Энэ удаа эмэгтэйчүүдийн зонхилон сонирходог асуултуудын хариуг мэргэжлийн эмч нараас  авч хүргэж байна.

-Бэлгийн харьцаанд орохгүй удахаар эрүүл мэндэд муугаар нөлөөлдөг гэж үнэн үү?
-Муу нөлөө огт байхгүй. Харин ч бэлгийн харьцаанд ордоггүй хүмүүсийг умайн хүзүүний хавдраар өвдөх эрсдэлгүй гэж дүгнэсэн байдаг.

-Дороосоо даарснаас болж кистатай болдог уу?
-Дороосоо даарснаас болж кистатай болдоггүй. Өндгөвчний уйланхайг киста гэдэг. Энэ уйланхай ихэнх тохиолдолд өндгөвчний дааврын хямралаас болж үүсдэг юм. Цөөхөн тохиолдолд үрэвслээс шалтгаалж үүсэх нь бий. Архаг үрэвсэл нь даарахаар сэдэрдэг учраас л даарснаас болсон гэж яриад байдаг. Уйланхайг юунаас болж өвчилснийг тогтоосны дараа эмчилгээ хийнэ. Хэрэв үрэвслээс болсон бол үрэвслийн эсрэг эмчилгээ хийлгэнэ. Даавраас үүдсэн үед дааврын эмчилгээг сонгоно.

-Сүүлийн үед цэвэршилт эрт явагдах тохиолдол олшроод байгаа. Шалтгаан нь яг юунд байна вэ?
-Сүүлийн үед зарим эмэгтэйчүүдэд эрт цэвэрших явдал ажиглагдаж байна. Эрт цэвэршилт нь олон шалтгаантай. Хамгийн гол шалтгаан нь стресс. Эмэгтэйчүүд стресс гэхээр буруу ойлгож би ямар ч асуудалд санаа зовдоггүй гэдэг. Сэтгэл хангалуун биш байхыг л стресс гээд байгаа юм. Амьдралдаа баяр баянсгалангүй, дандаа л болохгүй, бүтэхгүй гэж яриад байгаа нь өөрөө стресс болдог. Ер нь эмэгтэй хүн 45-55 насны хооронд цэвэршихийг хэвийн гэж үздэг.  45 наснаас өмнө цэвэршиж байгаа бол эрт, 55 наснаас хойш цэвэршиж байгаа бол хожуу цэвэршиж байна гэж ойлгох хэрэгтэй.  Хожуу цэвэрших нь хавдар үүсэхээс эхлээд янз бүрийн эрсдэлтэй. Эрт цэвэршээд байгаагийн шалтгаан нь стрессээс гадна даралт ихсэх өвчинтэй холбоотой. Мөн бодисын солилцооны янз бүрийн өвчин, цусан хангамж муудахтай холбоотойгоор эрт цэвэршдэг.

-Жирэмснээс хамгаалах эмийг хүүхэдтэй болохоосоо нэлээд хэдэн сарын өмнө зогсоохгүй бол урагт сөрөг нөлөөтэй гэх юм. Энэ үнэн үү?
-Цусанд байх нэг ширхэг эмийн даавар 26-28хан цагийн дараа байхгүй болж өндгөвчний үйл ажиллагаа сэргэдэг. Тиймээс эмээ уухгүй хэдэн сар завсарлаж байгаад жирэмслэх шаардлагагүй. Хэрвээ цусанд даавар агуулагдаж байгаа бол угаасаа жирэмслэхгүй.

-Сарын  тэмдэг маш их хэмжээгээр ирэх нь өвчний шинж үү?
-Ямар нэг өвчний шинж тэмдэг. Их цус гарах нь цус багадалтанд хүргэнэ.  Цусгүй эрхтэн гэж байхгүй учраас цус их гараад байвал элэг, бөөр, зүрх зэрэг эрхтнүүд муудна. Сарын тэмдэг их ирээд байгаа шалтгаанаа эмэгтэйчүүдийн эмчид үзүүлж, шижлүүлээд эмчлүүлэх хэрэгтэй. Цус багадалт сарын тэмдэг ирэх шалтгаан болдог. Учир нь цус багадалт нь цусны бүлэгнэлтийн өөрчлөлт болоод цус ихээр гарах шалтгаан болж байдаг.

-Хүүхэд хөхүүлж байхад жижрэмсэн болдоггүй гэж ярьдаг нь хэ үндэслэлтэй вэ?
-Хүүхдээ хөхүүлж байгаа үед жирэмсэлж болно. Гэхдээ хөхөнд сүү оруулж байгаа булчирхай, өндгөвчний даавар хоёр эсрэг  үйлчилгээтэй учраас хүүхэд хөхүүлж байхад өндгөн эс сар бүр боловсорч чаддаггүй. Харин зарим тохиолдолд боловсордог юм.

-Хүүхдээ 4-5 нас хүртэл нь хөхүүлдэг нь ээжүүдэд сөрөг нөлөө үзүүлдэг үү?
-Хүүхдээ зургаан сартайгаас нь нэг нас хүртэл нь хөхүүлж болно. Түүнээс хойш хөхний сүү ямар ч хэрэггүй гэж үздэг. Гадныхан төрснийхөө дараа хүүхдээ 3-9 сар л хөхүүлдэг. Манайхан дэндүү удаан хөхүүлдэг.  Хүүхдээ удаан хөхүүлэх нь эмэгтэйчүүд талдаа ч тийм сайн биш.