ЗТЯ-ны бодлого хэрэгжихгүй байгаагаас орон нутгийн тээвэрчид хохирч байгаа талаар “Арвин шар зам” ХХК-иас мэдээлэл хийлээ. Энэ үеэр тус компанийн хууль зүйн зөвлөх, өмгөөлөгч С.Оюунцэцэгээс зарим зүйлийг тодрууллаа.

 -Зам тээврийн яамны удирдах ажилтнууд буюу төрийн албан хаагчдын хүнд сурталтай үйл ажиллагаанаас өнөөдрийг хүртэл Орхон аймгийн тээвэрчид хохирч байна гэлээ.  Ямар учраас ингэж үзэх болов?
-Өнөөдрийг хүртэл нэг жил гаруйн хугацаанд Орхон аймаг дахь талаар “Арвин шар зам” ХХК-ийн тээвэрчид хохирч ирсэн гол шалтгаан нь ЗТЯ-ны ажилтнуудтай холбоотой. Манай  тээвэрчид 2002 оноос эхэлж Эрдэнэт-Улаанбаатар чиглэлд нийтийн тээврийн үйлчилгээнд явдаг. Харин хоршооллын хувьд одоогоор 58 хоршоологчдоос бүрдсэн, үйл ажиллагаа нь тогтворжсон.

Улмаар ЗТЯ-аас хатуу хучилттай замаар холбогдсон аймгуудад  зорчин явагчдын ая тухыг хангах зорилгоор  том оврийн автобусыг явуулыг үүрэгдсэн. Бага оврийн автобус буюу микрийг  зорчигч тээврийн автобусанд явуулахгүй гэсэн бодлого чиглэл баримталсан.  Өөрөөр хэлбэл, Зам тээврийн яамнаас 2013 он гэхэд бүх жижиг автобус буюу микрог гаргаж зөвхөн том оврийн автобус ажил үйлчилгээ зохион байгуулна гэсэн бодлогыг баримтал гэсэн үүрэг өгсөн. Тиймээс үйлчилгээнд явж байсан 26 микрог зогсоож, үлдсэн 13 микроны жолооч нарыг нэгтгэж 485 сая төгрөгөөр “Хаан” банкны зээлд хамрагдаж найман том оврийн автобус худалдаж авсан. Ингээд найман том оврийн автобусаар зорчигч тээврийн үйлчилгээнд явая гэсэн санал тавьсан боловч өнөөдрийн хүртэл ЗТЯ-наас ямар ч хариу өгөхгүй, үйлчилгээнд оруулахгүй, чирэгдүүлж хохихоорж байна.

-Яг хэзээнээс хойш санал тавьсан бэ?
Жил гаруйн өмнөөс энэхүү найман автобусыг үйлчилгээнд явуулая гэсэн санал хүргүүлсэн.

-Энэ асуудлаар яаманд албан бичиг явуулсан уу?
Энэ асуудлаар ЗТЯ-ны сайдад 38 удаа, дэд сайдад найман удаа, нийт 46 удаа албан бичиг өгсөн. Биеэр уулзаж ярилцаж үзсэн. Өмгөөлөгчийнхөө хувьд санал бодлоо солицсон боловч  асуудлыг шийдэж өгсөнгүй. Саяхан дэд сайдтай нь уулзахад 20 хоногийн дотор асуудлыг шийдэж өгнө гэсэн боловч 2 сар өнгөрөхөд ямар ч хариу өгсөнгүй. Энэ бүхний цаана тээвэрчид хохирсоор байдаг.

-Одоогоор хэчнээн тээвэрчин ажилгүй байгаа вэ?
-13 тээвэрчин ажилгүй, сул зогсож байна. Гэтэл 13 тээвэрчний цаана ар гэрийнхэн гэж байгаа. Тэгсэн хэрнээ өнөөх автобус авсан зээлийнхээ хүүг сар бүр “Хаан” банкинд өгдөг. Ийм байдлаар төрийн албан хаагч нар ажлаа хийхгүйгээс иргэд хохирч байна.

-Эл асуудлыг чухам яагаад шийдэхгүй байгаа юм бол. Ямар нэг тайлбар өгөх юм уу?
-Авто тээврийн газраас нийтийн тээвэрт том оврын автобус, жижиг оврийн автобус, таксигаар үйлчилгээ явуулна гэдэг зүйлээр сонгон шалгаруулалт хийсэн байдаг. Гэтэл сонгон шалгаруулалтан аль ч тээврийн хэрэгсэл шалгараагүй байгаа. Шалгарсан гэдгийг нь тогтоосон Авто тээврийн газрын даргын тушаал, шийдвэр ч гараагүй. Мөн 2005 онд батлагдсан төрийн болон орон нутгийн өмчийн хөрөнгөөр бараа, ажил үйлчилгээ худалдаж авах тухай Монгол Улсын хуульд заасны дагуу үнэлгээний хороо байгуулагдаж, тендерийн шалгаруулалтыг нийтэд зарласан, шалгарсан компанид мэдэгдсэн зүйл юу ч байхгүй. Ийм атал Улаанбаатар хотын гурван компанийг сонгон шалгаруулалтанд шалгарсан нэрийн дор оруулж ирсэн. Тодруулбал, “Ati bus”, “Эрдэмтранс”, “Автобус 5” гэсэн гурван том компаниар орон нутгийн тээвэрчдийн ажилд нөлөөлж, ажлын байрыг нь булаалгасан. Гэтэл энэ компаниудын эрх ашгийг зөрчиж магадгүй гэсэн нэрийн дор эл орон нутгийн тээвэрчдийн хөрөнгө хүчээр бий болсон найман том оврийн автобусыг ажил үйлилгээнд явуулахгүй, хохироосоор байна.