Эрүүл мэндээ хамгаалуулахаар цалингаасаа төлсөн даатгалын хөрөнгийн ид шидийг үзэх нь ховор. Энэ нь ЭМД-ын тогтолцоо нь гажуудалтай байдгаас үүдэлтэй. Тэгвэл УИХ-ын гишүүн С.Ганбаатар, С. Эрдэнэ нар Иргэний эрүүл мэндийн даатгалын тухай хуулийн төслийг тус тусдаа боловсруулжээ. Уг хуулийн төслийн талаар өнөөдөр МҮЭХ-ны ерөнхийлагч Х.Амгаланбаатар мэдээлэл хийлээ. Удахгүй УИХ-аар уг хуулийн төслийг хэлэлцэж эхлэх гэж байгаатай холбогдуулан хоёр хуульд МҮЭ-ийн холбоо дүгнэлт хийн дараах заалтуудыг тусгуулахаар бэлтгэжээ. 

Үүнд:

1.    Эрүүл мэндийн даатгалын Үндэсний зөвлөлийн бүрэлдэхүүнд даатгуулагчийг төлөөлж гурван хүн орох ёстой. Гэхдээ Даатгуулагчийг төлөөлөх чадавх бүхий улсын хэмжээний бүтэцтэй, гурван талт улсын хэлэлцээрт орох эрхтэй ҮЭ-ийн 3 хүн байх шаардлагатай.

2.      ЭМД-ын байгууллага /газар/-ын удирдлагыг ЭМД-ын Үндэсний зөвлөлийн гишүүдийн олонхийн саналыг үндэслэн салбарын сайд нь томилдог байх. Ингэснээр ЭМД-ын байгууллага даатгуулагч иргэдийн төлөөлөл болж ажиллах, тэдний эрх ашгийг хамгаалж чадах юм.

3.    Даатгуулагчийн хэрэгцээт үйлчилгээ авах эрхийг баталгаажуулах. Энэ нь үйлчилгээг сонгох нөхцлийг бүрдүүлнэ гэсэн үг юм.

4.    Даатгуулагчийн эрх үүргийг хуулиар тодорхой болгох. /Чанартай, аюулгүй, тусламж үйлчилгээ хүртээмжтэй авах болон үйлчилгээний талаарх санал гомдлоо чөлөөтэй илэрхийлдэг байх боломж бүрдэнэ/.

5.    Эрүүл мэндийн болон даатгалын байгууллагаас шаардлагатай мэдээлэл авдаг байх.

6.    Төрөөс шимтгэлийг нь төлдөг хүүхэд, өндөр настны даатгалын шимтгэлийн орлого нь нийт орлогын 12 хувийг эзэлдэг байна. Гэвч эрүүл мэндийн тусламжийн үйлчилгээний 60 хувийг тэдэнд зарцуулдаг байна. Ажилтнууд 88 хувийн шимтгэл бүрдүүлдэг ч 40 хувийг л хүртдэг аж. Иймд шимтгэл төлөлтийн тэгш байдал /шударга/-ыг бий болгох, хэт ялгааг арилгах шаардлагатай.

Дээрх зургаан заалтыг хуулийн төсөлд нэмэж оруулахаар боловсруулсан байна. Уг хууль батлагдвал иргэд ЭМД-ийн ач холбогдлыг мэдэрч, чирэгдэл ачаалалгүй хөнгөлттэй үнээр эмнэлэгийн байгууллагаар үйлчлүүлнэ гэж байгаа юм.