Цагдаагийн байгууллагын шинэчлэлийн бодлогыг ард иргэдэд таниулах, ажил мэргэжлийн онцлогийг  үнэн бодитоор хүргэх, цагдаа-иргэдийн хамтын ажиллагааг сайжруулах, Монголын гэрэл зургийн түүхийг цагдаагийн алба хаагчдын сэдэвт гэрэл зургаар баяжуулах зорилгоор Цагдаагийн ерөнхий газар, Үндэсний гэрэл зургийн танхимтай хамтран зохион байгуулсан “Амрыг эрье” сэдэвт гэрэл зургийн уралдаан 40 хоногийн хугацаанд  зохион байгуулсан.
 
Уралдаанд оролцогч цагдаагийн алба хаагч болон энгийн иргэдээс цагдаагийн өдөр тутмын үүрэгт ажил, ар тал, ахуй амьдралыг тусган харуулсан, зохиомжит болоод бодит гэхчилэн олон төрлийн шинэ санаа шийдэл агуулсан 49 хүний 200 орчим зургийг ирүүлжээ.

Оролцогч нар зураг бүртээ өөрсдийн гэсэн тайлбарыг тавьж, зарим нь өглөөний наран мандах агшин, цас хаялсан үдшийг амдан хүлээж гэрэл зургийн аппаратаа шүүрэн авч, шөнийн ээлжээ хүлээлцэх эгэл жирийн алба хаагчид, нутгийн зон олны амар амгалан дор нуруу тэнийн мишээх алба хаагчдын чөлөөт агшин гэх зэргээр аль болох сонирхолтой, энгийн атлаа торгон агшныг харуулсан зураг авахаар зорьсон нь уралдааныг улам бүр сонирхолтой болгож өгсөн.

Жишээ өгүүлэхэд замын хөдөлгөөний аюулгүй байдлыг сахиулах үүрэгт ажилдаа эртлэн орсон замын цагдаагийн алба хаагч хөдөлгөөн сийрэг үед тохижилт үйлчилгээний компанийн үйлчлэгчийн ажилд туслан гудамж цэвэрлэнгээ хууч хөөрч буй дүр зураг, наадамчин олны баяр хөөрийн дундуур хамгаалалтанд гарч үүрэгт ажилдаа чин сэтгэлээсээ зүтгэх цагдаагийн алба хаагчдын агшин, эр цэргийн албандаа ижил заяагаа түшилцсэн ихэр хоёр байлдагчийн тангараг өргөх түүхэн үе гэхчилэн цаг хугацаа, утга санаа, хүсэл мөрөөдлийн хувьд гэгээн бүхнийг агуулсан олон сайхан бүтээлүүд байгаа юм.

Уралдаанд ирсэн бүтээлүүдийг шалгаруулж 2013 оны 12-р сарын 6-10-ны өдрүүдэд Монголын Үндэсний музейд гаргаж олны хүртээл болгоно. Үзэсгэлэнгийн үеэр мөн цагдаагийн алба хаагчийн үе үеийн хувцас хэрэглэл, түүхэн зургуудыг Та үзэж сонирхох бүрэн боломжтой. Энгийн иргэд төдийлөн мэддэгггүй Цагдаагийн музейн ховор нандин үзмэрүүдийг үзэх алтан боломж энд бас бий.

Анх Нийгмийг аюулаас хамгаалах яамны музей нэртэйгээр 1982 онд байгуулагдсан уг музейгээс 1206 онд Их Монгол улс байгуулагдан Их засаг хуулийг тогтоосон үеэс Богд хаант засгийн үеийн хууль цааз, Ардын цагдаагаас өнөө үеийн цагдаагийн байгууллагын үүсэл хөгжил, олон улсын харилцаа, тухайн цаг үеүдэд хэрэглэж байсан хувцас зэвсэг, техник хэрэгсэл зэргийг үзэж цагдаагийн байгууллагын түүхэн цаг хугацаагаар аялаж болох нь ээ. Дашрамд дуулгахад 1992 онд Нийгмийн аюулаас хамгаалах яам татан буугдсанаар ЦЕГ-ын даргын 1992 оны 59 тоот  тушаалаар цагдаагийн музей болж, он цагийн түүхээр үзмэрүүдээ баяжуулан үйл ажиллагаагаа явуулж ирсэн түүхтэй.

Үзэсгэлэнд тавигдсан эдгээр бүтээлийг мөн нийслэл, дүүргүүдийн цагдаагийн газар, хэлтсүүдээр аялуулж алба хаагчид болон тухайн хэлтсүүдээр үйлчлүүлж байгаа иргэдэд сонирхуулах юм. Үзэсгэлэнгийн нээлт маргааш өдөр буюу 12 дугаар сарын 6-ны Баасан гарагийн 12.00 цагт Үндэсний түүхийн музейд болно.