МУИС-ийн Удирдах зөвлөл өнгөрсөн баасан гаригийн орой хуралдаж томоохон бүтцийн өөрчлөлтийг хийсэн. Тодруулбал, МУИС-ийн удирдлагууд салбар сургуулиудаа татан буулгаж, оронд нь дөрвөн том сургууль байгуулах талаар хэлэлцсэн байна. Хамгийн гол нь МУИС-ийн багш, ажилчдаас ямар нэгэн санал авалгүйгээр ийм шийдвэр гаргаж байгаад багш ажиллагсад нь эсэргүүцэж байгаа аж.

Хэрэв бүтцийн өөрчлөлт хийгдвэл Хуулийн сургууль, Байгаль, нийгэм хүмүүнлэгийн ухааны сургууль, Хэрэглээний шинжлэх ухааны сургууль, Бизнесийн сургууль гэсэн үндсэн дөрвөн сургуультай болох гэнэ.

Ингэхийн тулд дараах сургуулиудыг татан буулгах нь:


Математик Компьютерийн сургууль
Физик Электроникийн сургууль
Мэдээллийн Технологийн сургууль
Хими, Хими Инженерчлэлийн сургууль
Биологи, Биотехнологийн сургууль
Газарзүй, Геологийн сургууль
Монгол Хэл, Соёлын сургууль
Нийгмийн Шинжлэх Ухааны сургууль
Олон Улсын Харилцааны сургууль
Гадаад Хэл Соёлын сургууль

Тус шийдвэрийг эсэргүүцсэн Олон улсын харилцааны сургуулийн багш, оюутнууд хэвлэлийнхэнд хандлаа. Манай улсын Гадаад харилцааны яам болон бусад яам тамгын газар, төрийн байгууллагуудад томоохон алба хашиж байгаа хүмүүсийн 30 гаруй хувь нь МУИС-ийн Олон улсын харилцааны сургуулийг төгссөн гэдэг судалгаа байдаг байна. Сургалтын чанараараа Монголдоо толгой цохихоос гадна дэлхийнд хүлээн зөвшөөрөгдөг тус сургуулийг татан буулгах гэж байгаа нь хөгжлөөс хоцорсон шийдвэр юм гэж энэ сургуулийн багш нар хэлж байна.

Тэдний хэлж буйгаар тус сургуульд хүүхдүүд эртнээс бэлтгэж байж ордог аж. Бид ОУ-ын харилцааны сургуулийн дипломтой төгсөнө гэж энд суралцаж байгаа. Түүнээс биш бидэнд Бизнесийн сургуулийн диплом хэрэггүй гэж эндхийн оюутнууд хэлж байна.


Харин МУИС-ийн захирал А.Галтбаяр энэ талаар ямар тайлбар хийснийг хүргэе.

-    Та бүхний энэ шийдвэр ер нь хэр оновчтой шийдвэр вэ?

-    Өмнөх жил бид сургуулиудын дунд судалгаа хийсэн. Одоо удирдах зөвлөлийн шийдвэр гарсаны дараа багш, оюутнуудтайгаа хамтарч ажиллана.

-    Танай сургуулийн Олон улсын харилцааны сургуулийнхан эсэргүүцэж байгаагаа хэвлэлээр зарласан. Энэ мэтээр эсэргүүцэж байгаа олон хүн байна. Та энэ тал дээр ямар тайлбар хийх вэ? 

-    Манай Олон улсын харилцааны сургууль улсдаа маш сайн сургалттай сургуулиудын нэгд тооцогддог. Бидний энэ шийдвэр бол илүү чанартай, илүү сайн бүтэцтэй болгоход чиглэгдэж байгаа. Сүүлийн 20 жилийн Монгол улсын боловсролын системийг харвал сургууль болгонхамгийн их хэрэгцээтэй гэсэн мэргэжлүүдээр шинэ сургуулиудыг бий болгож явсан. Одоо оюутнуудын авч байгаа мэдлэгийг илүү өргө болгохын тулд сургуулийг томосгох ёстой гэж бодож байна. Нэгтом супермаркет байлаа гэхэд оюутан орж ирээд өөрийн сонголтоо хийдэг болно гэсэн үг.

-     ОУ-ын харилцааны сургуулийг төгссөн дипломтой оюутан гадны их, дээд сургууль суралцахаар очиход ийм сургууль байдаг юм уу гэж шалгадаг. Тэгэхээр энэ тохиолдолд ямар зохицуулалт хийх вэ?

-    Энэ бүтцийн өөрчлөлтөөр оюутнуудын сонгох хичээл болон дипломон дээр бичих нэрэнд ямар ч өөрчлөлт гарахгүй. Гаднаас манай сургуулийг шалгахад мэргэжил нь чухал юм.