УИХ-ын Байгаль орчин, хүнс, хөдөө аж ахуйн байнгын хорооноос Газрын шинэтгэлийн Үндэсний хороо, Швейцарын хөгжлийн агентлагтай хамтран зохион байгуулж байгаа “Газрын ашиглалт ба хамгаалалт-салбар дундын зохицуулалт” сэдэвт уулзалт, зөвлөгөөн Төрийн ордонд эхэллээ.Уулзалт, зөвлөгөөнийг УИХ-ын Байгаль орчин, хүнс, хөдөө аж ахуйн байнгын хорооны дарга Г.Баярсайхан нээж хэлсэн үгэндээ, өнөөдөр дэлхий нийтэд газрын гаралтай болон бусад био бүтээгдэхүний хэрэгцээ эрс нэмэгдэж хүн амын хүнс, тэжээл, бусад хэрэглээг хангах асуудал хурацаар тавигдаж байгаа энэ үед манай орон ч мөн газрын ашиглалтыг сайжруулах, хамгаалах талаар газрын харилцаанд шинэчлэл хийх шаардлага зайлшгүй гарч байгааг онцлоод, энэ үүднээс газрын талаарх багц хуулийн төсөл боловсрогдон УИХ-ын Байгаль орчин, хүнс, хөдөө аж ахуйн байнгын хороогоор хэлэлцэгдэж байгааг тэмдэглэлээ. Мөн тэрээр манай улсын газрын нэгдмэл сангийн ангилал бүр нь байгаль орчны, хөдөө аж ахуйн, уул уурхайн гээд улс, орны бүхий л салбарын үйл ажиллагаатай шууд холбогдож байдгаараа аль нэг тодорхой салбарын газрын харилцааг хэрэгжүүлэх үүрэг хариуцлагыг нэмэгдүүлж байгааг тодорхой жишээн дээр тайлбарлав.
Энэхүү уулзалт, зөвлөгөөнд БХБЯ, ҮХААЯ, БОНХЯ, Уул уурхайн яам болон Ашигт малтмалын газар, Нийслэлийн газар, өмчийн харилцааны алба, ГХГЗЗГ, ШУТИС, ХААИС, эрдэмтэн, судлаачид, ТББ-ын төлөөлөл оролцож байна.
Зөвлөгөөний эхэнд “Газрын ашиглалт ба хамгаалалт-салбар дундын зохицуулалт” сэдвээр Газрын шинэтгэлийн Үндэсний хорооны ажлын албаны дарга Л.Ням илтгэл тавилаа. Газрын нэгдмэл сангийн зорилго нь газрын ашиглалт, хамгаалалтын удирдлага, зохион байгуулалтын үр ашгийг дээшлүүлэх явдал юм. Иймээс газрыг үндсэн зориулалтын дагуу ашиглуулах, хяналт тавьж ажиллах нь чухал гэдгийг тэрээр хэлж байсан. Мөн төрөөс газрын талаар баримтлах нэгдсэн бодлого стратеги байхгүй, удирдлагын бүтэц зохион байгуулалт сул, улядаа холбоогүй, газрын харилцаанд оролцогч байгууллагын чиг үүргийн зааг ялгаа тодорхойгүй, газар зохион байгуулалтын төлөвлөлт, хэрэгжүүлэлт сул, газрын бүртгэл, кадастрын нэгдсэн системгүй, газар ашиглалт, хамгаалалт, зохион байгуулалт менежмент байхгүй байгааг шүүмжилж, Галбын говьд уул уурхайн компани, говийн малчдын хооронд үүсч байгаа зөрчил маргааны талаарх бодит жишээг баримтаар дэлгэн үзүүлсэн юм. Түүнчлэн Дархан-Уул аймгийн Дархан сумын иргэд Сэлэнгэ аймгийн Сайхан сумын нутагт хөдөө аж ахуйн ангилалд хамаарах газар дээр суурин бий болгосноор газрын нэгдмэл сангийн ангиллын зориулалтыг зөрчиж байгаа ажээ. Цаашид газрын болон бусад хууль тогтоомжийн уялдаа холбоог зөв эрэмбэлэх, хуулийн болон мэргэжлийн хяналтыг сайжруулах, газрын үндсэн ангилал шилжүүлэх тухай хууль санаачлах, газар өмчлөх, эзэмших, ашиглах тухай эрх зүйн зохицуулалтын хүрээ, хязгаарыг зөв тодорхойлох арга хэмжээнүүдийг авч хэрэгжүүлэх шаардлагатай байгааг тэрээр онцоллоо.
Уг зөвлөгөөнд газрын нэгдмэл сангийн аль нэг ангиллын газарт явагдаж байгаа аливаа үйл ажиллагааг бодлогын болон технологийн түвшинд удирдан зохион байгуулж байгаа яам, салбараас тухайн ангиллын газрыг ашиглах, хамгаалах, нөхөн сэргээхтэй холбогдуулан авч байгаа арга хэмжээ, бусад ангиллын газартай үүссэн давхцал, маргаан, тулгарч байгаа хүндрэлийн талаар хэлэлцэж гарсан тодорхой саналууд Газрын тухай багц хуулийн төсөлд тусна гэж үзэж байгаа юм. Мөн зөвлөгөөний үр дүнг Монгол Улсын Ерөнхий сайдад танилцуулж цаашид авах арга хэмжээг тогтоох ажээ.
Уулзалт, зөвлөгөөн өнөөдөр үдээс хойш өндөрлөх бөгөөд “Монгол Улсад ҮОЗМДБ байгуулах, түүний удирдлага, зохион байгуулалт” сэдвээр ГХГЗЗГ-ын дарга А.Хүрэлшагай, Улсын газар зохион байгуулалтын ерөнхий төлөвлөгөөний тодотголын ажлын талаар “Газар дэлхий” ТББ-ын газар зохион байгуулагч К.Жигжидсүрэн, “Хөдөө аж ахуйн газрын ашиглалт, хамгаалалын өнөөгийн байдал” сэдвээр ҮХАА-н дэд сайд Ц.Туваан, “Ашигт малтмал хайх, ашиглах газрын сан-тулгамдсан асуудлууд” сэдвээр УУЯ-ын СБТГ-ын Геологийн бодлогын хэлтсийн дарга Б.Баатарцогт, “Зам харилцааны салбар дахь газрын ашиглалт, хамгаалалт” сэдвээр ЗТЯ-ын СБТГ-ын ахлах мэргэжилтэн Д.Гэрэлням, “ Бэлчээрийн экологийн чадавхид суурилсан мал аж ахуйн үйлдвэрлэлийг нэвтрүүлэх нь” сэдвээр Ногоон алт төслийн зохицуулагч Ц.Энх-Амгалан, “Газар, эд хөрөнгийн улсын бүртгэлийн үйл ажиллагааны өнөөгийн байдал, уялдааг хангахад шаардагдах арга хэмжээ” сэдвээр Монголын Мянганы сорилтын сангийн Хөрөнгийн Эрхийн төслийн мэргэжилтэн Ц.Дашзэвэг, “Кадастрын бүртгэлийн систем” сэдвээр Топмал ХХК-ны захирал Д.Баттогтох нар илтгэл тавьж хэлэлцүүлэх юм гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.
