөл рүү халдаад түүнийгээ сунгадаг байснаа сүүлдээ бүр өгөхөө болиод, асуудлыг тийм зөвшөөрөл байхгүй гэсэн утгаар тавьж байгаа. Тэгээд захыг хаачихсны дараа, үйл ажиллагаа нь зогсоочихсоны дараа компенсацийг нь (нөхөн төлөөс) хэн төлөх юм, тэнд ажиллаж байгаа түрээслэгчдийн хөрөнгө оруулалтыг яах юм гэдгийг ер бодолцохгүй байна. Захуудыг Улаанбаатарын гадна гаргаад нүүлгэлээ гэхэд тийшээгээ явж байгаа тээврийн зардлыг хэн хариуцах юм. Эргэж буцахтайгаа нийлээд бас л бөөн түгжрэл үүснэ шүү дээ. Бага орлоготой хүмүүс тэнд яаж хүрэх вэ, захуудыг нүүлгэж шилжүүллээ гэхэд тэр их эрэлт хэрэгцээ болгоныг супер маркетууд хангаж дийлэх үү гээд олон асуудал үүсч байна.
 
“Тэх барилгын худалдааны төвийн захирал С.Отгонтуяа: -Зах захуудын онцлог бий. Жишээ нь, манай модны захыг нүүлгэх юм уу хаалаа гэхэд хашаа хороогоор тарсан мод зардаг хүмүүсийн үйл ажиллагаа улам л цэцэглэнэ шүү дээ. Хууль бус, хулгайгаар мод бэлтгэж, зардаг нь ихэснэ. Одоо энэ бүхнийг цэгцлээгүй байж захуудыг яаж төвлөрүүлэх вэ. Тиймээс асуудлыг эхлээд бэлтгэлээ хангаж байж шийдэх ёстой байх.

 “Да Хүрээ трейд”-ийн захирал Ц.Алимаа: Эхлээд 22-ын товчооны тэнд 120 га газар төлөвлөчихсөн байгаа гэж мэдэгдсэн. Гэтэл өнөөдөр явсаар байтал твиттер, фейсвүүк, мэдээллийн хэрэгслээр нөгөө 120 га газар нь 70 га болж, тэгснээ өнөөдөр бүр “Нарантуул”-тай нь, “Да Хүрээ”-тэй нь нийлүүлээд нөгөө 22-ын товчоо биш бүр Хүй долоон худаг руу нүүлгэж шилжүүлнэ гэсэн мэдээлэл цацаж байх жишээтэй гэсэн юм.