Тус эмнэлэг нь дэлхийн хамгийн сүүлийн үеийн дэвшилтэт технологиудыг эмнэлэгтээ нэвтрүүлж байгаа бөгөөд үүний үр дүнд элэг бөөр болон ясны чөмөг шилжүүлэн суулгах зэрэг эмчилгээнүүдийг амжилттай хийж байгаа гэнэ.
Ерөнхий сайд Н.Алтанхуяг “Нэгдүгээр эмнэлэгт 4,3 тэрбум төгрөг шийдсэнээр хэд хэдэн ажлыг дэмжиж техник технологийн шинэчлэлүүдийг хийж байна. Нэгдүгээрт урьд хийгдэж байсан эрхтэн шилжүүлэн суулгах ажилбарыг улам боловсронгуй болгох ажлыг хөрөнгө мөнгөөр дэмжсэн. Хоёрдугаарт манай улс цусны өвчтэй хүмүүсээ эмчилж чадахгүй байсан. Энэ эмнэлэг удахгүй цусны чиглэлийн өвчнүүдийг эмчлээд байх боломж бүрдэж байгаа юм. Өөрсдийгөө зөвхөн монголдоо эмчилдэг болоход манай нэгдүгээр эмнэлэг тодорхой ажлуудыг хийж байна. Үүнийг хийж чадсан нэгдүгээр эмнэлэгийн эмч эмнэлэгийн ажилтнууддаа мөн энэ салбарыг толгойлж байгаа Н.Удвал сайддаа халуун баяр хүргье” гэсэн юм. Тэрээр үргэлжүүлэн тус эмнэлэгт нэвтрүүлсэн шинэ эмчилгээ, хагалгаа, үйлчилгээтэй танилцлаа.
Тус эмнэлэгт хийгдсэн гол техник технологийн шинэчлэлүүдийг дурдъя.
- 1975 оноос хойш хоёр ширхэг байсан бөөрний гемодиализ аппаратыг 30 болгон нэмэгдүүлсэн байна. Ингэснээр жилд дундажаар 18000 сеанс эмчилгээг 160 хүнд хийж 12-16 жил идэвхитэй ажиллаж, амьдрах боломжыг олгож эхэлжээ.
-Өнгөрсөн сараас эхлэн судсан дотуурхи мэс ажилбар буюу хүний бие махбодийн ямар ч эрхтэн системийн өвчин эмгэгийг зүрх, тархи, хэвлий, доод, дээд мөчдийн цусны судсаар дамжуулан тусгай сэтгүүр хэрэглэн оношлон, эмчилгээ хийдэг орчин үеийн дэвшилтэт технологийг нэвтрүүлж 40 гаруй ажилбарыг амжилттай хийжээ.
- Тус эмнэлэгийн клиник лаборатори нь молекул, генийн түвшинд, өвөрмөц нарийн шинжилгээнүүд болох эд нийцлийн цогц шинжилгээ, эмийн түвшин тогтоох, ясны хэмийн цитологи, цитохимийн урвал, элэгний вирусыг тоолох, клиник молекул биологи, цусны бүлэгнэлтийн факторууд, D-dimer, өвөрмөц уургууд, хавдрын, цус багадалтын, зүрхний шигдээсийн, ясны маркериуд, төрөл бүрийн гормонууд зэрэг 300- аад нэр төрлийн өвөрмөц нарийн шинжилгээг нэвтрүүлсэн байна. Мөн элэг, бөөр, цус төлжүүлэх үүдэл эс шилжүүлэн суулгах хагалгааны өмнөх болон дараах хяналтын шинжилгээнүүдийг хийдэг болжээ.
-Эмнэлгийн нэг чухал асуудал ариутгал тул сөрөг даралтат, тусгай зориулалтын орчинд GMP эмийн үйлдвэр төст орчин үеийн тоног төхөөрөмж плазм ариутгал анх удаа урсгал зохион байгуулалтыг цогцоор нь шийдсэн Герман улсын ЭССЭН эмнэлгийн загвараар Монголд анх удаа Евро стандартыг нэвтрүүлжээ.
-Цусны хавдрын орчин үеийн өндөр технологи ясны чөмөг шилжүүлэн суулгах эмчилгээг хийх эхний шатны ажил бэлэн болсон ба энэхүү өндөр технологийг материаллаг бааз хүний нөөцийн чадвартаа суурилан үүдэл эс шилжүүлэн суулгах эмчилгээг нэвтрүүлж эхлэх гэж байгаатай уялдуулан Олон улсын бүрэн вакуумжсан ISO-14644 болон АНУ-ын FED-STD 202D стандартад нийцсэн өрөө тасалгааг бэлэн болгосон байна.
-Үе мөч, нурууны эмгэгийг орчин үеийн эмчилгээний технологи 2011 оноос өндөр зэргэлэлээр иж бүрэн нутагшиж 400 гаруй үе шилжүүлэн суулгах хагалгааг амжилттай хийгээд байна.
-Өнөөдөр тус эмнэлэгт улаан хоолой, ходоод, бүдүүн гэдэсний хагалгааг дурангаар хийж, жилдээ 600 гаруй хүнд хагалгаа хийдэг болжээ.
-Эрхтэн шилжүүлэн суулгах хагалгааг анх 1996 онд бөөр шилжүүлэн суулгах хагалгаагаар эхэлсэн бөгөөд түр зогсонги байдалд байж байгаад 2005 оноос дахин орчин үеийн технологи ашиглан хийж эхэлжээ. Одоогоор 11 элэг, 73 бөөр шилжүүлэн суулгасан бөгөөд, хамгийн өндөр технологи болох цогцосноос донор эрхтэн шилжүүлэн суулгах хагалгааг хийж байгаа юм.
