МҮОНТ-ийн захирал Ч.Даваабаяр хэвлэлийнхэнд мэдээлэл хийж  ажилчдадаа шаардлага тависныг маань эсэргүүцэж миний эсрэг үйлдлүүд гаргаж байна. Энэ бол хэдхэн хурган дарга нарын хийж буй үйлдэл болохоос уран бүтээлчид ямар ч хамаагүй . Мөн эдгээр хурган дарга нарыг хуулийн байгууллагаар шалгуулахаар болж байгаа хэмээсэн. Тэгвэл тэрбээр энэ үеэр МҮОНТ-ийн зарим уран бүтээлчдийн хууль бус үйлдлийг ч илчлэв.

Тухайлбал, “Нэг минут нэг сая" нэвтрүүлгийн хөтлөгч Г.Ханхүү МҮОНТ-ийн явуулсан дотоод аудитын шалгалтаар хоёр жил дараалан зөрчил гаргасан гэдэг нь нотлогдсон байна. Зөрчлөө арилгуулах шаардлага тавьсан ч  арилгаагүй аж. Үүгээр зогсохгүй гадны компанитай гэрээ байгуулж МҮОНТ-ийн эфирээр цацаж, маш их мөнгийг хувьдаа авсан гэдгийг тэрбээр онцлов.

Мөн сэтгүүлч Л.Цагаандалай “Адуучин” гэх тэмцээнийг Ерөнхий сайдын ивээл дор явуулахдаа 200 гаруй сая төгрөгийг авсан аж. Тэгвэл энэхүү нэвтрүүлгийн гэрээ хийгдээгүй, тайлангаа өгөхгүй яваад байгаа учраас Захирлын дэргэдэх салбар зөвлөлийн хурлаар асуудлыг нь авч хэлэлцэхээр болжээ.

Түүнчлэн МҮОНТ-ийн 2-р нэгдлийн дарга Д.Наранцэцэг "Мисс Монголиа" нэвтрүүлгийн хоёр сарын хугацаанд эфирт явуулсан байна. Гэвч одоо хүртэл гэрээ байхгүй, төлбөр мөнгөө яаж зарцуулсан нь тодорхойгүй, ажлын тайлангаа өгөхгүй байгаа аж. Үүнд ч мөн дотоод аудитын шалгалтыг оруулжээ.

Харин энэ жилийн аудитын шалгалт тодорхой нэгдлийн уран бүтээлч дээр оруулсан байна. “Энэ хууль бус ажиллагаагаа зогсоо. Телевиз бол ганцхан данстай. Энэ дансаар мөнгөө авч эргүүлээд уран бүтээлийн хөлс, шагнал цалингаа аваад явах ёстой” гэсэн шаардлагыг  тавьжээ.