МУИС-ийн бүтцийн өөрчлөлттэйгээр холбоотойгоор өнөөдөр тус сургуулийн оюутны холбоогоос мэдээлэл хийсэн. Энэ үеэр МУИС-ийн Оюутан Конгрессийн тэргүүн Л.Дашнямаас зарим зүйлийг тодрууллаа.

- Бүтцийн өөрчлөлийг МУИС-ийн оюутнуудын дийлэнхи нь дэмжсэн гэж та бүхэн хэллээ. Гэхдээ тэд зарим зүйлийг сургуулийнхаа удирдлагуудад сануулсан гэсэн. Энэ талаар тодруулна уу?

-Оюутны эрхийг хамгаалах өдрөөр МУИС-ийн нэрэмжит “Оюутны оролцоо ба Монгол улсын хөгжил” сэдэвт 130 гаруй оюутныг хамарсан чуулга уулзалт хийлээ. Уг уулзалтад МУИС-ийн захирал А.Галтбаяр оролцож оюутнуудад тулгамдаад  бүтцийн өөрчлөлтийн талаар мэдээлэл өгсөн. Мөн оролцогчдоос санал асуулга авсан. Оюутнуудын дийлэнхи нь дэмжсэн. Тэд Гадаад хэл, Монгол хэлний сургууль болон Хими, биологийн сургууль нэгдэж болно гэж үзэж байгаа. Манай оюутнууд мэдээлэл дутмагаас болж сургууль болон багшгүй болох нь гэж бодоод байна. Тиймээс тэдэнд үнэн бодит, зөв мэдээлэл өгөхөөр ажиллахаар боллоо. Мөн зарим багш нар маань ч дэмжиж байгаа. Гэхдээ эсэргүүцэж буй багш, оюутнууд бий. Ирэх сарын 15-ны өдөр гэхэд санал асуулга авч дуусаад, өөрчлөлтөө хийнэ гэж яригдаад байгаа. Дөрвөн жил сурсан оюутнууд сүүлийн семистер дээр сургуулийн нэр нь солигдоно гэхээр тэдний зорилго үгүй болоход хүрнэ. Тиймээс биднийг төгстөл сургуулийн нэрээ хадгалж явахыг хүсч байна. Мөн сургуулиудыг нэгтгэсэн тохиолдолд кредитийн зөрүүг арилгаж өгөхийг хүссэн. Тухайлбал, бүх нэгдүгээр курсийн оюутнууд эдийн засаг, Монголын түүхийн хичээлийг судалдаг. Гэтэл зарим сургуульд нэг кредит нь 32 мянга байхад, нөгөө сургуульд 42 мянган төгрөг байх жишээтэй.

- Зарим сургууль нэгдэхгүй гэсэн байр суурьтай байгаа. Энэ талаар ямар шийдвэр гарсан бэ?

- Эдийн засаг, Хууль зүй, Олон улсын харилцааны сургуулийн оюутнууд болон захирал нь бусад сургуультай нэгдэхгүй гэсэн саналтай байгаа. Учир нь Эдийн засгийн сургууль олон улсад хамгийн анх магадлан итгэмжлэгдсэн сургуулиудын нэг, кредитийн төлбөр нь 69 мянган төгрөг.  Энэ сургуулийг худалдааны сургуультай нэгтгээд бизнесийн сургууль болговол олон улсын магадлан итгэмжлэл нь байхгүй болно. Мөн Хууль зүйн сургууль нь энэ салбарын мэргэжилтнийг бэлтгэж байгаа манай улсын топ биеэ даасан сургуулийн нэг. Харин олон улсын харилцааны сургууль нь монголд ажиллаж байгаа гадаад харилцааны яамны нийт ажилчдын 36,8 хувийг бүрдүүлдэг 20 жилийн түүхтэй сайн сургалттай сургууль юм.  Үүнийг нийгмийн шинжлэх ухаан болон Гадаад хэлний сургуультай нэгтгэх нь явцуу болно гэж байна.  Оюутнууд бүтцийн өөрчлөлтийг дэмжиж байгаа ч сургуулийн байр, тэнхим, сургуулийн нэршил солих зэрэгт өөрсдийнхөө саналыг тусгахыг хүсч байгаа. Эдгээр асуудлыг зөвхөн удирдах зөвлөл гэх 24 хүн, эрдмийн зөвлөл гээд 14-15 захирал яриад өнгөрдөг биш оюутны төллөөллийг сонсохыг удирдлагуудаас шаардаж байгаа юм. Яг энэ асуудалд ангийн дарга нарыг оролцуулсан зүйл байхгүй байна. Мөн багш нар бидэнд нэг ч удаа тайлбарлаагүй.

-МУИС-ийн оюутныг МУБИС руу шилжүүлэхийг эсэргүүцэж байна гэж танай сургуулийн зарим оюутнууд хэлсэн ?

-Энэ хичээлийн жилд  МУБИС руу явуулахгүй гэж удирдлагын зүгээс мэдэгдсэн.

-Багш нар хичээлээ орж байгаа юу. Ялангуяа эсэргүүцэж байгаа багш нар?

- Хичээлээ бол орж байна. Манай сургуулийн зарим багш, оюутнууд сурлагын чанарыг сайжруулъя гэснийг дэмжсэн. Харин бүтцийн өөрчлөлт хийж, сургуулиуд нэгдснээр зарим багш нар ажилгүй болох эрсдэл бий болж байгаа. Энэ нь эсэргүүцэхэд нөлөөлж байж магадгүй. Гэхдээ оюутнууд маань бүтцийн өөрчлөлт цаашид хэрэгтэй зүйл гэдгийг ойлгож байгаа, хамгийн гол нь бидний саналыг авч тусгахыг л хүсч байна. Мөн манай сургуулийн ихэнх номын сан хуучирсан, шаардлага хангахгүй, номын фонд хүрэлцэхгүй байдаг. Гэхдээ ирэх хавраас Монгол Японы төв, МУИС-ийн хичээлийн хоёрдугаар байр хоёрын дундах талбайд нэгдсэн номын санг ирэх хавраас барьж эхлэхээр болсон. Энэ тухай Удирдах зөвлөлийн хуралд ярьсан.