Хар тамхи, мансууруулах бодисоос иргэдийг хамгаалах нийгэмлэгээс өнөөдөр мэдээлэл хийлээ. Хэвлэлийн бага хурлын эхэнд тэд хар тамхи мансууруулах бодисын монгол дахь нөхцөл байдлын талаар товчхон мэдээлэл хүргэсэн юм.

Манай улсад сүүлийн жилүүдэд хар тамхи мансууруулах бодисын хэрэглээ жилээс жилд өсөн нэмэгдэж байна. Энэ талаар анхны судалгаа 1999 онд хийгдсэн бөгөөд 1000 өсвөр насны хүүхдүүдийн дунд хийсэн судалгааны үр дүнд 45 хүүхэд өвсний ургамал татаж хэрэглэдэг нь тогтоогдож байв. Түүнээс хойш энэ тоо тасралтгүй өссөөр өнөөдрийн байдлаар 561 хэрэглэгч  бүртгэгджээ. Нэг хэрэглэгчийн цаана 4 хүн байгаа гэж үздэг. Тиймээс 2000 мянга гаруй хэрэглэгч байгаа хэмээн үзэж болохоор байгаа аж. Харин өнгөрсөн онд Хууль зүйн яам, Дэлхий зөн монгол олон улсын байгууллагатай хамтран хийсэн судалгаагаар 16 мянга гаруй хэрэглэгч байна гэсэн дүн гарч байв. Хар тамхи мансууруулах бодисын хэрэглээ  1999 оноос хойш 10 дахин өссөн байгаа юм.  Үүнтэй холбоотойгоор хар тамхи мансууруулах бодистой холбоотой гэмт хэргийн тоо өсөн нэмэгдэж байгаа бөгөөд өнгөрсөн онд л гэхэд 38 хүн энэ төрлийн гэмт хэрэгт холбогдон ял шийтгүүлжээ. Түүнчлэн өнгөрсөн жилүүдэд Үндэстэн дамнасан хар тамхи мансууруулах бодисын гэмт хэрэгт 34 хүн холбогдож гадаад оронд ял шийтгүүлсэн байна. Тэдгээрээс хоёр хүн цаазлуулж, хоёр хүн бүх насаараа хорих ял, 15 хүн 15 жилийн ялаар тус тус шийтгүүлж байжээ.

Энэ төрлийн гэмт хэрэг өсч байгаа тухайд Хар тамхи, мансууруулах бодисоос иргэдийг хамгаалах нийгэмлэгийн тэргүүн Ш.Лхагвасүрэн “Манай оронд энэ талаар хууль байхгүй. Хар тамхи мансууруулах бодис сэтгэцэд нөлөөлөх эм бэлдмэлийн тухай хууль гарсан байгаа. Тэр нь эм талаа барьсан хууль болсон. Шинээр хууль гаргах ажлын хэсэг байгуулагдаад хоёр жил болж байгаа ч одоог хүртэл хууль гараагүй байна. Гэтэл хууль гарахын өмнө монголын Үндэсний аюулгүй байдал хүндхэн нөхцөл байдалд орчихлоо” гэв.

Үүнийхээ дараа тэд нийгэмлэгийнх нь үйл ажиллагаанд тулгамдаж буй зарим асуудлыг дэлгэсэн бөгөөд орон байргүй болох дээрээ тулжээ. Тэд Нийслэлийн ҮЭХ-ны байранд 10 м кв объект түрээслэдэг бөгөөд одоо тэндээсээ хөөгдөх болчихоод байгааг учирласан юм. Өнөөдрийн байдлаар тус нийгэмлэгт 110 хүн байнга үйлчлүүлж зөвлөгөө авдаг бөгөөд энэ байрандаа 13 жил болж байгаа аж. Тэд түрээслэгч болох Нийслэлийн ҮЭХ-ны удирдлагуудтай үл ойлголцсоны улмаас хөөгдөөд байгаа гэлээ.