Шинээр баригдаж байгаа төдийгүй ашиглалтанд ороод удаагүй байгаа орон сууцнуудын метр квадрат зөрж байгаатай холбоотой гомдол саналууд хүрээгээ тэлж байна.

ШӨХТГ-т  гомдол гаргах иргэдийн тоо улам өссөөр байгаа юм. Учир нь иргэд барилгын компаниудад дор хаяж 2-20 метр квадратаар “молигодуулж” байсан гэдгийг ШӨХТГ-аас тогтоогоод байна.

Метр квадрат тутам нь хамгийн хямд компаниуд л гэхэд иргэдэд 2-15 метр квадрат талбайг зөрүүтэй зардаг байсан бол Зайсангийн орчмын айлуудын байрнаас бүр 15-20 метр квадратын зөрүү гарчээ. Тэгэхээр иргэд олон арван сая төгрөгийг барилгын компаниудад зүгээр л “идүүлсэн” байгаа юм.

Өөрөөр хэлбэл, өөрсдөө метр квадрат тутмыг нь үнэлж авсан хэрнээ тухайн байр нь анх авсан метр квадратаасаа дутуу байсныг анзаараагүй өнгөрсөн нь ийм асуудал дагуулж байна. Метр квадратын зөрүүгээс болж иргэд барилгын компаниудад хамгийн багадаа 2.8 саяаас дээш төгрөг завшуулж байсан аж. 

Юутай ч Шударга өрсөлдөөн хэрэглэгчийн төлөө газраас тухайн метр квадратын зөрүүтэй гэх компаниудад шалгалт хийгээд эхэлсэн. Харин зөрчил гаргасан компаниудын захирлууд өчигдрөөс зөрчил дутагдлаа хүлээн зөвшөөрч яаралтай арга хэмжээ авахаа мэдэгджээ.

Шалгалтын талаар ШӨХТГ-ын  Хэрэглэгчийн эрхийг хамгаалах хэлтсийн дарга Ч.Батбаатараас зарим зүйлийг тодрууллаа.

-Одоогоор хэчнээн компаниуд зөрчилтэй нь тогтоогдсон бэ. Эдгээрт ямар хариуцлага тооцох вэ?
 -Нийслэлийн хэмжээнд шинээр баригдаж буй орон сууцны метр квадрат дээр өргөдлүүд их ирж байна.Тухайлбал, “Тайгам Алтай” ХХК, “Залуус” хороолол, “Ти СИ Ди” компаниуд дээр гомдол ирсэн. Өчигдрөөс бүх компаниудын захирлуудтай уулзаад явж байна. Зөрчлөө тухайн компанийн захирлууд хүлээн зөвшөөрч байгаа. Гэвч тэд зөрчлөө дахин өөрсдөө шалгах эрхтэй. Харин бидний зүгээс хэрэглэгчдийн эрхийг хамгаалах талаасаа хугацаатай албан шаардлагаа өгнө. Хэрэв хугацаатай албан шаардлагын дагуу тухайн компани зөрчлөө арилгаагүй тохиолдолд бид барилгын компаниудын хууль бусаар олсон орлогыг хурааж улсын орлого болгоно. Мөн хууль бусаар олсон орлогод нь 6 хүртэлх хувиар торгууль тавих журамтай.

Байр худалдан авч байгаа иргэд метр квадратын ойлголт маш муу байдгаас хохирогч болох тохиолдол их. Барилгын компани маань хурдан ашиглалтанд ороосой, мөнгийг нь хэрхэн өгөх вэ гэдэг л асуудлыг тавихаас метр квадрат нь үнэн зөв байна уу гэдгийг анзаардаггүй.

-Ер нь энэ зөрчилтэй холбоотойгоор хуулинд ямар өөрчлөлт оруулах шаардлагатай вэ?
-Тухайн барилгыг хүлээж авдаг мэргэжлийн комисс сайн ажиллах хэрэгтэй байна.  Метр квадратыг яг таг бүртгэж авах шаардлагатай.  Бид  мэргэжлийн хяналтын хүлээж авсан байранд удаа дараа ийм асуудал гарвал  мэргэжлийн хяналтын хариуцаж авсан байцаагчтай хариуцлага тооцно.
Зураг төслийн дагуу баригдсан барилгыг хүлээж авна. Өөрчлөлт хийсэн бол хүлээж авахгүй байхыг мэргэжлийн комисс хийх ёстой.

-Өнөөдрийн байдлаар иргэдээс ирсэн мэдээллийн дагуу хэчнээн компанийн жагсаалт гараад байгаа вэ?
-50 орчим иргэнээс 13 орчим барилгын компанид гомдол гаргаад байгаа. Хуулиар олгосон эрх үүргийн дагуу бүхий л гомдол гаргасан иргэнд хүрч ажиллахыг хичээж байна. Өнөөдрийн байдлаар зургаан компанид зөрчил гомдлыг мэдүүлж албан шаардлага хүргээд байна. Тухайлбал, “Зүмбэр орд” компаниас таван айл гомдол мэдүүлсэн.  “Ти СИ Ди” компани л гэхэд 400 орчим иргэнийг хохироосон байгаа. Энэ компанийн хувьд өөрсдөө Хятадын хөрөнгө оруулалттай, хууль дүрэм стандарт журмыг сайн мэддэггүй байсан. Тэдэнд шаардлагыг хүргүүлэхэд алдаагаа хүлээн зөвшөөрч, хэрэглэгчдэд гаргасан хохирлыг 100 хувь төлнө гэсэн.

Тодруулбал, энэ компанийн талаар манайд гомдол гаргасан гурван компанийн гомдлыг ирэх нэгдэх гэхэд шийднэ гэсэн. Үлдсэн шинээр захиалга өгөөд ороогүй иргэдийн хохирлыг ирэх онд барагдуулж дуусгахаар албан шаардлага  хүргүүлсэн.

-“Гангар” инвестийн захирал таньтай уулзаад гарах шиг боллоо. Эднийх хэдэн метр квадратын зөрүүтэй байсан бэ?
-“Гангар” инвестийнх анх зарахдаа 70 метр квадратыг ганц ч ханагүйгээр зарсан байгаа юм. Манайд өргөдөл гаргасан хүн маань Бадрал гэдэг хүнээс тухайн байрыг худалдаж авсан байна. Гэтэл Н.Бадрал нь 70 метр квадратаа өрөөнийхөө зохион байгуулалтыг өөрөө хийж засварласан. Ингээд өрөөн дотроо хана тусгаарлаж өрөө гаргахаар метр квадрат нь дутчихаад байгаа юм. Манай зүгээс бол Н.Энхтуяа гэдэг хүний өргөдлийг дагуу Н.Бадрал гэдэг хүнтэй ярих хэрэгтэй болчихож байна. Өөрөөр хэлбэл, таны өрөөний засвар, барьсан хананаас болж худалдаж авсан иргэнд чин хохиролтой байна гэдгийг хэлэх ёстой.  Ийм тохиолдолд анх худалдаж авсан иргэн хариуцлага хүлээх болчихоод байгаа ч компанийн зүгээс энэ байдлыг анхааруулж хэлэх ёстой байсан. Хэрэг эцэслэгдэн шийдэгдээгүй байгаа. Тухайн компани өөрсдийнхөө  зүгээс шалгах ёстой зүйлээ шалгаж, хэмжилтийг хийлгэнэ.

Энэхүү компаниуд өөрсдөө хэмжилтээ хийлгэх, нотлох баримт, мөн тодорхой нөхцөл байдлаа тайлбарласан тохиолдолд асуудлыг шийднэ гэдгийг ШӨХТГ-аас хэлж байв.