"Оюу Толгой" компанийн Монголын талын ТУЗ-ийн гурван гишүүн болох “Эрдэнэс МГЛ” компанийн дэд захирал Г.Тэмүүлэн, “Эрдэнэс Оюутолгой” компанийн гүйцэтгэх захирал Д.Ганболд, Уул уурхайн яамны Стратеги, бодлого төлөвлөлтийн газрын дарга Ч.Отгочулуу нар өнгөрсөн есдүгээр сарын 23-27-ны хооронд Лондон хотод  Оюутолгойн асуудлаар хэлэлцээр хийгээд ирсэн билээ.

 Тэдний хэлсэнээр Лондонд болсон хэлэлцээр эерэг уур амьсгалтай, халуун дотно, бүтээлч, үр дүнтэй уулзалт болсон гэдэг. Тэд Лондонд нийт 15 асуудлыг шийдвэрлэсэн. Гэвч одоог хүртэл яг аль асуудлыг хэрхэн шийдвэрлэсэн нь тодорхойгүй, бүхэлдээ бүрхэг, тодорхой бус, нууцалсан байдалтай байгаа. Оюутолгой болон хөрөнгө оруулагч талын уулзалт Монголд үргэлжилж, үлдсэн 15 асуудлаа шийдвэрлэж, чадсан үгүйг Оюутолгойн ТУЗ-ийн гишүүн Ч.Отгочулуу ийнхүү ярьж байна. Түүний хэлж буйгаар Оюутолгой төслийн эхний үе шат нь амжилттай, хурдтай хэрэгжсэн шигээ цаашид далд уурхайн ажилдаа энэ эрч хүчийг хадгалж үзэх сонирхолтой байгаа гэнэ.

Тэд өмнө нь шийдвэрлэсэн 15 асуудал дээрээ нэмээд сая таваас долоон асуудлыг ойлголцоод зөвшилцсөн байна.

Дээрх таван асуудал нь усны, татварын урьдчилгаа төлбөр, зэс хайлуулах үйлдвэрийн төсөл гэх мэт асуудал байжээ. Тэрээр мөн Оюутолгой төсөл хэвийн үргэлжилж байгааг онцолсон байна. Цаашид хоёр тал бүтээн байгуулалтын ажлыг гацаанаас гаргаж, эрчимжүүлэх яриа хэлэлцээ үргэлжилж байгаа аж.

Одоогоор ил уурхай болон баяжуулах үйлдвэр ашиглалтанд орчихсон, бүтээгдэхүүнээ үйлдвэрлэж байгаа бөгөөд олон улсын хөрөнгийн зах зээл сэргээд ирвэл далд уурхайн санхүүжилт ч нааштай болно. Монголын талын ТУЗ-ийн гишүүдийн зүгээс анхны хөрөнгө оруулалт хэтэрсэн шалтгаан, үүнээс болж монголчуудын эзэмшлийн 34 хувь буурах, түүндээ таарах ашиг хүртэж эхлэх хугацаа хойшлох юм бишүү гэсэн асуудлыг нэлээд шаргуу тавьж байгаа аж. Тэгэхээр хамгийн чухал асуудал одоог хүртэл шийдвэрлэгдэж чадаагүй байгаа аж. Ч.Отгочулуугийн хэлж буйгаар энэ асуудал дээр хоёр талаас ажлын хэсэг гараад ажиллаж байгаа гэнэ. Гэхдээ хэзээ хариу нь гарах нь тодорхойгүй байгаа юм.

Далд уурхайн хувьд цаашдаа олон улсын зах зээл сайжирвал нөхцөл боломж ч сайжирна. Энэ уурхайн санхүүжилтийн талаарх мэдээллийг одоохондоо хоёр тал хоёулаа нууцалж байгаа юм. Эх сурвалжийн хэлж буйгаар ирэх долоо хоногоос хоёр тал хамтдаа хэвлэлийн мэдэгдэл хийхээр болсон байна. Одоогоор хэлэлцээний ширээний ард суухдаа хоёр талдаа хэлэлцэн шийдвэрлэсний эцэст хэвлэл мэдээллээр ил тод зарлана гэж тохиролцсон учраас илүү дэлгэрэнгүй мэдээлэл өгөх боломжгүй байгаа гэнэ.