Монголын “Сүрьеэтэй Тэмцэх Нийгэмлэг”-ийн 20 жилийн ойн хурал өнөөдөр боллоо.

Хуралын үйл ажиллагаанд ЭМЯ, ДЭМБ, ХӨСҮТ, Глобаль сан, Монголын Залуучуудын холбоо, Монголын сүрьеэтэй тэмцэх нийгэмлэг, Нийслэлд үйл ажиллагаа явуулж буй улсын эмнэлгүүд, 21 аймгийн сүрьеэтэй тэмцэх нийгэмлэгийн төлөөлөгчид болоод бусад холбогдох албан байгууллага, мэргэжилтнүүд, сайн дурын идэвхитэн гишүүд оролцсон юм.

Эрүүл мэндийн дэд сайд Ж.Амарсанаа хуралд оролцсон нийт төлөөлөгчдөд хандан үг хэлэхдээ, “Эрүүл мэндийн салбар, тэр дундаа нийгмийн эрүүл мэндийн салбарт олон нийтийн оролцоог хангасан далайцтай үйл ажиллагааг олон жил тогтвортой, үр бүтээлтэй явуулж ирсэн Монголын Сүрьеэтэй Тэмцэх Нийгэмлэгийн нийт ажилтан ажиллагсад, эрүүл мэндийн сайн дурын идэвхитнүүд, гишүүд, дэмжигчид та бүхэнд 20 жилийн ойн баярын мэндийг хүргэе.

Анх байгуулагдсан цагаас хойш 20 жилийн хугацаанд нийгмийн эрүүл мэндийн тулгамдсан асуудлуудын нэг болох сүрьеэ өвчнөөс урьдчилан сэргийлэх, илрүүлэх, эмчлэх үйл ажиллагааг цогцоор нь явуулахад төрийн байгууллагын ачааг үүрэлцэж, олон жил үр бүтээлтэй ажиллаж ирсэнийг нь үнэлж ЭМЯ-аас Монголын Сүрьеэтэй Тэмцэх Нийгэмлэгийг  “Хүнд хүрсэн нийгмийн эрүүл мэндийн тусламж үйлчилгээг хөгжүүлсэн байгууллага”-аар шалгаруулж байсныг санаж байна.

Монголын Сүрьеэтэй Тэмцэх Нийгэмлэг нь өнгөрсөн хугацаанд нийгмийн эмзэг бүлэгт чиглэсэн олон нийт, хувийн хэвшлийг оролцоог хангасан үйл ажиллагаануудыг хэрэгжүүлж ирсний томоохон жишээ нь Глобаль Сангийн дэмжлэгтэй төслүүд юм.

Монголын Сүрьеэтэй Тэмцэх Нийгэмлэг нь Глобаль Сангийн дэмжлэгтэй төслүүдийн салбар хүлээн авагчаар ажиллах хугацаандаа олон нийтийн дундаас 1000 гаруй эрүүл мэндийн сайн дурын идэвхитэн бэлтгэж, хоолтой эмчилгээнд хамрагдсан 5000 гаруй өвчтөн, гэрээр эм хүргүүлэн уусан 16000 гаруй өвчтнийг эмчилж эдгэрүүлжээ.

Мөн Монголын Сүрьеэтэй Тэмцэх Нийгэмлэг нь сүрьеэгийн эмч мэргэжилтнүүдийг чадавхижуулах, мэдлэг, ур чадварыг дээшлүүлэхэд байнга анхааран ажиллаж 2010 оноос хойш нийт 16 эмч, мэргэжилтнийг Тайвань Улсад 21 хоногийн нарийн мэргэжлийн курст суралцуулсан байна.

Ийнхүү 20 жилийн хугацаанд хийсэн ажилтай, ололт амжилттай ойгоо тэмдэглэж буй та бүхэнд цаашдын ажилд тань улам их амжилт хүсье” хэмээлээ.

Мөн хурлын үеэр ард иргэдийнхээ эрүүл мэндийг сахин хамгаалах их үйлсэд үнэтэй хувь нэмэр оруулж буй явдалыг үнэлэж холбогдох албан тушаалтнуудыг, Эрүүлийг хамгаалахын тэргүүний ажилтан, Эрүүл мэндийн яамны жуух, МЗХ тэргүүний залуу алтан медаль, Хөдөлмөрийн алдар медалиудаар тус тус шагнаж урамшуулсан юм.