МУИС-ийн Удирдах зөвлөл бүтцийн өөрчлөл хийх гэж байгаатай холбоотойгоор тус сургуулийн Оюутны холбооноос мэдээлэл хийлээ.

   Оюутны холбооноос МУИС-ийн нийт оюутны дунд дөрвөн сургууль болгон нэгтгэж, бүтцийн өөрчлөлт хийх гэж буйг дэмжиж байгаа талаар санал асуулга явуулсан байна. Судалгаагаар оюутнуудын 60 хувь нь "зөв", 25 хувь нь "буруу", 15 хувь нь "мэдэхгүй" гэсэн хариулт өгчээ. Гэхдээ тэд МУИС-ийн Хууль зүйн сургууль, Эдийн засгийн сургууль, Физик электроникийн сургууль, Олон улсын харилцааны сургуулийг МУБИС руу шилжүүлэх саналыг дэмжихгүй байгаа аж. Үүний оронд эдгээр сургуульд яг одоо суралцаж байгаа оюутнуудыг МУИС-ийн харьяанд төгсгөж, ирэх жилээс эдгээр ангид дахин элсэлт авахгүй байх санал гаргасан байна. Өөрөөр хэлбэл, МУИС-ийн оюутнууд бүтцийн өөрчлөлтийг ерөнхийдөө дэмжиж байгаа аж. Үүнд МУИС-ийн захирал А.Галтбаяр өчигдөр буюу Олон улсын оюутны эрхийн өдрөөр тус сургуулийн 120 гаруй оюутантай уулзаж, бүтцийн өөрчлөлтийн ач холбогдлыг тайлбарласан лекц уншсан нь нөлөөлсөн байна.