Иргэний хөдөлгөөн, төрийн бус байгууллагуудын төлөөлөл маргааш тохиох Хүний эрхийн өдрийн хүрээнд "Төрийн албан хаагчдын үйлддэг гэмт хэрэг ба хүний эрхийн зөрчил" сэдэвт хэлэлцүүлэг зохион байгуулахаар болжээ.

"Иргэний шударга шүүх" ТББ-ын тэргүүн Х.Бат-Ялалт: Өнгөрсөн арваад жилийн хугацаанд иргэний нийгэмд тодорхой байр сууриа таниулсан хөдөлгөөн, төрийн бус байгууллагууд бидэнтэй нэгдэж байгаа. Иргэний байгууллагыг тодорхой нэг хүнээр төлөөлүүлж ойлгодог буруу ойлголтыг зогсоох ёстой. Иргэний байгууллагууд одооноос эхэлж нэгдэж, идэвхжиж, нийгэмд болохгүй байгаа зүйлийн төлөө тэмцэхээр болж байна. Сүүлийн жилүүдэд төрийн албан хаагчдын буруутай үйл ажиллагаанаас болж улсын төсвөөс 23 тэрбум төгрөг зарцуулсан. Өөрөөр хэлбэл хэн нэгэн буруу шийдвэр гаргасан дарга ажилгүй явсан мөнгөө улсын төсвөөс гаргуулдаг. Гэтэл хүлээлгэх хариуцлага нь муу. Монгол Улсад үндсэндээ малын хулгай, хүн худалдаалах гэмт хэрэгтэй тэмцдэг төрөл бүрийн гэмт хэрэгтэй тэмцэх дагнасан бодлого байгаа юм. Тэгэхээр өнөөдөр төрийн албан хаагчдын гэмт хэрэгтэй тэмцдэг үндэсний бодлого байхгүй байна. Тиймээс энэ төрлийн гэмт хэргээс сэргийлдэг болох хэрэгтэй.

"Эрүүл нийгэм иргэний хөдөлгөөн"-ий гүйцэтгэх захирал н.Хосбаяр: 2012 оноос хойш ямар ч жагсаал цуглаан болсонгүй гэхэд болно. Тэгвэл бид жагсаж эхлэнэ. Учир нь бүхий л хүмүүс төрийн албан хаагч болохыг хүсч байна. Эцэг, эх нь ч хүүхдүүдээ төрийн албан хаагч болгох гэж хичээж байна. Яагаад заавал төрийн албан хаагч болох гээд байдаг юм. Бид тийм улс эх орондоо хайртай, дуртай болчихсон юм уу. Өнөөдөр нэг л эх орондоо хайртай болсон хүмүүс байна. Бүгд л төрийн алба руу дайрдаг болсон. УИХ-ын сонгууль болохоор бүгд л хэдэн тэрбумыг цацаж байгаад л гишүүн болох гээд дайраад байдаг. Гэтэл энэ бүхний цаана дандаа мөнгө идэх гэсэн л зорилго байна. Тиймээс бид нэгдэхээс өөр арга байхгүй.

"Хохирогчдын нэгдсэн холбоо"-ны тэргүүн Х.Оюунцэцэг: Хохирогчдын нэгдсэн холбоо маргаашийн нээлттэй хэлэлцүүлэгт оролцоно. Төрийн албан хаагчдын буруутай үйлдлээс болж олон иргэн хохирсон асуудал одоо болтол шийдэгдээгүй байна. Уг нь төрийн албаны тухай хуульд төрийн албан хаагчийн буруутай үйл ажиллагааг төр хариуцна гэсэн байдаг. Тэгэхээр үүнийг шууд утгаар нь зарим хүмүүс ойлгоод байх шиг байна. Өөрөөр хэлбэл, төрийн албан хаагч буруу зүйл хийж болно, хээл хахууль авч болно, идэж ууж болно. Харин тэрнийг нь төр хариуцна гэсэн төрийн албан хаагчийг хаацайлсан хууль гаргачихаад байгааг бид гайхаж байна. Үнэхээр төр хариуцдаг юм бол олон жилийн нүүр үзсэн ХЗХ, Хонгор, МИ-8, Долдугаар сарын 1-ний асуудлын цаана байгаа төрийн албан хаагч, төрийн оролцоотой луйврыг хариуцах ёстой.

"Нэгдсэн Монгол хөдөлгөөн"-ий тэргүүн Ч.Мөнхбаяр: Маргаашийн хэлэлцүүлэг Хүний эрхийн олон улсын өдөр болж байгаагаарай онцлогтой. Манай улсад хүний эрх зөрчигдөх нь ихэссэн. Хүний эрх зөрчигдөж байгаа нь төрийн албан хаагчидтай ч холбоотой. Төрийн албан хаагчдын асар их арми бий болж байна. Армийн зардал ч жилээс жилд өсч байна. Энэ нь улсын төсөвт асар их дарамт болж байгаа. Ингэснээр ард түмний амьдрал ч доройтож байна.