Норм дүрмэндээ бол гурван хүн л суух ёстой сандал дээр дөрөв тавуулаа чихэлдэн суух үүрэг хүлээдэг ч сууж явахын сайхныг хэн бүхэн эдэлдэг болохоор би микро автобусаар үйлчлүүлэх дуртай. Автобусыг бодвол бууя гээд хэлэхэд хаана ч явж байсан буулгаж байгаа юм чинь.

Байнгын үйлчлүүлэгч миний нүдээр харахад “Микрочдын вант улс”-д хууль дүрэм гэж байхгүй. Үйлчлүүлэгчдээ булаалдан зодолдох жолооч кондукторууд оройн цагаар амандаа багтсан үнийг хэлчихээд шаардлага тавьсан нэгнийг түлхээд буулгачихдаг хууль дүрэм үйлчилдэггүй “аймар” бизнес. Хэрэгцээ шаардлагаараа хэдэн дүрэм журам батлагддаг ч тэр нь хэрэгждэг гэхэд үнэмшмээргүй. 

Уг нь микро автобусаар зорчих үнэ Нийслэлийн тээврийн газраас тогтоосноор 500 төгрөг. Тэр нь том оврын автобус зогссоноос хойш хэдэн буудал газар явахаасаа хамаарч 2-3 дахин нэмэгдэж дээд тал нь 1500 төгрөг болдог байна.

Нийслэлийн тээврийн газарт энэ талаар иргэдээс олон гомдол санал ирдэг бөгөөд сүүлдээ энэ газрынхан иргэдийн гомдолд дөжөрчихөөд байсан юм. Харин саяханаас Замын цагдаагийн газар, Нийслэлийн тээврийн газар, ШӨХТГ хамтран микроавтобусыг өдөр, шөнийн тарифтай болгохоор болж гэнэ. Энэ талаар өнөөх Нийслэлийн тээврийн газрын буухиа үйлчилгээ, такси зохицуулалт хариуцсан мэргэжилтэн Б.Ахалбек “Иргэдээс ирсэн гомдлын дагуу манай байгууллага Замын цагдаагийн газар, ШӨХТГ-тай хамтран шалгалт хийсэн. Шалгалтын үр дүнд зайнаас хамааран өдөр, шөнийн тариф тогтоох нь зөв гэсэн дүгнэлтэд хүрсэн. Энэ талаар одоо холбогдох байгууллагуудтай хэлэлцэж байна. Үнийн хувьд хэдээс хэдэн төгрөгийн хооронд байхыг шинээр мөрдөгдөх журмаар батлах байх” гэжээ.

За даа тэгэхээр монголчууд маань оройтсоныхоо торгуулийг хэдээр тогтоолгох бол оо гэсэн хүлээлттэй үлдэж шив. Багаар л тогтоогоосой билээ.