Нийслэлийн эрүүл мэндийн газрын дарга С.Туулын шударга бус үйлдлийн талаар Наркологийн эмнэлгийн ерөнхий эмч Х.Хулан хэвлэлийн хурал хийлээ.

Тэрбээр “Би 2000 онд Наркологийн ерөнхий эмчийн ажилд томилогдоод 2012 оны 5 дугаар сарын 14 хүртэл энэ ажлыг хийж ирлээ. 2012 оны гуравдугаар сараас эхлээд НЭМГ-ын С.Туул дарга нь “чамтай үр дүнгийн гэрээ хийхгүй” гэдэг шаардлага тавьсан. Ямар учиртайг асуухад иргэдийн төрийн бус байгууллагаас таньд гомдол ирсэн. Иймээс таньтай би хамтарч ажиллахгүй, гэрээ хийхгүй” гэсэн.  Зөвхөн төрийн бус байгууллага гомдол ирүүлсэн гэдэг үндэслэлээр надтай хамтарч ажиллахгүй гэсэн. Тухайн үед би Нийгмийн бодлого хариуцаж байсан орлогч дарга Цогзолмаад албан бичиг хүргүүлсэн” гэв.

-Ямар учиртай бичиг явуулж байв?
-Төрийн байгууллагын удирдах ажилтныг халах, томилох асуудлыг ямар нэгэн олон нийтийн байгууллагын санаачилга, шахалтаар, хэсэг бүлэг хүмүүсийн хуйвалдаанаар зүй бусаар шийддэг болсон энэ үйлдэлтэй эвлэрч чадахгүй байна. Энэхүү хэрээс хэтэрсэн үйл ажиллагааг та анхааралдаа авч шийдвэрлэж өгнө үү гэсэн бичиг явуулж байсан. Ингээд байж байтал Төрийн бус байгууллагын тэргүүн маань надтай уулзая гэж утсаар ярьсан. Ингээд уулзахад “Та ажлаа өгчих. Таныг ажлаа өгвөл бид зөвлөх эмчээр ажиллуулна. Өгөхгүй бол хэвлэл мэдээллийн хэрэгслээр таныг гутаан доромжилж, нэр төрд чинь халдана гэсэн”. Ингээд нэг хэсэг Наркологийн эмнэлгийн дарга Х.Хулангийн хуйвалдаан гээд томоохон мэдээлэл, нийтлэлүүд гарч эхэлсэн. Улмаар хэвлэл мэдээллийн хэрэгслээр миний 80 хүрч байгаа эцэг, эх, үр хүүхэд гэр бүлийг доромжилсон.

-Таныг яг хэзээ ажлаас халлаа?
-2012 оны тавдугаар сарын 14-нд С.Туул дарга намайг ажлаас халсан. Ингээд би үүнийг зөвшөөрөөгүй. Би төрд 26 жил ажиллахдаа тэр тусмаа 13 жилийг нь эмнэлэгт ажиллаж өнгөрүүлэхдээ төрийн өмнө шударга ажилласнаа батлах гэж хууль хяналт шүүх цагдаагийн байгууллагаар явсан. Ингээд Х.Хулан гэдэг хүн бургуугүй ажилласан гэдэг шүүхийн зургаан бичиг надад байна. Өөрөөр хэлбэл, Чингэлтэй дүүргийн шүүх, дээд шүүхийн тогтоол зэрэг шүүхийн зургаан албан бичиг надад байна.

Гэвч тэд миний талд гарсан шүүх хурлуудыг үгүйсгэж өгөөч гэсэн хүсэлтийг Ерөнхий шүүгчид хүртэл тавьсан байдаг. Ингээд Ерөнхий шүүгч ч миний зөв гэдгийг баталсан. Дараа нь дахиад дээд шүүхийн хурлаар шинээр үүсэн нөхцөл байдлыг нягтлаад миний буруугүйг нотолсон зургаан бичиг байна.

-Таныг халагдсаны дараагаас энэ их шүүх хуралдаан, асуудал гарч ирсэн биз дээ?
-Үгүй. Намайг тавдугаар сарын 14-нд халсан байдаг. Гэвч маргааш нь буюу тавдугаар сарын 15-нд Прокурорын албан бичиг ирсэн байдаг. Тэгэхээр намайг халах гээд эртнээс шүүх цагдаагаар явсан байсан гэсэн үг.

-Прокурорын байгууллагаас хэний зөв гэсэн бэ?
2012 оны тавдугаар сарын 15, 2012 оны долдугаар сарын 10, 2012 оны наймдугаар сарын 23, 2012 оны 10 дугаар сарын 26, 2012 оны хоёрдугаар сарын 17, 2013 оны долдугаар сарын 25 гэх мэтээр жил зургаан сар намайг Монгол Улсад байж болох бүх шүүх, цагдаа, хяналтын байгууллагаар явуулж, шалгуулсан байдаг. Ингээд Прокурорын бичиг дээр намайг ажиллаж байх хугацаандаа үнэнч шударга байсан гэдгийг нотолж өгсөн. Ингээд 2013 оны аравдугаар сарын 1-нд эргэж би шүүхийн шийдвэр болох 1095-ын тогтоолоор ажилдаа томилогдсон.

-Тэгэхээр энэ сарын 1-нээс ажилдаа орчихсон гэсэн үг үү?
-Уг нь 10 сарын 1-нд ажилдаа ор гэсэн тушаал шүүхээс гаргасан. Гэтэл энэ өдрийн оройн 17.00 цагт комисс ирж надад ажил хүлээлгэж өгсөн. Тэгтэл маргааш нь буюу аравдугаар сарын 2-ны 3.30 минутад Нийслэлийн нийгмийн бодлого хариуцсан Энхцэнгэл даргын өрөөнд  намайг дуудсан. Ажлаа аваад зургаан цаг болж байхад намайг дуудаж “Та ёсзүйгүй ажилласан учраас та өргөдлөө өг. Та ажлаасаа халагд гэсэн”. Тэд угаасаа намайг шүүхийн шийдвэрийг биелүүлж ажилд томилчихоод хоёр хоногийн дараа буцааж халах төлөвлөгөөтэй байсан юм билээ.

-Та яаж мэдсэн бэ?
-Учир нь миний оронд томилох хүнээ аль хэдийнэ сонгосон байсан. Манай эмнэлгийн эмчид би чамайг Х.Хулангийн оронд томилно гээд хэлчихсэн байгаа юм. Тэгснээ хүний нөөцийн менежер, нярав хоёрыг Х.Хуланг халах учраас та нар ямар нэг бичиг данс юу ч гаргаж өгч болохгүй гээд одоо болтол ажилд нь ирүүлээгүй байна. Гэхдээ би энэ бүхний цаана юу байгааг мэдсэн.

-Юу байсан гэж?
-Эрүүл мэндийн чиглэлээр мэргэжлийн үйл ажиллагаа эрхлэх тусгай зөвшөөрлийн гэрчилгээг 2011 оны 12 сарын 26-нд өгсөн байдаг. Тэр тусгай зөвшөөрөлд “Эрүүл мэндийн чиглэлээр мэргэжлийн үйл ажиллагаа эрхлэх тусгай зөвшөөрөл. Огноо: 2011 оны 12 дугаар сарын 26. Байгууллагын эмнэлэг Наркологийн эмнэлэг. Дарга нь Нарамнбатын Дэмидмаа” гэсэн байна.  Тэгвэл Н.Дэмидмаа нь хэдийд ажилд томилогдсон гэхээр 2012 оны долоон сарын 10-нд ажилд томилох тухай тушаал гаргасан байдаг. Гэтэл энэ хүн  томилогдохоосоо долоон сарын өмнө манай Наркалогийн эмнэлгийн мэргэжлийн тусгай зөвшөөрлийг өөрийнхөө нэр дээр авсан байгаа юм. С.Туул дарга өнөөдөр маш олон тусгай зөвшөөрлийг өгдөг. Эм ханган нийлүүлэх газар, эмийн сан, эмнэлгүүд гэх мэтийн зөвшөөрлийг өгдөг. Гэтэл энэ хүн халагдахаас өмнөх долоон сарын дараа томилогсдон тусгай зөвшөөрлийг олгосон байгаа юм. Өнөөдөр нийслэлд байгаа тэр олон эмнэлгийн байгууллагуудад энэ мэт танил талаараа тусгай зөвшөөрөл өгдөг бол хэцүү л юм.

Ганцхан жишээ дурдахад л “Алтан элс” гэдэг хувийн эмнэлэгт хордлого гарч олон хүн өвчилсөн. Энэ баахан хордлогын шалтгаан бол “Алтан элс” хувийн эмнэлгийг зөвшөөрөл эрүүл мэндийн салбарынх биш буюу эмч биш хүнд олгогдсон байсан. Гэтэл энэ хэргийн дараа С.Туул дарга тусгай зөвшөөрлийг урж хаясан. Тэгээд дараа нь ахиад л хийчихдэг. Энэ бол түүний мэргэшсэн бусармаг арга.