“Ceylonta” гэх Шри-Ланка ресторан манай улсад үйл ажиллагаа явуулаад нэг жил гаруй болж байгаа юм байна. Тэнд монгол, энэтхэг улсын янз бүрийн л иргэд үйлчлүүлдэг байна. Тэгвэл энэ ресторанаар үйлчлүүлсэн нэгэн уншигч манай сайтад гомдол мэдээллээ. Тодруулбал, энэ газар нь үйлчилгээнийхээ төлбөр дээр үйлчлүүлэгчээс НӨАТ гэж 10 хувийн төлбөр авдаг аж. Өөрөөр хэлбэл тус ресторанд 20 мянган төгрөгний хоол идсэн иргэн тооцоогоо хийхэд биллэн дээр нь 10 хувийг нэмж тооцдог байна. Учрыг нь лавлахад манайх авсан үйлчилгээнийхээ тооцоон дээр 10 хувийг нэмж авдаг гэсэн тайлбарыг өгчээ. Тэгэхээр энэхүү ресторанаас хэдэн төгрөгний ч хоол, ундаа, архи пиво авсан бай тухайн иргэн авсан зүйлийнхээ төлбөр дээрээ 10 хувийг нэмж өгдөг гэсэн үг.
Тэгвэл энэ үйлдэл нь хэрэглэгчдийн эрх ашгийг зөрчсөн эсэхийг ШӨХТГ-ын  Хэрэглэгчийн эрхийг хамгаалах хэлтсийн дарга Ч.Батбаатараас тодруулахад, “Яахын аргагүй хэрэглэгчийн эрх ашгийг зөрчсөн үйлдэл. Үйлчлүүлэгч ямар ч газраар үйлчлүүлэхдээ биллэн дээр байгаа үнэ төлбөрийг л өгөх ёстой. Гэтэл биллэн дээр тусгагдаагүй төлбөр нэмж өгөх нь хэрэглэгчийн эрхийг зөрчиж байгаа үйлдэл. Зарим газрууд НӨАТ нэрийдлээр хэрэглэгчдийг хохироож мөнгө нэмж авах буюу чиний хэлснээр 10 хувийг үйлчилгээний төлбөр дээр нь нэмдэг гэж сонссон. Энэ талаар манайд ч гомдол ирж байсан. Хэрэв тухайн газраа та бүхэн баттай мэдэж байгаа бол бид хамтарч ажиллаж шалгалтыг хийе” гэсэн юм.

Тиймээс бид  “Ceylonta” гэх рестораныг зорьж ямар байр суурьтай байгааг нь сонслоо.

Бид менежер гэх бүсгүйд учир байдлыг хэлж, тодруулахад “Манайх ингэж 10 хувийн төлбөр авдаг нь зөв гэж хэлэхгүй. Хууль зөрчсөн үйлдэл мөн. Ямартаа ч дарга болон хариуцдаг хүн нь байхгүй учир би тодорхой зүйл ярих боломжгүй” гэсээр тус рестораны монгол захирал Н.Оджаргалын дугаарыг өгсөн юм.
Тус рестораны захирал Н.Оджаргал: НӨАТ-аа төлөхийн тулд 10 хувийг нэмж авдаг. Энэ бол хууль зөрчсөн зүйл биш

Ингээд бид Н.Оджаргалтай холбогдож нөхцөл байдлын талаар хэлж албаны тайлбарыг авлаа. “Тэрбээр манай ресторан нээгдээд жил гаруйн хугацаа өнгөрч байна. Тэгэхээр ямар байгууллага нээгдээд хэсэг хугацааны дараа НӨАТ гэж төлж явдаг юм байна. Бид түүнийг нь мэдэлгүй хямд үнээр хоолныхоо менюг гаргасан байсан. Тиймээс НӨАТ-аа төлөхийн тулд 10 хувийг нэмж авдаг. Ямар ч байсан энэ бол хууль зөрчсөн асуудал биш. Гэхдээ бид удахгүй биллэн дээрээ НӨАТ-ын 10 хувийн төлбөрийг нэмж оруулах болно” гэсэн тайлбарыг өглөө.

Тэгвэл бусад ресторанууд ийн НӨАТ-ын төлбөрийг үйлчлүүлэгчдээс нэмж авдаг эсэхийг зарим газраар орж лавлалаа.
“Century” рестораны менежер:Цэсэн дээрх үнэндээ НӨАТ, ашиг, зарлага гээд бүх зүйлээ шингээсэн байх ёстой
“Century” рестораны менежертэй уулзаж НӨАТ нэрийдлээр 10 хувийг үйлчлүүлэгчийнхээ төлбөр дээр нэмж авдаг эсэхийг  тодруулахад “Манайх огт тийм зүйл байхгүй. Учир нь энэхүү билл, менюг гаргахын тулд их олон талаас нь харж, цаашдын тогтвортой байдлыг ч тусгаж, тооцоолсны дүнд цэсээ боловсруулдаг. Тэгэхээр цэсэн дээр байгаа үнэнд бүх НӨАТ, ашиг, зарлага, тухайн хоолны материалны үнэ гээд л бүгд шингэсэн байдаг. Угаасаа НӨАТ гэж хэрэглэгчдээс авах боломжгүй. Цаад хуулиндаа ч тийм зүйл байхгүй. Ер нь Монгол үйл ажиллагаа явуулж буй паб, ресторанууд нэгдсэн сургалтанд хамрагддаг. Үүн дээр ч ийм зүйл байж болохгүй гэж заадаг” гэв.
"Модерн намодс" рестораны менежер: Ер нь ингэж 10 хувийг нэмж авдаг гэж сонсож ч байгаагүй юм байна
“Манайд НӨАТ гэж 10 хувийг авдаг зүйл байхгүй. Ер нь ингэж 10 хувийг нэмж авдаг гэж сонсож ч байгаагүй юм байна. Яахав хааяа зохиогддог ресторан, пабын менежерүүдийн сургалтанд энэ нь хууль зөрчиж буй үйлдэл гэж заадаг. Манай тарифанд бүх зүйл шингэсэн байгаа. НӨАТ гэдэг тухайн компанийн өөрсдийн хийх ажил” гэв.