"Барс" худалдааны төвийн удирдлагын шийдвэрээр тус худалдааны төв дотор Голд стар кимчинээс бусад төрлийн кимчиг борлуулах, "НВЦ" ХХК, "Mon egg" ХХК- ийн өндөгнөөс бусад аж ахуй эрхлэгчийн өндгийг борлуулахыг хориглодог байсан байна.

Энэ нь кимчи үйлдвэрлэгч болон өндөг нийлүүлэгч бусад аж ахуй эрхлэгчийн бүтээгдэхүүн борлуулах эрхийг, зах заалд нэвтрэх боломжийг хязгаарлахад хүргэжээ. Тиймээс Барс худалдааны төвийн уг үйлдлийг хууль зөрчсөн гэж үзсэн Кимчи үйлдвэрлэгчдийн холбоо болон Шувууний аж ахуй эрхлэгчдийн холбооноос ШӨХТГ-т гомдол гаргасны дагуу  "Барс импэкс" ХХК-ийн Барс худалдааны төвийн үйл ажиллагаанд хяналт шалгалт хийсэн байна.
Тэгвэл шалгалтын талаар ШӨХТГ-ын мэргэжилтнээс асууж тодрууллаа.

-Аж ахуй эрхлэгчдийн бүтээгдэхүүн борлуулах эрхийг зөрчсөн болох нь шалгалтаар тогтоогдсон уу?

Хяналт шалгалтаар Барс худалдааны төв нь зөвхөн "Голд стар" кимчийг борлуулахыг зөвшөөрч бусад кимчи үйлдвэрлэгчийн кимчийг өөрийн худалдааны төвөөр борлуулахыг хориглож, мөн "НВЦ" ХХК, "Mon egg" ХХК компаний өндөгийг борлуулахыг зөвшөөрч бусад өндөг нийлүүлэгч аж ахуй эрхлэгчдийн бүтээгдэхүүнийг өөрийн худалдааны төвөөр борлуулахыг хязгаарлаж үндэслэлгүйгээр аж ахуйн харилцаа тогтоохоос татгалзсан, үндэслэлгүйгээр шалгуур үзүүлэлт тогтоосон зэрэг өрсөлдөөнийг хязгаарласан үйл ажиллагаа явуулсан болох нь нотлогдсон.

-Өөр ямар нэг зөрчил илэрсэн үү?

- Тус худалдааны төв нь Улсын болон Нийслэлийн мэргэжлийн хяналтын газрын харъяа итгэмжлэгдсэн лабораторуудын дүгнэлтийг үндэслэн гаргасан мэргэжпийн хяналтын улсын байцаагчийн дүгнэлт, зөвшөөрөл бүхий бүтээгдэхүүнийг "Барс БАГ Ложистик" ХХК- ийн "Барс-Хүнс" нэгдсэн лаборатороор дахин шинжлүүлж дүгнэлт гаргуулахыг шаардаж байгаа байдал нь аж ахуй эрхлэгчид үндэслэлгүйгээр шалгуур үзүүлэлт тогтоосон, төлбөр хураамж авсан    үйл ажиллагаа байсан. Тиймээс зөрчил гаргасан "Барс импэкс" ХХК-д зөрчлөө арилгах талаар  арга хэмжээг авч хэрэгжүүлэхийг улсын байцаагчийн албан шаардлагаар үүрэг болгосон.

-Ямар арга хэмжээ авахыг анхааруулсан бэ?

-  Хууль зөрчсөн үйл ажиллагаагаа таслан зогсоож үйлдвэрлэгч, нийлүүлэгч нараас борлуулалтын нэмэлт нөхцөл шаардахгүй байх,
-  Эрүүл ахуйн чанарын болон холбогдох стандарт шаардлага хангасан бүх төрлийн бараа бүтээгдэхүүнийг ямар нэг хязгаарлалтгүйгээр Барс худалдааны төвөөр борлуулуулах;
- Мэргэжлийн хяналтын улсын байцаагчийн дүгнэлтээр эрүүл ахуйн чанарын болон холбогдох стандарт шаардлага хангасан болох нь тогтоогтоогдсон бараа бүтээгдэхүүнд дахин лабораторын шинжилгээ хийлгэхийг тулган шаардахгүй байх;
-  Дээрх зөрчлөө арилгасан тухайгаа Барс худалдааны төвийн лангуу, агуулах болон бусад худалдааны чиглэлийн объект түрээслэгч, Кимчи үйлдвэрлэгчдийн холбоо, Шувууны аж ахуй эрхлэгчдийн холбоонд албан ёсоор мэдэгдэхийг анхааруулсан.

-Тэгвэл өдгөө зөрчлөө арилгасан уу?

-Барс худалдааны төвөөр эрүүл ахуйн чанарын болон холбогдох стандарт шаардлага хангасан бүх төрлийн бараа бүтээгдэхүүнийг ямар нэг хязгаарлалтгүй борлуулагддаг болсоноор бусад аж ахуйн нэгжүүдийн хувьд үйл ажиллагаагаа саадгүй явуулах, өрсөлдөх боломж бүрдсэнээс гадна хэрэглэгчдэд сонголттой бараа бүтээгдэхүүнээр үйлчлэх нөхцөл бүрдсэн.
Мэргэжлийн хяналтын улсын байцаагчийн дүгнэлтээр эрүүл ахуйн чанарын болон холбогдох стандарт шаардлага хангасан болох нь тогтоогдсон бараа бүтээгдэхүүнд дахин лабораторын шинжилгээ хийлгэхийг тулган шаардахаа больсон.