Дорноговь аймгийн Сайншанд  сумын IV  багийн статустай Зүүнбаян  багийг сум болгох санал тус аймгийн ИТХ-аар дэмжигджээ. Тодруулбал энэ сарын 03-наас 04-ны хооронд болсон Дорноговь аймгийн ИТХ-ын IV хуралдаанаар  Зүүнбаянг сум болгох төслийг төлөөлөгчдийн олонх нь дэмжиж УИХ, Засгийн газарт уламжлахаар болсон байна.

Анх 1949 онд Зүүнбаянд Монголын нефтийн анхны үйлдвэр байгуулснаар  хотхон бий болж байсан бөгөөд 1950 оноос хойш есөн жилийн хугацаанд Зүүнбаянгаас дөрвөн сая баррель газрын тос олборлож байжээ.

Газрын тосны гарц багасаж, боловсруулах үйлдвэрт гал түймэр гарч сүйдсэний улмаас 1969 онд эндээс газрын тос олборлохоо зогсоосон юм. Улмаар эндхийн хөл хөдөлгөөн татарсаар барилга байгууламжууд нь эвдэрч, тоногдон балгас хот болсон байна.  Гэсэн ч өнөөдрийн байдлаар 12 жилийн дунд сургууль, сум дундын эмнэлэг, хоёр цэцэрлэг, Соёлын төв, цэргийн анги, газрын тосны компани, хэд хэдэн банктай энэ багт 2000 гаруй хүн амьдардаг.

Зүүнбаянг 1992 онд Улаанбадрах сумын, 1993 оноос Сайншанд сумын баг болсон юм.

Өнөөдөр нэгэнт нөөц нь тогтоогдож ашиглагдаж эхэлсэн нефтийн баялагт түшиглэн бүс нутагт нефть боловсруулах үйлдвэр барих асуудал төр засаг, орон нутгийн удирдлагууд, бизнес эрхлэгчдийн анхааралд байгаа бөгөөд эндхийн нефтийг эдийн засгийн эргэлтэд оруулж нефтийн бүтээгдэхүүнийхээ зохих хувийг дотооддоо үйлдвэрлэх нь манай улсын импортыг хэмнэж, эдийн засгийн чадавхийг сайжруулах аймаг орон нутгийн хөгжил, хүн амын ажил эрхлэлт, амьжиргааны түвшинг дээшлүүлэхэд чухал ач холбогдолтой.