Та хотын гудамжаар алхаж яваад халтирч уналаа. За бас болоогүй ээ гэмтэж бэртжээ гэж бодьё. 

Ийм зүйл тохиолдсон ихэнхи хүмүүс юуны түрүүнд мөнөөх халтиргаат замыг уу, аль эсвэл өөрийгөө хараагаад байгаа юм уу бүү мэд, “П..., Н...” гэхчилэн мэддэг бүхий л хараалаа урсгаж гарна. Үүнийхээ дараа өөрийн “Хар толгой”, тэнцвэртэй байж чадаагүй өнөө муу хөлөндөө бурууг тохоод өнгөрөх нь олонтоо. Гэхдээ энэ цаг ард үлдсэн бололтой.

Учир нь хотын гудамж талбайд халтирч унаад бэртсэн хүмүүст нөхөн төлбөр олгодог, тэр талаар нь  хүмүүс мэддэггүй болохоор төдийлөн ханддаггүй гэх. Энэ талаар Захирагчийн ажлын албаны Тохижилт, хог хаягдал, удирдлагын хэлтсийн мэргэжилтэн Б.Эрдэнэбат “Иргэд халтиргаа гулгаанаас болж гэмтэх, бэртэх асуудал гарсан тохиолдолд тухайн дүүргийн Засаг даргын тамгын газарт болон хуулийн байгууллагад хандсанаар өөрийнхөө хохирлыг барагдуулах боломжтой. Гэтэл иргэд үүнд өөрсдөө хайнга ханддаг, эсвэл хууль, эрхзүйн мэдлэг багатайгаас болж гомдол гаргах, хохирлоо барагдуулах тохиолдол цөөн байдгаас албан байгууллага, үйлчилгээний газруудын хяналт сулардаг” гэжээ.

Үнэхээр ч энэ талаархи хууль журманд нийслэлийн албан байгууллага, аж ахуйн нэгжүүд ойр орчныхоо 50 метр газрыг цэвэрлэх заалт байдаг бөгөөд Захиргааны хариуцлагын тухай хуулийн 38.2-т “...гаднах орчныхоо халтиргаа гулгаатай талбайг цэвэрлээгүйн улмаас иргэд бэртэж гэмтвэл эмнэлэг, эмчилгээний зардлыг тухайн байгууллага хариуцна” хэмээн тусгасан байдаг. Тиймээс иргэд та бүхэн халтиргаанаас болж гэмтсэн бол тухайн дүүргийн хуулийн зөвлөгөө өгөх байгууллагуудад хандаж зохих журмаар нь хохирлоо нөхөн төлүүлж болох юм байна шүү.