Цэцэрлэгийн хүүхдүүдийн хоолны хэмжээг багасгах тушаалыг Эрүүл мэндийн сайд Н.Удвал гаргажээ. Тодруулбал, Н.Удвал сайд хүнсний бүтээгдэхүүний аюулгүй байдлыг хангах тухай хуулийн зарим заалтын дагуу өнгөрсөн зургадугаар сард гаргасан тушаалдаа цэцэрлэгийн хүүхдүүдийн хоолны мах, жимс, цагаан идээ, ногоог багасгасан байна. Өөрөөр хэлбэл хүүхдүүдийн идэх хоолны махыг 32, ногоог 95, цагаан идээг 335, жимсийг 30 гр-аар багасгаж, будаа гурилан бүтээгдэхүүнийг 75 гр-аар нэмсэн байх юм. Энэ нь хоолны илчлэгт шууд нөлөөлж өмнө нь 1569.2 ккал илчлэгийг хоолноосоо авдаг байсан хүүхэд одоо 1100 ккал илчлэг авч байна гэсэн үг.

    Энэ нь 1-3 настуудын хувьд гарч буй ялгаа бөгөөд 4-6 настнууд хоолны илчлэг 670 ккал-оор багасчээ.

    Уг нь хүүхэд хоногт идэх хоолныхоо 75-80 хувийг цэцэрлэгт, үлдсэн эрдэс бодис, шим тэжээлийг гэрийнхээ хоолноос авах ёстой аж. Мөн “Хүн амын хоол тэжээлийн физиологийн норм”-д зааснаар 1-3 настай хүүхдийн эрэгтэй нь 1260, эмэгтэй нь 1200 ккл, 4-6 настай хүүхдийн эрэгтэй нь 1700, эмэгтэй нь 1600 ккл илчлэг хүнсээр авбал зохистой гэжээ. Гэтэл сая Эрүүл мэндийн сайдын тушаалаар дээрх насны хүүхдүүдийн хоолноос авах ккл даруй 500  багассан байгаа юм. Уг нормыг 2008 онд Эрүүл мэндийн яамны сайдын тушаалаар гаргаж байжээ. Харин хэн, хэзээ, хэрхэн гаргасан нь тодорхойгүй байдаг байна.

    Цэцэрлэгийн хүүхдүүдийн хоолны мах багассан талаар зарим цэцэрлэгийн удирдах ажилтнуудаас тодруулга авах гэсэн боловч завгүй гэх шалтгаанаар тайлбар хийхийг хүссэнгүй. “Хоолны махны хэмжээ багассан. Өөр зүйл багасаагүй” гэж БЗД 122-р цэцэрлэгийн арга зүйч хэллээ.

    Тус цэцэрлэгийн арга зүйчийн хэлж буйгаар хүүхдүүдийн хоолны махны хэмжээ багасах нь нэг их асуудал биш бололтой. Гэтэл 1-3 настнууд 110 гр махыг идэх ёстой гэж норм дүрэмд зааж өгсөн байдаг байна. Харин будаа гурилан бүтээгдэхүүн 135, ногоо 220, сүү тараг 400, жимс 120, цөцгийн тос 15 гр-ыг идвэл  шаардлагатай бодисоо авна гэж үзжээ. Гэтэл одоо хүүхдүүдийн хоолны мах 30 гр-аар багассан байна. Хүүхэд өдрийн 9 цагийг цэцэрлэг дээрээ өнгөрөөдөг. Энэ хугацаанд хангалттай хооллож байх ёстой. Ялангуяа  манайх шиг эрс тэс уур амьсгалтай газарт хоолны хэмжээг багасгавал хүүхэд уургийн дутагдалд орох магадлалтай юм.

    Гэхдээ нийслэлд үйл ажиллагаа явуулдаг зарим цэцэрлэгүүд Н.Удвал сайдын бус 2005 оноос хойш мөрдөж ирсэн тушаалаар хоолныхоо орцыг зохицуулж байгаа гэж хэлж байна. Учир нь Н.Удвал сайдын гаргасан тушаалыг мэдээгүй яваа гэнэ. Цэцэрлэгийн насны хүүхдүүдийн тоо жилээс жилд өсч байгаа. Тодорхой дурдвал, 2004-2005 онд цэцэрлэгийн хүүхдийн тоо 107 мянга гаруй  байсан бол энэ жил энэ тоо 190 орчим мянга болж өссөн байна. Эцэг, эхчүүд хүүхдүүдээ бөөн юм болж байж цэцэрлэгт оруулдаг. Оруулсан нь оруулаагүйгээс дээр ч хүүхдийн хоолны асуудалд улс болон эцэг эхчүүдийн аль аль нь анхаарах нь зүйтэй гэж хэлэх хүмүүс ч байна.  Өмнө нь цэцэрлэгийн хүүхдийн хоолны 41 хувийг төр, үлдсэнийг нь эцэг, эх нь хариуцдаг байсан. Харин 2009 оноос энэ байдлыг өөрчилж төрөөс хоолны мөнгийг нь 100 хувь хариуцдаг болсон. Ингэснээр эцэг, эхчүүдийн хүлээх хариуцлагыг байхгүй болгосон гэх шүүмжлэл байна.

    Хамгийн сүүлд хүүхдийн хоолны мөнгийг нэмж 1650 төгрөг болгосон ч хүүхдүүд энэ мөнгөнд тохирсон хоол хүнснээс шаардлагатай илчлэг, уураг, амин дэм, шим тэжээлээ авч чаддаггүй гэнэ. Тиймээс эцэг, эхчүүд хүүхдийнхээ хоолонд тодорхой хэмжээгээр мөнгө гаргадаг байх хэрэгтэй гэсэн саналыг зарим цэцэрлэгийн ажилтнууд гаргаж байна. Эцэг, эхчүүдийн зүгээс хүүхдийнхөө төлөө хоолны мөнгөний тодорхой хувийг гаргахад бэлэн гэж байгаа ч энэ талын зохицуулалт байхгүй учраас мөнгө өгөхгүйгээр яваад л байдаг гэж хариулж байна. Хэрвээ авна гэвэл бид өгөхөд бэлэн. Ямар ч эцэг, эх хүүхэддээ ккл багатай хоол идүүлэхийг хүсэхгүй. Хэрвээ энэ мэтээр ккл багатай хоол, хүнс  идүүлсээр байвал бид арга хэмжээ авч хүүхдүүдийнхээ хоолонд мөнгөө нэмэрлэе гэж хэлж байна.

    Мөн цэцэрлэгт хүүхэд хоолондоо цаддаггүй. Үүний шалтгаан нь хоолны хэмжээ багаас гадна багш, ажилчид нь хоолноос нь иддэгтэй холбоотой. Гэтэл багш нар хүүхдүүдээ хаяад хоол идэх боломж байхгүй учраас хүүхдүүдийнхээ хоолноос идэхээс өөр арга байхгүй гэх зүйлийг хэлж байгаа юм. Энэ мэт цэцэрлэгийн хүүхдүүдийн хоолонд зохицуулах шаардлагатай олон асуудал байгаа аж.