Улсын хэмжээнд үйл ажиллагаа явуулдаг нийтийн хоолны газруудад МХЕГ-аас шалгалт хийжээ. Шалгалтад хоол үйлдвэрлэл, үйлчилгээ эрхлэгч 472 газар хамрагдсан байна.  Уг газруудын 80 хувь нь барилга байгууламж нь мэргэжлийн байгууллагын  батлагдсан зураг төслийн дагуу баригдаагүй, агааржуулалтын системтэй боловч эдгээрийн 70 гаруй хувь нь бүрэн ажиллагаагүй байжээ.

Шалгалтаар илрүүлсэн зөрчил, дутагдал, шалтгаан

Шалгалтад хамрагдсан хоол үйлдвэрлэл, үйлчилгээний газруудад давхардсан тоогоор 2451 зөрчил дутагдал нийтлэг илэрсэн байна.

 Үүнд:

-Хоол үйлдвэрлэл, үйлчилгээний газруудын 30 хувь нь зориулалтын ажлын байргүйтэй холбоотой технологийн шат дамжлагыг буруу зохион байгуулан дам бохирдол үүсэх нөхцөл бүрдүүлж байсан байна.

-Шалгагдсан газруудын 40 хувь нь цэвэр, бохир усны системд холбогдоогүй, хоол үйлдвэрлэлийн байр нь халуун боловсруулалтын, бэлтгэлийн, угаалгын хэсгийг тус, тусад нь зохион байгуулаагүй, хүнсний бүтээгдэхүүн хадгалах зориулалтын агуулахгүй, бүх төрлийн хүнсний бүтээгдэхүүнийг нэг дор хамт хадгалж байжээ.

-Хоол үйлдвэрлэл, үйлчилгээ эрхлэж буй газруудын 70,0 хувьд агааржуулалтын систем шаардлага хангаагүй, зөрчил буураагүй байгаа.

- 147 газар хоолны дээжийг шаардлага хангаагүй нөхцөлд хадгалж байсан.

-Үзлэг шалгалтын явцад гал тогооны сав, багаж хэрэгсэл, ажиллагсадын гар, ажлын хувцас, хүнстэй харьцагч гадаргуу зэргээс авсан нийт 1164 арчдасын 300 сорьц буюу 25,7 хувьд нянгийн бохирдол илэрсэн, шинжилгээнд хамруулсан 238 нэрийн хүнсний түүхий эд, бүтээгдэхүүний 21 буюу 0,8 хувь чанар, аюулгүй байдлын шаардлага хангаагүй дүн гарч байгаа, Тухайлбал: Орхон аймаг 31 арчдас авч шинжлүүлэхэд 16 буюу 51,6 хувь, хүнсний бүтээгдэхүүн, түүхий эд, хоолноос 62 дээж авч шинжлүүлсний 13 буюу 20,9 хувь эерэг дүн гарсан байна.

-Хоол үйлдвэрлэлийн газар нь эрүүл ахуй, ариун цэврийн шаардлага хангаагүй, эмх цэгцгүй, их цэвэрлэгээ, өдөр тутмын цэвэрлэгээг шаардлагын хэмжээнд хийж тогтмолжоогүй, эрүүл ахуйн зохистой дадал хэвшээгүй байсан нь мөн илэрчээ.

- Халдварт өвчнөөр өвдсөн, өвчтэй хүн асарсан ажиллагсадыг эрүүл мэндийн урьдчилан сэргийлэх үзлэгт  хамруулж магадлагаа дүгнэлт гаргуулаагүй, бүртгэлжүүлээгүй нь хүнсээр дамжих халдвар, хордлогот өвчин тархах нөхцөл бүрдүүлж байгаа

- Шалгагдсан байгууллагын 32 хувь нь хортон шавьж мэрэгчдээс урьдчилан сэргийлэх халдваргүйтгэл, шавьжгүйтгэлийг мэргэжлийн байгууллагаар хийлгэдэггүй зэрэг зөрчлүүд илэрчээ.

Дээрх газруудад эрсдлийн үнэлгээ хийж мэргэжил, арга зүйн зөвлөгөө, албан шаардлагаар зөрчил арилгуулах үүрэг даалгавар өгсөн байна. Ингэснээр 315 хоолны газрын эрсдлийг бууруулан бага, дунд эрсдэлтэй ангилалд оруулсан байна. Хоол үйлдвэрлэлийн өрөөг технологийн урсгалын дагуу зөв зохион байгуулах шаардлагын дагуу нийт газруудын 70 хувьд засвар өргөтгөл хийлгэсэн байна. Шалгалтын явцад хоолны газруудад тамхи татахыг хориглосон тэмдэглэгээ байрлуулан, утаат тамхи татахгүй болсноор “Тамхины хяналтын тухай” хуулийг хэрэгжүүлэхээр болжээ.