МУИС сүүлийн өдрүүдэд бужигнаантай байна. Үүгээр барахгүй асуудал улам хурцдаж байх шиг. Өчигдөр л гэхэд тус сургуулийн багш, ажилчид сургууль дотроо захирал Т.Галтбаярыгаа огцрохыг шаардсан утгатай лоозон, уриа барьж жагсаал хийлээ. Жагсаал хийж байгаа багш нарын ярьснаар бол тус сургуулийн захирал Т.Галтбаяр нь сургуулийн эрдмийн зөвлөлд мэдэгдэлгүй нууцаар удирдах зөвлөлийн тогтоолын төслийг батлах гэж оролдож, сургуулийн дүрмийг зөрчсөн гэнэ. Энэхүү тогтоолын төсөлд МУИС-ийн эрдмийн зөвлөлийн бүх эрх мэдлийг үгүй хийх, хүчингүй болгохыг оролдож, улмаар Т.Галтбаяр захирал өөр дээрээ сургуулийн бүх эрх мэдлийг төвлөрүүлэх гэсэн бусармаг үйлдэл хийсэн тул ийнхүү огцрохыг шаардаж байгаа гэж тэд тайлбарлаж байгаа юм.

Уг жагсаалаас өмнө Эрдмийн зөвлөл түүнийг огцруулахаар хуралдсан ч үр дүн эсрэгээрээ гарсан. Зарим эх сурвалжийн мэдээлж буйгаар А.Галтбаяр хуралдаанд нөлөө үзүүлж болохуйц зарим багш, удирдлагуудтай ганцаарчлан уулзаж, өөөрийг нь дэмжихийг уриалж явсан  учраас түүнийг огцруулж чадсангүй гэж жагсаалд оролцсон багш нар хэлж байна. Юутай ч А.Галтбаяр бүтцийн өөрчлөлийг үргэлжлүүлэн хийх нь тодорхой. Гэхдээ үүнийг ганц А.Галтбаяр хийгээгүй. Ер нь МУИС-ийг өөрчлөх нь БШУ-ны яамны бодлого байсан гэдгийг албаны хүн нь хэлсэн. Тэгэхээр МУИС-ийн багш нарын гаргаад буй тус явдалд яамнаас зохицуулалт зүйтэй гэж үзэх хүмүүс байна. Учир нь яамнаас бодлогоор зохицуулалт хийж байхад ганц А.Галтбаярт хамаг бурууг тохож, хэл амны бай болох ёсгүй юм. МУИС-д өөрчлөлтийг хийхээр болсон бол анхнаасаа багш нартай уулзаж судалгаа, төлөвлөгөөгөө тайлбарлаад ажлыг цэгцтэй эхлүүлэх  ёстой байсан. Гэтэл яамнаас тэгээгүй. Тийм учраас одоо МУИС-д бужигнаан үүсэнгүүт ганц А.Галтбаяр захирлыг урьдаа бариад зогсож болохгүй юм. 

МУИС-ийн багш нарын зүгээс “Математикийг хэлний хичээлтэй хольж болохгүй. Хэрвээ уг шинэчлэл хийгдвэл хамт олны зөвлөл татан буугдана. Мөн сургуулийн гол байгууллага болох эрдмийн зөвлөл бэлэг дэмбэрэлийн шинжтэй болно. Бүрэлдэхүүн сургуулиуд захирлаа сонгодог байсан бол тэр зарчим халагдаад МУИС-ийн захирал өөрөө шууд томилдог болох гээд байна. Манай сургуульд олон дарга нар хийх ажилгүй суудаг гэж ярьж байна лээ. Тийм зүйл байхгүй. Бид эрдмийн ажлаа хийгээд хичээлээ заагаад явж байгаа. Хүүхдүүд хичээлээ сонгож хичээллэх нь зөв. Гэхдээ захиргаа нь нэг болж болохгүй" гэсэн юм.

Харин холбогдох албаныхан тус сургуулийг цэгцэлж, шинэчлэх шаардлагатай. Энэ бол судалгаа шинжилгээтэй ажил хэмээн тайлбарлаж байгаа юм. Хэрэв бүтцийн өөрчлөлт хийгдээд дуусвал Хуулийн сургууль, Байгаль, нийгэм хүмүүнлэгийн ухааны сургууль, Хэрэглээний шинжлэх ухааны сургууль, Бизнесийн сургууль гэсэн үндсэн дөрвөн сургуультай болох юм.