МХЕГ-аас Байгалийн түүхийн музейн барилгыг актлах дүгнэлт гарснаар энэ оны зургадугаар сард музей хаагдсан юм. Тус музей нь 7800 гаруй үзмэртэй бөгөөд өчигдрөөс эхлэн үзмэрүүдийг тусгай фонд руу зөөж эхэлсэн байна. Үүнтэй холбогдуулан Байгалийн түүхийн музейн захирал Н.Зоригтбаатараас дараах тодруулгыг авлаа.

-Шинэ Байгалийн түүхийн музейн барилгыг барих хөрөнгө мөнгийг 2014 он төсөвт суулгана гэж байсан ч суулгаж чадсангүй. Энэ асуудал хэрхэн шийдэгдэх бол?

-Би захирлын хувьд үүнээс л айж байна. Сая дутуу баригдсан барилгын ажил 144  байгаа гэж байна. Ийм болчихгүйн тулд бид зураг төслийг хийх компанитайгаа маш ойрхон ажиллаж зорилгоо сайн ойлгуулах хэрэгтэй. АНУ, Английн гэхээ болъё Ази тивийн хөгжилтэй орнуудын жишгээр гайхамшигтай барилга барьж өгөөч гэж хүснэ. Тийм учраас бид хэмжээ дамжаа бүх юмаа нарийн гаргах гэж хичээж байгаа. Гэхдээ үүнийг мэргэжлийн хүн дахин хэмжиж үзэх байх.

-Танай музейн барилгыг бүхэлд нь биш хэсэгчлэн буулгана гэж байна. Яг аль хэсгийг буулгаж шинээр барих вэ?

-А блокыг буулгана. Өөрөөр хэлбэл 1954 онд баригдсан одоогоор актлагдаад байгаа тэр хэсгийг буулгана гэсэн үг юм. 1989 онд ашиглалтад орсон фондын барилга бол дахиад 60 жил чөлөөтэй ашиглаж болно. Тэр нь В хэсэг юм. Бас Б хэсэг гэж 1973 онд ашиглалтанд орсон өртгөлгөл байгаа. Тэгэхээр бид 2014 оны төсвийн тодотголоор манай барилгын хөрөнгө мөнгө шийдэгдэнэ гэж найдаж байна. Хэрэв тодотголоор суучихвал 2015 онд баригдчих болов уу. Энэ барилгыг 2014 онд буулгах байх. 10 мянга орчим үзмэрээ фонд руу зөөж байгаа бөгөөд 90-ээд хувьтай явж байна.

-Шинээр баригдах музейг дэлхийн жишигт нийцүүлэн Байгаль-Шинжлэх ухааны музей болгох асуудал яригдаж эхэллээ. Энэ талаар дэлгэрэнгүй яриач?

-Бид музейн  концевцыг олон жил бодож байна. Ер нь барилгыг буулгаж шинэ музейтэй болно гэдэг зүйл 2010 оноос хүчтэй яригдаж эхэлсэн. Тийм учраас нэгэнт шинэ барилгатай болвол хуучин шигээ байж таарахгүй. Тийм учраас бид орчин үеийн ялангуяа Азийнхаа ижил төстэй музейнүүдтэй хамтарч ажилладаг байх хэрэгтэй. Ер нь дэлхийн жишиг тийм шүү дээ. Монголд ирсэн хүн Байгалийн түүхийн музейг заавал үздэг, үзэхгүйгээр явахын аргагүй тийм сайхан музейтэй болчихъё гэж бодож байна. Үүний гол асуудал нь барилгын асуудал байсан. Харин энэ асуудал засаг төрийн дэмжлэгтэйгээр шийдэгдчих байх. Гэхдээ барилга баригдлаа гээд музей болчихгүй. Үүнийг шинээр дэглэнэ.  Бид одоо байгаа зургаан   үндсэн чиглэлээ нэмж баяжуулан есөн чиглэл болгохоор бодлого боловсруулж байна. Энэ талаар гадаад дотоодын эрдэмтэдтэй санал солилцон түүнийгээ баталж концевц болгосон байгаа.байгалийн түүх Удахгүй сайдаараа батлуулна. Сайд ч үүнд сэтгэл өндөр байгаа. Өнөөдөр Азийн өндөр хөгжилтэй орнуудад дан байгаль гэлтгүй шинжлэх ухаан, техник технологио нэмээд музей байгуулдаг болсон. Манай орны хувьд харьцангуй онгон дагшин байгальтай, шинжлэх ухаан, техник технологи нь төдийлөн хөгжөөгүй учир байгаль нь гололсон музей байхаар төсөөлж байна.

-Танай музей хичнээн ажилтантай вэ? Шинэ барилга баригдаж дуустал тэдгээр ажилчид яах вэ?

-Манай музей 42 ажилтантай. Үүнээс энэ жил дөрөв таван хүн нь тэтгэвэрт гарсан байгаа. Түүнчлэн дараа жил хоёр хүн нь тэтгэвэрт гарна. Цагаан сарыг хүртэл манай бүх ажилтан ажилтай байгаа. Бүх үзмэрүүдээ фонд руу зөөгөөд дуусахаар үзмэр харагч нар ажил багатай болно. Яамнаас тэдгээр хүмүүсийг хүн хүч муутай байгаа газрууд руу дайчлаад эхэлсэн байгаа. Жишээлбэл Гандантэгчинлин хийдийн шашны эд өлгийн зүйлсийг тоолоход манай дөрвөн хүн ажиллаж байна. Ерөнхийдөө музейн ажилтнууд бүгд энэ маягаар хэвийн ажил үүргээ гүйцэтгээд цалин хөлсөө авна. Харин эрдэм шинжилгээний ажилтнуудын ажил урьд өмнөхөөс хоёр дахин нэмэгдэнэ. Яагаад вэ гэхээр барилгын ажил явагдах хугацаанд бид хээрийн хайгуул шинжилгээ судалгааны ажлуудаа хийж эвдэрч муудсан үзмэрүүдээ шинэчлэх юм.