Манай улсын ургац хураалт үндсэндээ дуусч байгаа. Тэгвэл энэ жилийн ургац хураалтын ерөнхий төлөв байдлыг Газар тариалангийн бодлогын хэрэгжилтыг зохицуулах газрын дарга Ц.Ренчингээгээс тодруулсан юм.

-Ургац хураалт дуусах шатандаа орсон байгаа. Тэгэхээр өнөөдрийн байдлаар хичнээн тонн ургац хураагаад байна вэ?
-Одоогийн байдлаар ургац хураалтын ажил 96 хувьтай явагдаж байна. Үүнээс төмс хүнсний ногоо, малын тэжээлийн ургац хураалт бүрэн дууссан, тосны ургамал буудайн хураалт хараахан дуусаагүй байгаа гэлээ. Тодруулбал өнөөдрийн байдлаар 351 тонн буудай, 368 мянган тонн үр тариа, 190 орчим мянган тонн төмс, 101 мянган тонн хүнсний ногоо, 37 мянган тонн тосны ургамал хураан аваад байна. Буудай хураалтын хувьд Увс, Завхан аймгуудын 5-6 га талбайгаас буудай хураан аваад үндсэндээ дуусна.

-Цаг агаарын байдал ургац хураалтад хэрхэн нөлөөлөв?
-Энэ жилийн хувь хур бороо элбэгтэй байлаа. Ургац хураалтын ид ажлын үе буюу ес, аравдугаар сард цаг агаарын гэнэтийн үзэгдэл хэд хэдэн удаа давтагдаж, бороо нойтон цас хоёр  ч удаа орсноос хаягдал, хорогдол  их гарсан байгаа. Энэ байдал цаашдаа ургац хураалтын эцсийн балансад нөлөөлж өнгөрсөн жилийнхээс буурах хандлагатай байгаа.

-Ургац хураалт хэзээ бүрэн дуусах вэ?
-Ойрын хоёр гурван өдрийн тодор ургац хураалт дуусна. 14 хоногийн дараа ургацын нэгдсэн баланс гарна.

 -Энэ жилийн хувьд буудайн чанар ямар байгаа вэ?
-Буудайн чанар энэ жил сайн гарсан. Өнгөрсөн жил дунджаар 18 орчим хувийн цавуулагтай байсан бол энэ жилийн буудай 20-оос дээш хувийн цавуулагтай байгаа. Өнгөрсөн жилээс чанартай гурил идэх боломж бүрдэнэ гэдгийг хэлмээр байна.  

-Цаг агаарын таагүй нөхцөл байдлын улмаас үтрэмийн ажил удаашрих хандлагатай байгаа. Энэ нь гурилын үнэд нөлөөлөх үү? Ер нь энэ жил гурилын үнэ тогтвортой байх уу?
-Үтрэмийн үйл ажиллагаа удааширснаар зардал мөнгө нэмэгдэж гурилын үнэд нөлөөлж болзошгүй. Ургац хураалтын нэгдсэн баланс гарсны дараа энэ жил гурилын үнэ нэмэгдэх эсэх нь тодорхой болно. Одоо байгаа үнээ ойрын саруудад барина.

-Жил бүр буудайн агуулах савны асуудал сөхөгддөг. Энэ жил хэр хүрэлцээтэй байгаа вэ?
-Агуулах хангалттай байгаа. Тариалан эрхлэгчдийг дэмжих сан энэ жил 36 мянган  тонны агуулах ашиглалтад оруулсан. Энэ санд л гэхэд 146 мянган тонны агуулах байдаг. Харин “Алтан тариа” компанид 136 мянган тонн буудай хадгалах хүчин чадалтай агуулах байгаа. Бусад компаниудад нийлээд 80 орчим мянган тонны агуулах байдаг.

-Тариаланчдын урамшуулал олгох ажил хэвийн явагдаж байгаа юу? Хэзээ олгож эхлэх вэ?
-Манайд хэрэгждэг журмын дагуу буюу ирэх сарын 15-ны дотор худалдан авсан буудайнхаа мэдээллийг бидэнд ирүүлж, 12 дугаар сарын 01-ний дотор хяналт шалгалт, боловсруулалтаа манай яамнаас хийдэг. Ингээд 12 дугаар сарын 05-ны дотор Засгийн газрын хуралдаанд материалаа өгдөг.