"1000 оюутны байр"-ыг ашиглалтад орохгүй удаж байгааг эсэргүүцэн оюутнууд жагсахаар болсон тухай мэдээлэл гарсны дагуу бид газар дээр нь очиж сурвалжиллаа. Биднийг очиход тус байрны бохирын шугамны бөглөрөөг гаргахаар хүмүүс ажиллаж байсан бөгөөд оюутнууд харагдахгүй байлаа. Удалгүй МОХ-ны хэвлэл мэдээллийн ажилтан н.Батжаргал тэргүүтэй хэсэг залуус ирсэн бөгөөд тэднээс дараах тайлбарыг авсан юм.

н.Батжаргал: Энэ ондоо багтаж ашиглалтанд орох эсэх нь тодорхойгүй байна

-1000 оюутны байр өдийг хүртэл ашиглалтад орохгүй байгаад МОХ ямар байр суурьтай байгаа вэ?
-Энэ байрыг хэзээ ашиглалтад орохыг бид өнгөрсөн хугацаанд байнга асууж сураглаж байсан. Оюутнууд ч энэ талаар биднээс их асуудаг. Мянган оюутны байр яг өнөөдрийн байдлаар улсын комисс хүлээж аваагүй нэг байр нь дулаанаа өгөөгүй байдалтай байна. Одоо ямар нэгэн дорвитой хариу өгөхгүй хэнд хариуцлага тооцох нь тодорхойгүй байна. Энэ байр БШУЯ барилга захилагчийн алба гүйцэтгэгч байгууллага хоёр уялдаж ажиллах ёстой. Ингэж байж энэ барилгыг улсын комисс хүлээн авч оюутнуудаа оруулна. Гүйцэтгэгч байгууллага Боловсролын яамны барилга захиалагчийн ажлын алба ажилаа хийх шаардлагатай гэж бид үзэж байна.

-Энэ талаар өнөөдөр оюутнууд эсэргүүцлээ илэрхийлнэ гэж байсан?
-МОХ-нд энэ байранд орох хүсэлтэй болон орохоор бүртгүүлсэн оюутнууд санал бодлоо илэрхийлж эхэлсэн байгаа. Тэдгээр оюутнууд хажуу өрөө түрээсийн байруудаар амьдарч байна. Бүр зарим нь подвол түрээслэн амьдарч байна. Өнөөдөр тэдгээр оюутнууд энд газар дээр нь ирж танилцана гэж бидэнд мэдээлсний үндсэн дээр бид ирсэн.

-10 сарын дундуур БШУЯ-ны барилга захиалагчийн ажилын албанаас тодруулахад өнөө маргаагүй улсын комиссд хүлээлгэж өгөх гээд бүх материалаа өгчихсөн гэж байсан?

-Боловсролын яам гэхээсээ илүү бид барилга захиалагчийн ажлын албатай ярих ёстой. Энэ байрны ашиглалтад орох хугацаа өнгөрсөн 9 дүгээр сарын 1, 10 дугаар сарын 1, аравдугаар сарын дундуур одоо бүр 12 сар болтол хойшлоод байна. Энэ байрыг гурван жил барьсан юм бол ядаж хугацаандаа өгөх ёстой. Үүнд аль аль байгууллага нь сэтгэл гаргаж ажилламаар байна. Ерөөсөө улсын комисс хүлээж аваад засч залруулах юм байвал хугацаатай үүрэг даалгавар өгчих хэрэгтэй. Одоогийн байдлаар улсын комисс ч ороогүй байна. Улсын комисс орлоо гэхэд 2-3 долоо хоног ажилладаг. Энэ байрыг 11 сарын 7-ноос эхэлнэ гэж байгаа. Гэтэл энэ сарын 7-нд улсын комисс шалгаж эхлэх юм бол 12 сараас наашгүй. Бараг энэ ондоо багтаж ашиглалтанд орж оюутнуудаа хүлээж авах эсэх нь тодорхойгүй болчихоод байна.

-Улсын комиссд хүлээлгэж өгөхгүй байгаа шалтгаан нь юу юм бэ?
-Шалтгааныг нь бид ч мэдэхгүй байна. Оюутнууд ч мэдэхгүй байна.  

1000 оюутны байранд орохоор бүртгүүлсэн Удирдлагын академийн оюутан Д.Мягмарсүрэн "Бид их удаан хүлээж байна"

-Бид сургууль дээрээ очоод бүртгүүлчихсэн байрандаа орох гээд их удаан хүлээж байна. Өнгөрсөн есдүгээр сард ашиглалтад орох ёстой байсан байр 11 сар гарчихаад байхад одоо болтол ашиглалтанд ороогүй. Ер нь олон оюутан хүлээлтийн байдалтай  байгаа. Тэд хотод хамаатан садныхнаараа дамжаад л явж байна. Тиймээс бид энэ асуудлыг хурдан шийдэж өгөөч, хурдан оюутнуудаа оруулаачээ шаардлагийг тавьж байгаа юм.

-Холбогдох газарт нь хэлж үзэв үү? Ямар хариу өгч байна?
-Улсын комисс нь хүлээж аваагүй байр нь ашиглалтанд орох болоогүй байна гэсэн мэдээлэл л өгсөн.

Тус байрны гүйцэтгэгч компаниудын нэг "Хөвсгөл геологи" компанийн ерөнхий инженер Ч.Оргил "Дулааны техникийн нөхцөл шийдэгдээгүй"

-Энэ байрны ашиглалтад орохгүй байгаа шалтгааныг тайлбарлахгүй юу?
-1000 оюутныг барихдаа анхнаасаа нэг барилгын хүчин чадлаар дулааны техникийн нөхцөл авчихсан. Энэ байр чинь 500, 500 оюутны хоёр байрнаас бүтэж байгаа шүү дээ.  Тэгээд одоо хүртэл дулаанаа авч чадаагүй байна.

-Цаашдаа хаанаас дулаанаа авах уу?
-Тэр шийдэгдээгүй байна. Яригдаад л явж байгаа. Тэгэхдээ тэргүй баригдчихсан барилга дээр дулааны шугам сүлжээ компаниас техникийн нөхцөл нэмээд  өгчихвөл  тэгээд л бол оо.

-Тэгэхээр энэ байрыг ашиглалтанд оруулахад дулааны асуудал дээр л гацчихаад байгаа гэж ойлгож болох уу?
-Одоо бол цахилгаан дулаан хоёр дээр л гацчихаад байгаа. Цахилгаан ч яахав. Бид шинээр баригдсан дэд станцаа хүлээгээд авчихсан.

-Барилга захиалагчийн ажлын алба дулааны асуудлыг нь шийдэж өгөх ажил хийж байгаа юу?
-Яам энэ асуудлыг хөөцөлдөж байгаа. Сая хүртэл би яаман дээр очоод ирлээ. Тэд дулаанаа хөөцөлдөөд явж байгаа. Анхнаасаа техникийн нөхцөл нь ингээд ганц барилгынхаар гарчихсан юм байна.  Дулааны шугам сүлжээ компанийн захирал гадаад явчихсан байгаа. Ирэхээр нь нөхцөл гаргуулчихъя гэсэн.

-Уг нь энэ дулааны асуудал хэзээ шийдэгдэх ёстой байсан юм бэ?
-Энэ чинь бүр барилгын зураг хийгдэж эхлэхээс л шийдэгдэх ёстой асуудал.