Монгол Улсын Хүний эрхийн Үндэсний Комисс, УИХ-ын Хүний эрхийн дэд хороо, Хууль зүйн яам хамтран НҮБ-ын Хөгжлийн хөтөлбөрийн дэмжлэгтэйгээр "Эрүү шүүлтээс урьдчилан сэргийлэх хамтын ажиллагаа” сэдэвт уулзалт хэлэлцүүлгийг өнөөдөр Төрийн ордонд зохион байгуулна.Хэлэлцүүлэгт Авилгатай тэмцэх газар, Улсын мөрдөн байцаах газар, Тагнуулын ерөнхий газар, Улсын ерөнхий прокурорын дэргэдэх Мөрдөн байцаах алба, Шүүхийн шийдвэр гүйцэтгэх ерөнхий газар, Хүний эрхийн Үндэсний Комисс, НҮБ-ын Монгол Улс дахь Суурин төлөөлөгчийн газар, Хууль зүйн яам зэрэг байгууллагын төлөөлөл нийт 100 гаруй хүн оролцоно.
Монгол Улс нь Эрүүдэн шүүх болон бусад хэлбэрээр хэрцгий, хүнлэг бусаар буюу хүний нэр төрийг доромжлон харьцаж шийтгэхийн эсрэг НҮБ-ын конвенцид 2000 онд нэгдэн орж, олон улсын хамтын нийгэмлэгүүдийн өмнө үүрэг хүлээсэн билээ. Тэгвэл тус Конвенцийн нэмэлт Протоколд нэгдэн орох асуудлыг Монгол Улсын Засгийн газар өнгөрсөн сард УИХ-аар хэлэлцүүлж, гэрээнд нэгдэхээр гарын үсэг зураад байна.
Хүний эрхийн Үндэсний Комисс хүний халдашгүй дархан байх эрхийн ноцтой зөрчил болох эрүү шүүлтийг таслан зогсоох, эрх зүйн орчинг боловсронгуй болгох, цагдан хорих, эрүүлжүүлэх, баривчлах байр, хорих ангиудын нөхцлийг сайжруулахад дэмжлэг үзүүлж, хуулийн байгууллагын ажилтнуудын мэдлэг, ойлголтыг нэмэгдүүлэх, НҮБ-ын Эрүүдэн шүүхийн эсрэг хорооны зөвлөмжийг хэрэгжүүлэх чиглэлээр олон талт үйл ажиллагаа явуулж ирсэн бөгөөд "Эрүү шүүлтийг таслан зогсоох нь” Санамж бичгийг ЦЕГ, УМБГ, ТЕГ, АТГ, УЕПГ, ШШГЕГ-тай 2008 онд байгуулан 5 дахь жилдээ хамтран ажиллаж байгаа юм.
Хамтран ажилладаг төрийн болон иргэний нийгмийн байгууллагууд, олон улсын байгууллагын хүчин зүтгэлийн үр дүнд чамгүй дэвшилд хүрээд байгаа ч цаашид сайжруулах, боловсронгуй болгох асуудал ч бий. Тиймээс энэ удаагийн уулзалт хэлэлцүүлгээр Эрүү шүүлтээс ангид байх эрхийн төлөв байдалд анхаарал хандуулж, байгууллагууд "Санамж бичиг”-ийн хүрээнд Эрүү шүүлтээс урьдчилан сэргийлэх чиглэлээр хийсэн ажил, хүрсэн үр дүнгийн талаар мэдээлэл солилцохын зэрэгцээ Эрүү шүүлтээс урьдчилан сэргийлэх нийгэмлэгийн Европ, Төв Азийн бүсийн хөтөлбөрийн менежер Мэтью Принглийн "Эрүү шүүлтээс урьдчилан сэргийлэх үндэсний механизмын чиг үүрэг ба Олон улсын чиг хандлага” сэдэвт илтгэлийг сонсох юм.
Хэлэлцүүлгийн үр дүнд оролцогчдоос гаргасан саналыг үндэслэн 2014 онд хамтран ажиллах үйл ажиллагааны төлөвлөгөөг батална.
Дашрамд сонирхуулахад Эрүү шүүлтээс урьдчилан сэргийлэх нийгэмлэгийн Европ, Төв Азийн бүсийн хөтөлбөрийн менежер Мэтью Прингл, Хүний эрхийн Үндэсний Байгууллагын Ази номхон далайн бүс нутгийн чуулганы сургалтын менежер Сурайна Паша, Швейцарийн Холбооны улсын Эрүү шүүлтээс урьдчилан сэргийлэхҮндэсний механизмын мэргэжилтэн Марко Мона нар Монгол Улсын Хүний эрхийн Үндэсний Комиссын урилгаар 2013 оны 10 дугаар сарын 27-ноос 11 дүгээр сарын 2-ныг хүртэл манай улсад ажиллаж, эрүү шүүлтээс урьдчилан сэргийлэх асуудлаар ХЭҮК-ын ажилтнуудад сургалт зохион байгуулж, Сэтгэцийн эрүүл мэндийн үндэсний төв болон бусад байгууллагын төлөөлөлтэй уулзалт хийх юм.
